ភ្នំពេញ៖ រយៈពេល ៨ខែឆ្នាំ២០២៤ កម្ពុជាចេញអង្ករចំនួន ៤១២ ០២៣តោន ទទួលបានចំណូល ៣០៥លានដុល្លារ ខណៈ ស្រូវវិញត្រូវបានចំនួន ៣ ៣១៨ ៥៩២តោន ទឹកប្រាក់ប្រមាណ ៩១៨.១៦លានដុល្លារ។ បើយោងតាមសហព័ន្ធស្រូវអង្ករកម្ពុជា (CRF)។
កម្ពុជា បាននាំចេញអង្ករតាមរយៈក្រុមហ៊ុនចំនួន ៥៣ក្រុមហ៊ុន ទៅកាន់គោលដៅចំនួន៦៥ ក្នុងនោះ ទៅកាន់បណ្តាប្រទេសនៅតំបន់អឺរ៉ុបចំនួន២៦ ក្នុងបរិមាណអង្ករចំនួន ២០៨ ២០៧តោន គិតជាទឹកប្រាក់ចំនួន ១៦១.៧០លានដុល្លារ ។
ទន្ទឹមនេះ កម្ពុជាបាននាំចេញអង្ករចំនួន ៧៧ ៧៩២តោន ទៅកាន់ប្រទេសចិន រួមទាំង ហុងកុង និងម៉ាកាវ ចំនួន ៧៧ ៧៩២តោន គិតជាទឹកប្រាក់ចំនួន ៤៨.៨៧លានដុល្លារ។
កម្ពុជា ក៏បាននាំអង្ករទៅកាន់បណ្ដាប្រទេសក្នុងអាស៊ានចំនួន ៧ប្រទេស រួមមាន៖ ទីម័រខាងកើតផង ក្នុងបរិមាណ ចំនួន ៨៣ ០៩៥តោន គិតជាទឹកប្រាក់ចំនួន ៥៦.៨៩លានដុល្លារ។ គោលដៅ ២៨ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី នូវែលសេឡង់ ជាដើមចំនួន ៤២ ៩២៩តោន គិតជាទឹកប្រាក់ចំនួន ៣៧.៦៩លានដុល្លារ។
ចំពោះ ប្រភេទអង្ករដែលបាននាំចេញ រួមមាន៖ អង្ករក្រអូបចំនួន ៧០.៩២% ,ប្រភេទអង្ករស ធម្មតា ២៣.៧៥% ,អង្ករចំហ៊ុយ ៣.១៣% ,អង្ករសរីរាង្គចំនួន ១.៨៩% និងអង្ករផ្សេងៗចំនួន ០.៣២%។
កម្ពុជា ក៏បាននាំចេញស្រូវចំនួន ៣ ៣១៨ ៥៩២តោន (ស្រូវសើម) ដែលគិតជាទឹកប្រាក់ប្រមាណ ៩១៨.១៦លានដុល្លារ ក្នុងនោះ ៨៣.៧៧% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច។
បើតាម CRF បានរម្លឹកថា ក្នុងឆ្នាំ២០២៣ កម្ពុជាបាននាំចេញអង្ករទៅទីផ្សារអន្តរជាតិសរុប ៦៥៦ ៣២៣តោន កើន ៣ % បើធៀបនឹងឆ្នាំ២០២២ ជាមួយទឹកប្រាក់ចំនួន ៤៦៦លានដុល្លារ កើនឡើង ១៣%។
គួរបញ្ជាកៈថា ក្នុងឆ្នាំ២០២៤ CRF នឹងរៀបចំកម្មវិធី «វេទិកាស្រូវអង្ករកម្ពុជាលើកទី៧ ឆ្នាំ២០២៤» ក្រោមប្រធានបទ៖ «ការប្រែក្លាយខ្សែច្រវាក់ផ្គត់ផ្គង់អង្ករកម្ពុជា ឱ្យកាន់តែមានភាពធន់ បរិយាបន្ន និងនិរន្ដរភាព» ដែលនឹងប្រព្រឹត្តទៅនៅថ្ងៃទី១០ ខែកញ្ញានេះ ដើម្បីផ្សព្វផ្សាយអំពីសក្តានុពល នៃវិស័យស្រូវអង្ករកម្ពុជាទៅកាន់ពិភពលោក៕
ដោយ៖ មឿន ឌីណា (Moeun Dyna)
