ភ្នំពេញ៖ ទំហំពាណិជ្ជកម្មកម្ពុជា និងអន្តរជាតិ សម្រេចបានប្រមាណ ៩.៤៤ពាន់លានដុល្លារ កើនឡើង ១៦.៣% បើធៀបនឹងរយៈពេលដូចគ្នាឆ្នាំ២០២៤។ បើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា។
កម្ពុជា បាននាំចេញទំនិញទៅបរទេសក្នុងតម្លៃ ៤ ៤៦០លានដុល្លារ កើន ១១.៩% ខណៈការនាំចូលមកវិញចំនួន ៤ ៩៨៧លានដុល្លាររ កើន ២០.៦% ចាប់ពីខែមករា ដល់ខែកុម្ភៈ ឆ្នាំ២០២៥។ បើតាមការរបាយការណ៍ខាងលើ។
ជាទីផ្សារធំសម្រាប់ការនាំចេញរបស់កម្ពុជា សហរដ្ឋអាមេរិក មានទំហំនាំចេញចំនួន ១,៦២៦លានដុល្លារ និងវៀតណាមទំហំនាំចេញ ៦៤៨លានដុល្លារ។ ខណៈ ប្រទេសចិន ក៏ជាអ្នកនាំចូលដ៏ធំបំផុតរបស់កម្ពុជា ជាមួយនឹងទឹកប្រាក់ចំនួន ២,៤៤៤លានដុល្លារ កើន ២៤%។ តាមការបញ្ជាក់ ក្នុងរបាយការណ៍ដដែល។
គួរបញ្ជាក់ថា ផលិតផលនាំចេញសំខាន់របស់កម្ពុជារួមមាន៖ សម្លៀកបំពាក់ គ្រឿងចក្រ ឧបករណ៍អគ្គិសនី ផលិតផលស្បែកជើង គ្រាប់ធញ្ញជាតិ គ្រឿងសង្ហារិម កៅស៊ូ ផ្លែឈើ បន្លែ គុជ ប្រដាប់ក្មេងលេង និងវាយនភណ្ឌ។
បើតាម ធនាគារជាតិនៃកម្ពុជា បានព្យាករថាឆ្នាំ២០២៥នេះកំណើនសេដ្ឋកិច្ចរបស់កម្ពុជាស្ថិតក្នុងអត្រា ៦.២% ដោយសារតែកំណើនដ៏រឹងមាំនៃការនាំចេញផលិតផលកាត់ដេរ និងផលិតផលមិនមែនកាត់ដេរ គួបផ្សំនឹងការរីកចម្រើនជាវិជ្ជមាននៃវិស័យទេសចរណ៍ និងកសិកម្ម៕
ដោយ៖ មឿន ឌីណា (Moeun Dyna)
