ភ្នំពេញ៖ ភាគីកម្ពុជា-ឡាវបានឯកភាពរៀបចំបឋម នៃការដឹកជញ្ជូនឆ្លងកាត់ព្រំដែនតាមរយៈរថយន្តដឹកអ្នកដំណើររវាងកម្ពុជា និងឡាវ ជាពិសេសរវាងភ្នំពេញ-ប៉ាក់សេ និងសៀមរាប-ប៉ាក់សេ។
ភាគីទាំងពីរក៏បានឯកភាពគ្នា ពង្រឹងកិច្ចសហប្រតិបត្តិការអាកាសចរណ៍ស៊ីវិល លើផ្នែកសុវត្ថិភាព សន្តិសុខ ការអភិវឌ្ឍផ្លូវអាកាស និងការផ្លាស់ប្ដូរ ការបណ្ដុះបណ្ដាល និងពិនិត្យលទ្ធភាពបង្កើន ការហោះហើរត្រង់បន្ថែមទៀតរវាងប្រទេសទាំងពីរ។
នៅក្នុងកិច្ចប្រជុំគណៈកម្មការចម្រុះ សម្រាប់កិច្ចសហប្រតិបត្តិការទ្វេភាគី កម្ពុជា-ឡាវ លើកទី១៣នៅរដ្ឋធានីវៀងចន្ទន៍ កាលពីថ្ងៃទី២១-២២ ខែកុម្ភៈ ឆ្នាំ២០១៩កន្លងមកនេះភាគីទាំងពីរ ក៏បានពិភាក្សាអំពីការដោះស្រាយបញ្ហាព្រំដែន និងលើកទឹកចិត្តឱ្យក្រសួងការបរទេសនៃប្រទេសទាំងពីរ បញ្ចប់សេចក្តីព្រាងបែបបទបច្ចេកទេស (TOR) ឲ្យបានឆាប់ ស្របតាមខ្លឹមសារនៃលិខិតរួមរបស់នាយករដ្ឋមន្ត្រីទាំងពីរ ចុះថ្ងៃទី៦ ខែកញ្ញា ឆ្នាំ២០១៧ ផ្ញើ ជូនប្រធានាធិបតីបារាំង។
ភាគីទាំងពីរក៏បានឯកភាពបន្តលើកកម្ពស់ការយល់ដឹង របស់ប្រជាជនរបស់ខ្លួន លើឯកសារព្រំដែនដែលត្រូវបានព្រមព្រៀង ដោយប្រទេសទាំងពីរ ដើម្បីពង្រឹងកិច្ចសហប្រតិបត្តិការក្នុងការលើកកម្ពស់សកម្មភាពដូចជា អន្តោប្រវេសន៍ខុសច្បាប់ ពាណិជ្ជកម្ម ខុសច្បាប់ និងការឆ្លងដែនខុសច្បាប់តាមបណ្តោយព្រំដែន។
កិច្ចប្រជុំក៏បានឯកភាពពីការបង្កើនកិច្ចសហប្រតិបត្តិការ លើវិស័យផ្សេងៗទៀត ដែលក្នុងនោះរួមមាន អប់រំ ព័ត៌មាន កសិកម្ម ទេសចរណ៍ វប្បធម៌ សុខភាពសាធារណៈ ប្រៃសណីយ៍ និងទូរគមនាគមន៍ ច្បាប់ និងកិច្ចសហប្រតិបត្តិការតុលាការ និងកិច្ចសហប្រតិបត្តិការកុងស៊ុល។ ក្រៅពីកិច្ចសហប្រតិបត្តិការទ្វេភាគី ភាគីទាំងពីរបានសម្តែងនូវការប្តេជ្ញាចិត្តបន្តកិច្ចសហប្រតិបត្តិការ ក្នុងយន្តការថ្នាក់អនុតំបន់ និងតំបន់ ឆ្ពោះទៅរកសមាហរណកម្ម និងការតភ្ជាប់ សេដ្ឋកិច្ចប្រកបដោយចីរភាព និងគ្រប់ជ្រុងជ្រោយ។
ទំហំពាណិជ្ជកម្មរវាងប្រទេសកម្ពុជា-ឡាវ បាននិងកំពុងរីកចម្រើន ប៉ុន្តែនៅមានកម្រិតនៅឡើយ។ ភាគីទាំងពីរបានឯកភាពគ្នា សម្រួលពាណិជ្ជកម្មទ្វេភាគីបន្ថែមទៀត បង្កើន ការអនុវត្តកិច្ចព្រមព្រៀងស្តីពីការជំរុញ និងការការពារវិនិយោគ និងបង្កើតបរិយាកាសអំណោយផល ដល់ វិនិយោគិន ដើម្បីលើកកម្ពស់លំហូរចេញ-ចូល នៃវិនិយោគរវាងប្រទេសទាំងពីរ៕
ប្រភព : www.propertyarea.asia
