ភ្នំពេញ៖ មន្ត្រីជាន់ខ្ពស់នៃរាជរដ្ឋភិបាលកម្ពុជា បានអះអាងថា ផ្លូវល្បឿនលឿនភ្នំពេញ-ព្រះសីហនុការដែលគ្រោងដ្ឋានសាងសង់ជាផ្លូវការនៅថ្ងៃទី២២ ខែមីនា ឆ្នាំ២០១៩នេះ នៅពេលសាងសង់រួចរាល់ នឹងជួយជំរុញការអភិវឌ្ឍសេដ្ឋកិច្ចកម្ពុជាកាន់តែលឿន។
លោក ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានឲ្យដឹងកាលពីពេលថ្មីៗនេះ ថា ផ្លូវល្បឿនលឿនមួយខ្សែនេះ នឹងរួមចំណែកកាន់តែខ្លាំងក្នុងការជំរុញសេដ្ឋកិច្ចរបស់កម្ពុជាលោកបន្តថា ផ្លូវល្បឿនលឿនភ្នំពេញ-ព្រះសីហនុនេះ នឹងដើរតួនាទីយ៉ាងសំខាន់ក្នុងការដឹកជញ្ជូនទំនិញតំបន់ប៉ូលសេដ្ឋកិច្ចដ៏សំខាន់ពីរគឺរាជធានីភ្នំពេញ និងខេត្តព្រះសីហនុ។
ជាពិសេសការដឹកទំនិញពីបណ្តារោងចក្រនានាទៅកាន់កំពង់ផែស្វយ័តព្រះសីហនុ សម្រាប់ការនាំចេញទៅកាន់ប្រទេស ក៏ដូចជាការដឹកទំនិញពីកំពង់ផែស្វយ័តព្រះសីហនុទៅតំបន់ទៅតំបន់ដទៃទៀត។
អ្នកនាំពាក្យក្រសួងសាធារណការ និងដឹកជញ្ជូន លោក វ៉ា ស៊ីមសូរិយា បានមានប្រសាសន៍ឲ្យដឹងតាមទូរស័ព្ទកាលពីពេលថ្មីៗនេះ ថា សម្តេចអគ្គមហាសេនាបតីតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជានឹងអញ្ជើញជាអធិតី ក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ ខេត្តព្រះសីហនុនៅថ្ងៃទី២២ មិនាខាងមុខនេះហើយ។
លោកបន្តថា បច្ចុប្បន្នក្រុមការងារកំពុងតែដុតដៃដុតជើង ដើម្បីរៀបចំការងារនេះ ប៉ុន្តែការបើកការដ្ឋាននៅទីតាំងណា លោកមិនទាន់អាចបញ្ជាក់បាននៅឡើយទេ អាស្រ័យលើក្រុមការងារខុទ្ទកាល័យសម្តេច ទើបអាចជ្រាបពីរឿងនេះ។
ផ្លូវល្បឿនលឿនភ្នំពេញ ក្រុងព្រះសីហនុមានប្រវែងជាង១៩០គីឡូម៉ែត្រ ដែលចេញពីម្តុំផ្លូវរទេះភ្លើង នៃតំបន់ទំនប់កប់ស្រូវ ស្ថិតនៅខាងស្តាំដៃផ្លូវជាតិលេខ៤ និងសាងសង់ស្របគ្នានឹងផ្លូវជាតិនេះ រហូតជិតដល់ទីរួមខេត្តកំពង់ស្ពឺ ទើបផ្លូវនេះឆ្លងកាត់ផ្លូវជាតិលេខ៤ ងាកមកខាងឆ្វេងដៃវិញ ហើយបន្តរហូតដល់ស្រុកព្រៃនប់ ទើបផ្លូវនេះងាកមកស្តាំដៃ រហូតដល់មាត់សមុទ្រនៃក្រុងព្រះសីហនុ។ផ្លូវល្បឿនលឿននេះគ្រោងប្រើពេលសាងសង់ ៤ឆ្នាំ។
លោកវ៉ាស៊ីម សូរិយាបានមានប្រសាសន៍ឲ្យដឹងទៀតថា ផ្លូវល្បឿនលឿននេះនឹងមានការធ្វើរបងជុំវិញ លើកលែងតែចំណុចឆ្លងកាត់មួយចំនួនដែលមានស្ពានអាកាស និងស្ថានីយ៍ឈប់សំចត ព្រោះវាជាផ្លូវលឿនដែលអាចបើកបរក្នុងល្បឿនពី១២០ទៅ១៦០គីឡូម៉ែត្រក្នុងមួយម៉ោង ហេតុនេះទើបផ្លូវនេះ មិនតម្រូវឲ្យមានចំណុចឆ្លងកាត់ច្រើននោះទេ៕
ប្រភព : www.propertyarea.asia
