ភ្នំពេញ៖ ក្រុមហ៊ុនផលិតស៊ីម៉ង់ត៍ ជីប ម៉ុង គ្រោងផលិតស៊ីម៉ង់នាំចេញទៅក្រៅប្រទេស បន្ទាប់ពីដណ្តើមបានចំណែកទីផ្សារផ្គត់ផ្គង់ស៊ីម៉ង់ប្រមាណជិត៣០%នៅទូទាំងប្រទេស។
ក្រុមហ៊ុនបានអះអាងថា នឹងបង្កើនការផលិតឱ្យបានគ្រប់គ្រាន់ ដើម្បីបំពេញតម្រូវក្នុងស្រុកនិងឈានទៅនាំចេញទៅក្រៅប្រទេសដែរ។
នៅក្នុងពិធីប្រារព្ធខួប០១ឆ្នាំរបស់ក្រុមហ៊ុន ជីប ម៉ុង អ៊ិនស៊ីស៊ីមេន ខបភើរេសិន កាលពីថ្ងៃទី២៦ ខែកុម្ភៈកន្លងមនេះ លោកឧកញ៉ា លាង ម៉េង អគ្គនាយកក្រុមហ៊ុនបានអះអាងថា នឹងបង្កើនការផលិតឱ្យបានគ្រប់គ្រាន់ ដើម្បីបំពេញតម្រូវក្នុងស្រុកនិងឈានទៅនាំចេញទៅក្រៅប្រទេសដែរដោយសារតែកាលពីមុន កម្ពុជាធ្លាប់តែជាប្រទេសដែលនាំចូលស៊ីម៉ង់ពីក្រៅប្រទេស ប៉ុន្តែ បច្ចុប្បន្ននេះ កម្ពុជាអាចផលិតស៊ីម៉ងត៍ ផ្គត់ផ្គង់ក្នុងស្រុក ដែលអាចចូលរួមចំណែកកាត់បន្ថយការនាំចូលបានប្រមាណជាង៨០%។
លោក អេឌាន លីណាម (Aidan Lynam) នាយកប្រតិបត្តិក្រុមហ៊ុន បានលើកឡើងថា ក្នុងមួយថ្ងៃអាចផលិតស៊ីម៉ង់បានចន្លោះ ៥ម៉ឺន ៥ពាន់តោន និង១.៦លានតោន ក្នុងមួយឆ្នាំសម្រាប់ផ្គត់ផ្គង់ ទីផ្សារ លក់រាយនិងទីផ្សារឧស្សាហកម្ម ដោយប្រើប្រាស់វត្ថុធាតុដើមក្នុងស្រុក មានគុណភាពខ្ពស់ ជាមួយការត្រួតពិនិត្យ ស្តង់ដារ និងធានាគុណភាពលំដាប់ពិភពលោក។ លោកឲ្យដឹងទៀតថា បច្ចុប្បន្នតម្រូវការស៊ីម៉ង់ក្នុងស្រុកនៅតែកើនឡើង។
នាពេលខាងមុខក្រុមហ៊ុននឹងពិចារណាពង្រីកអាជីវកម្ម បង្កើនការផលិត ស៊ីម៉ង់ឱ្យបានគ្រប់គ្រាន់ ដើម្បីបំពេញតម្រូវក្នុងស្រុកនិងឈានទៅនាំចេញទៅក្រៅប្រទេស។
បច្ចុប្បន្ននៅក្នុងប្រទេសកម្ពុជាមានរោងចក្រស៊ីម៉ង់ត៍ចំនួន០៤ ដែលអាចមានលទ្ធភាពផលិតស៊ីម៉ង់បាន ០៧លានតោនក្នុងមួយឆ្នាំ សម្រាប់ផ្គង់ផ្គង់តម្រូវការក្នុងស្រុក៕
ប្រភព : www.propertyarea.asia
