ភ្នំពេញ៖ អនុប្រធានទី១រដ្ឋសភាលោក ងួន ញ៉ិល បានស្នើភាគីឡាវជួយការពារអ្នកវិនិយោគកម្ពុជា និងស្នើភាគីឡាវជំរុញការវិនិយោគមកកាន់កម្ពុជា និងជំរុញការធ្វើឲ្យប្រសើរឡើងនូវទំនាក់ទំនងរវាងប្រទេសទាំងពីរ។
ក្នុងជំនួបពិភាក្សាជាមួយលោក សាយថុង កែវឌួងឌី (Saythong Keodouangdy) ប្រធានគណៈកម្មការនីតិកម្ម នៅវិមានរដ្ឋសភា នាព្រឹកថ្ងៃអង្គារ ទី១២ ខែមីនានេះលោក ងួន ញ៉ិលអនុប្រធានទី១រដ្ឋសភា បានស្វាគមន៍យ៉ាងកក់ក្តៅចំពោះគណៈប្រតិភូ និងបានវាយតម្លៃខ្ពស់ចំពោះដំណើរទស្សនកិច្ចនេះថា មានសារៈសំខាន់ក្នុងការពង្រឹងពង្រីកចំណងមិត្តភាព និងកិច្ចសហប្រតិបត្តិការរដ្ឋសភាប្រទេសទំាងពីរឲ្យកាន់តែរឹងមាំបន្ថែមឡើង។
លោកបណ្ឌិតងួន ញ៉ិលបានស្នើឲ្យឡាវជួយជំរុញ ផ្សព្វផ្សាយ និងកៀរគរអ្នកវិនិយោគទុននិងអ្នកទេសចរណ៍ឡាវ មកបណ្តាក់ទុននិងកម្សាន្តនៅកម្ពុជាឲ្យបានច្រើនឡើង ខណៈដែលកម្ពុជា កំពុងទទួលបានសុខសន្តិភាព និងលើកទឹកចិត្តបើកទូលាយដល់អ្នកវិនិយោគទុនបរទេសទំាងអស់។
លោក សាយថុង កែវឌួងឌី បានដឹកនាំគណៈប្រតិភូមកបំពេញទស្សនកិច្ចនៅកម្ពុជាក្នុងគោលបំណងសិក្សា ស្វែងយល់ពីការតាក់តែងច្បាប់និងការអនុវត្តច្បាប់នៅកម្ពុជា។ នៅក្នុងជំនួបជាមួយអនុប្រធានទី១រដ្ឋសភា។
លោកបានអបអរសាទរចំពោះសមិទ្ធផលដែលកម្ពុជាសម្រេចបាន។ លោកបន្តថា ទំនាក់ទំនងប្រទេសទំាងពីរពិសេសទំនាក់ទំនងរដ្ឋសភាកម្ពុជា និងឡាវ លោកប្រធានគណៈប្រតិភូ បានគូសបញ្ជាក់ថា កម្ពុជានិងឡាវ មានសាមគ្គីភាពជាប្រពៃណី និងជាប្រវត្តិសាស្ត្រដ៏យូរលុងមកហើយ៕
ប្រភព : www.propertyarea.asia
