ភ្នំពេញ៖ ប្រទេសអាល្លឺម៉ង់បានប្រកាសបន្តសហប្រតិបត្តិការជាមួយកម្ពុជា លើគំរោងជាច្រើនដើម្បីជំរុញការអភិវឌ្ឍសេដ្ឋកិច្ច និងសង្គមកម្ពុជា។
លោក Nobert BARTHLE ជាសមាជិកសហព័ន្ធអាល្លឺម៉ង់ និងជារដ្ឋលេខាធិការក្រសួងសហប្រតិបត្តិការ នៃប្រទេសអាល្លឺម៉ង់បានមានប្រសាសន៍ឲ្យដឹងក្នុងជំនួបជាមួយសម្តេចតេជោហ៊ុន សែននាយករដ្ឋមន្រ្តីកម្ពុជាកាលពីល្ងាចថ្ងៃទី២៥ កុម្ភៈកន្លងមកថា ដំណើរទស្សនកិច្ចរបស់សមាជិកសភា និងមន្រ្តីជាន់ខ្ពស់អាល្លឺម៉ង់នាពេលនេះ ធ្វើឡើងដើម្បីស្វែងយល់ពីគម្រោងទាំងឡាយ ដែលសហព័ន្ធអាល្លឺម៉ង់ បានធ្វើនៅក្នុងប្រទេសកម្ពុជាយើង ដើម្បីបានជាមូលដ្ឋានបន្តកិច្ចសហប្រតិបត្តិការនៅលើគម្រោងជាច្រើនបន្ថែមទៀត ដោយអនុវត្តទៅតាមការណែនាំពីលោកស្រីអធិការបតី Angela Merkel ដែលកន្លងមកលោកស្រីតែងតែគាំទ្រដល់រាជរដ្ឋាភិបាលកម្ពុជា ដឹកនាំដោយសម្តេចតេជោ ហ៊ុន សែន ។
លោក Nobert BARTHLE បានជម្រាបជូនសម្តេចតេជោថា លោកបានកត់សម្គាល់ពីការអភិវឌ្ឍន៍យ៉ាងខ្លាំងរបស់ប្រទេសកម្ពុជា ហើយសង្កេតឃើញមានការវិនិយោគជាច្រើន នៅក្នុងនោះលោកក៏មានការលើកទឹកចិត្ត ដល់អ្នកវិនិយោគជាច្រើន ពីអាល្លឺម៉ង់អោយមកកម្ពុជាផងដែរ។ លើសពីនេះទៅទៀតលោក ក៏បានជម្រាបជូនសម្ដេចតេជោថាកន្លងមក គឺមានអ្នកវិនិយោគិនអាល្លឺម៉ង់ជាច្រើនបានចាប់អារម្មណ៍ មកវិនិយោគនៅប្រទេសកម្ពុជា។
ជាការឆ្លើយតប សម្ដេចតេជោនាយករដ្ឋមន្ត្រី បានថ្លែងអំណរគុណ និងផ្ញើការសួរសុខទុក្ខជូន ចំពោះលោកជំទាវអធិការបតីអាល្លឺម៉ង់ ដែលបានផ្ញើលិខិតអបអរសាទរចំពោះសម្ដេច ដែលបានជាប់ឆ្នោតជានាយកមន្រ្តីកន្លងមកនេះ។ សម្តេចតេជោបានមានប្រសាសន៍ និងអរគុណចំពោះការវាយតម្លៃដោយស្មោះត្រង់ ចំពោះការវិវឌ្ឍរបស់ប្រទេសកម្ពុជា ដោយសម្តេចតេជោបានបញ្ជាក់ថា ទីក្រុងភ្នំពេញកាលពីឆ្នាំ១៩៧៩ គឺសម្តេចបានជួបមនុស្សតែ៧០នាក់ប៉ុណ្ណោះ។ ប៉ុន្តែនៅពេលនេះ ភ្នំពេញមានមនុស្សជាច្រើនបានកំពុងរស់នៅយ៉ាងសុខសប្បាយ និងមានការអភិវឌ្ឍយ៉ាងច្រើន។
សម្តេតេជោ ហ៊ុន សែន បានបន្តថា “ការអភិវឌ្ឍនេះទទួលបានត្រឹមក្នុងរយៈពេល២០ឆ្នាំចុងក្រោយនេះ ដែលនាំអោយប្រទេសទទួលបាននូវសុខសន្តិភាព ហើយការអភិវឌ្ឍន៍នេះ ក៏មានការចូលរួមពីបណ្តាប្រទេសនានា ក្នុងនោះក៏មានអាល្លឺម៉ង់ផងដែរ”។
សម្តេចតេជោក៏បានមានប្រសាសន៍ថា ទោះបីជាពេលនេះ កម្ពុជាមានការអភិវឌ្ឍយ៉ាងឆាប់រហ័សយ៉ាងណាក៏ដោយ ក៏កម្ពុជានៅមានបញ្ហាប្រឈមនៅឡើយ ហើយក្នុងនោះកម្ពុជាបានដាក់ចេញនូវការងារអាទិភាពមួយចំនួន ដើម្បីដោះស្រាយបញ្ហាទាំងនោះរួមមាន ការអភិវឌ្ឍធនធានមនុស្ស បញ្ហាទឹកស្រោចស្រប់ បញ្ហាទូរគមនាគមន៍ គមនាគមន៍ និងបញ្ហាអគ្គិសនីផងដែរ៕
ប្រភព : www.propertyarea.asia
