ភ្នំពេញ៖ ផ្លូវចំនួន ៤ខ្សែ តភ្ជាប់ពីភ្នំពេញទៅកាន់ខេត្តតំបន់ឆ្នេរ បាននិងកំពុងសាងសង់លើកកម្រិតគុណភាពដែលគ្រោងនឹងបញ្ចប់ទាំងស្រុងនៅឆ្នាំ២០២៦ខាងមុខនេះ ដោយបានចំណាយថវិកាប្រមាណ ២៥០លានដុល្លារ។
ផ្លូវទាំង ៤ខ្សែ ដែលរាជរដ្ឋាភិបានបើកការដ្ឋាននិងកំពុងមមាញឹកសាងសង់នោះ រួមមាន៖
ផ្លូវជាតិលេខ៤១ តភ្ជាប់ពីផ្លូវជាតិលេខ៤ ត្រង់ចំណុចថ្នល់ទទឹង ខេត្តកំពង់ស្ពឺ ទៅកាន់ផ្លូវជាតិលេខ៣ ក្នុងខេត្តកំពត និងបន្តទៅកាន់ទីរួមខេត្តកំពត។ ផ្លូវនេះ ត្រូវបានរាជរដ្ឋាភិបាលគ្រោងចំណាយប្រមាណ ៦៧លានដុល្លារ និងគ្រោងបញ្ចប់នៅឆ្នាំ២០២៦។
ផ្លូវជាតិលេខ៣១ តភ្ជាប់ពីផ្លូវជាតិលេខ៣ ត្រង់ចំណុចបែកគុសខេត្តតាកែវ ទៅកាន់ទីរួមស្រុកកំពង់ត្រាច ខេត្តកំពត ក៏បានបើកការដ្ឋាន និងសាងសង់បានជិត ១០០%។ ផ្លូវនេះ មានសារសំខាន់ក្នុងការតភ្ជាប់ពីភ្នំពេញទៅកាន់ស្រុកកំពង់ត្រាច និងតភ្ជាប់ផ្លូវជាតិលេខ៣៣ ដែលរដ្ឋាភិបាលគ្រោងចំណាយប្រមាណ ៦០លានដុល្លារ ដោយរំពឹងថានឹងបញ្ចប់ក្នុងឆ្នាំ២០២៦។
ផ្លូវជាតិលេខ៣៣ តភ្ជាប់ពីកំពង់ត្រាចទៅកាន់ទីរួមខេត្តកំពត ដោយកាត់តាមក្រុងកែប ខេត្តកែប ក៏នឹងបញ្ចប់នៅពេលឆាប់ៗនេះដែរ។ ផ្លូវជាតិលេខ៣៣ ត្រូវបានចំណាយថវិកាសាងសង់អស់ប្រមាណ ៦១លានដុល្លារ។ គិតត្រឹមបច្ចុប្បន្ន គម្រោងលើកកម្រិតគុណភាពផ្លូវជាតិលេខ៣៣ សម្រេចវឌ្ឍនភាពប្រមាណ ៩០%។
ផ្លូវដ៏សំខាន់មួយទៀត ដែលតភ្ជាប់ពីផ្លូវជាតិលេខ៤ ត្រង់ចំណុចស្រែអំបិលទៅកាន់ទីរួមខេត្តកោះ គឺផ្លូវជាតិលេខ៤៨ ដែលតភ្ជាប់ពីរាជធានីភ្នំពេញទៅកាន់តំបន់សមុទ្រនៃខេត្តកោះកុងតាមរយៈផ្លូវជាតិលេខ៤ ត្រូវបានរាជរដ្ឋាភិបាលចំណាយប្រមាណ៦៥លានដុល្លារ។ គិតត្រឹមចុងខែកក្កដា គម្រោងអភិវឌ្ឍន៍ផ្លូវជាតិលេខ៤៨ សម្រេចបានប្រមាណ ៦៣,៣១% ដោយគ្រោងបញ្ចប់នៅឆ្នាំ២០២៥ខាងមុខ៕
ដោយ៖ មឿន ឌីណា (Moeun Dyna)
