ភ្នំពេញ៖ ការពន្ធអចលនទ្រព្យនាពេលបច្ចុប្បន្ននេះ គេសង្កេតឃើញថា ម្ចាស់អចលទ្រព្យមួយចំនួនហាក់នៅមានភាពស្រពិចស្រពិលនៅឡើយ ដោយមិនទាន់ដឹងច្បាស់ថាតើខ្លួនត្រូវជាប់កាតព្វកិច្ចបង់ពន្ធជូនរដ្ឋ ទៅលើអចលនទ្រព្យរបស់ខ្លួនឬអត់ ?។បើទោះបីជាខ្លឹមសារនៃច្បាប់ពន្ធអចលនទ្រព្យ ត្រូវបានផ្សព្វផ្សាយជាសាធារណៈរួចទៅហើយនោះ ។
ជាមួយគ្នានេះ អ្វីដែលរឹតតែជាចម្ងល់របស់ពួកគាត់បន្ថែមទៀតនោះ គឺនៅពេលដែលការប្រកាសពីតម្លៃអចលនទ្រព្យ ត្រូវបានកំណត់ជាប្រាក់ដុល្លារ។ ដោយឡែកការប្រកាសបង់ពន្ឌបែរជាកំណត់ជាប្រាក់រៀលទៅវិញ។
លោក គិត ចាន់ថង អគ្គនាយកគ្រប់គ្រងក្រុមហ៊ុនសូតា ប្រឺហ្វេសិនណល ឯ.ក និងជាសាស្ត្រាចារ្យបង្រៀនជំនាញគណនេយ្យ និងពន្ធដារ បានពន្យល់ថា ជាការពិតណាស់ ជាមូលដ្ឋាន នៃការវាយតម្លៃពីតម្លៃអចលនទ្រព្យនៅកម្ពុជា ភាគច្រើនតែងត្រូវបានគេគិតជាចំនួនប្រាក់ដុល្លារនៅលើទីផ្សារអចលនទ្រព្យ មិនសូវគិតជាប្រាក់រៀលនោះទេ ព្រោះបើគិតជាប្រាក់រៀលគឺមានចំនួនច្រើន។
លោកបន្តថា តាំងពីឆ្នាំ២០១១មកម្ល៉េះ ក្រសួងសេដ្ឋកិច្ច និងហិរញ្ញវត្ថុ បានចេញប្រកាសលេខ៣៧១ស្ដីពី តម្លៃ គិតពន្ធលើអចលនទ្រព្យទូទាំងប្រទេសរួចហើយ ដែលមានភ្ជាប់ឧបសម្ព័ន្ធចំនួន២៤ ស្ដីពីការបែងចែកភូមិសាស្ដ្រ និងតម្លៃអចលនទ្រព្យ សម្រាប់ជាមូលដ្ឋានគិតពន្ធលើអចលនទ្រព្យនៅរាជធានីភ្នំពេញ និងខេត្ដទាំង២៣ (គ្រាខេត្តត្បូងឃ្មុំនៅជាចំណុះស្រុករបស់ខេត្តកំពង់ចាមនៅឡើយ)។
លោកបន្តថា ការបង់ប្រាក់ពន្ធត្រូវគិតជាប្រាក់រៀល ដើម្បីសម្រួលក្នុងការគណនាប្រាក់ពន្ធលើអចលនទ្រព្យឆ្នាំ ដោយអត្រាប្ដូរប្រាក់សម្រាប់គោលដៅ នៃពន្ធលើអចលនទ្រព្យ ត្រូវកំណត់ថេរតាមអត្រាសមមូល១ដុល្លារអាមេរិក ស្មើនឹង៤០០០រៀល។
ពាក់ព័ន្ឋនឹងមូលដ្ឋាននៃការវាស់ស្ទង់ មូលដ្ឋានគិតពន្ឋលើវិស័យអចលនទ្រព្យ លោកលោក គិត ចាន់ថងបានឲ្យដឹងថា តើមូលដ្ឋាននៃការកំណត់ថាជាប់ការបង់ពន្ធ ឬមិនជាប់ការបង់ពន្ធ មានអ្វីដែលជាឧបករណ៍វាស់ស្ទង់? ចំណោទមួយនេះ ត្រូវបានអ្នកជំនាញលើកឡើងយ៉ាងខ្លីថា ឧបករណ៍នៃការវាស់ស្ទង់ពីកម្រិត និងទំហំដែលជាប់កាតព្វបង់ពន្ធ បច្ចុប្បន្ននេះហាក់មិនជាឧបសគ្គនោះទេ ដោយពលរដ្ឋគ្រប់គ្នាសុទ្ធតែអាចស្វែងយល់ដឹងអោយស៊ីជម្រៅ និងច្បាស់ប្រាកដបានដោយខ្លួន តាមរយៈការចូលមើលក្នុងគេហទំព័ររបស់អគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ តាមរយៈ www.tax.gov.kh ៕
ប្រភព : www.propertyarea.asia
