ភ្នំពេញ៖ រាជធានីភ្នំពេញ ខេត្តពោធិ៍សាត់ និងខេត្តសៀមរាប បានទទួលនូវជ័យលាភី ក្នុងការអនុវត្តគម្រោងអភិវឌ្ឍន៍មូលដ្ឋាន និងការបម្រើសេវាជូនប្រជាពលរដ្ឋបានល្អ។
គណៈកម្មការដែលវាយតម្លៃ ទៅលើជ័យលាភីនេះ មានខាងក្រសួងមហាផ្ទៃ ក្រសួងរៀបចំដែន នគរូបនីយកម្ម និងសំណង សាលារាជធានី ដៃគូអភិវឌ្ឍន៍នៅទីក្រុងប៉ារីស ប្រទេសបារាំង សមាគមអន្តរជាតិអភិបាលក្រុងប្រើប្រាស់ភាសាបារាំង និងភាគីមួយចំនួនទៀត។ បើតាមប្រសាសន៍របស់ លោក ប៉ុក សុគន្ធណារ៉ា អគ្គលេខាធិការសមាគមក្រុមប្រឹក្សាថ្នាក់ក្រោមជាតិ។
លោក ប៉ុក សុគន្ធណារ៉ា បានមានប្រសាសន៍បន្តឱ្យដឹងថា សម្រាប់ជ័យលាភីលេខ១ បានទៅលើក្រុងពោធិ៍សាត់ អនុវត្តគម្រោងទំនប់បង្ហៀរទឹកក្បាលហុងស្ទឹងពោធិ៍សាត់ លេខ២ បានទៅលើស្រុកបន្ទាយស្រី ខេត្តសៀមរាប អនុវត្តគម្រោងផ្ទះមួយ អំពូលភ្លើង១ និងលេខ៣ បានទៅលើសង្កាត់ទឹកល្អក់ទី១ ក្នុងខណ្ឌទួលគោក រាជធានីភ្នំពេញ អនុវត្តគម្រោងហេដ្ឋារចនាសម្ព័ន្ធផ្លូវបេតុងសហគមន៍ភូមិ១៥-១៦។
ចំពោះកម្មវិធីពានរង្វាន់នេះ ត្រូវបានផ្សព្វផ្សាយយ៉ាងទូលំទូលាយដើម្បីឱ្យគ្រប់បណ្ដារាជធានីខេត្ត បានចូលរួមដាក់គម្រោងរបស់ខ្លួន ដែលគិតថាអនុវត្តបានល្អលើការបម្រើសេវាជូនពលរដ្ឋ ឬអភិវឌ្ឍន៍មូលដ្ឋានដោយប្រឡងប្រណាំង ហើយត្រូវបានជ្រើសយកគម្រោងដែលអនុវត្តបានល្អមកធ្វើបទបង្ហាញនៅរាជធានីភ្នំពេញ ហើយក៏បានរកឃើញនូវជ័យលាភីទាំង៣នេះ។ បើតាមការបន្ថែមរបស់ លោក ប៉ុក សុគន្ធណារ៉ា។
សមាគមមានរៀបចំការធ្វើដំណើរទស្សនកិច្ចសិក្សាផ្លាស់ប្តូរបទពិសោធន៍រវាងខេត្តជាប់ជ័យលាភី ទៅដល់បណ្ដាខេត្តផ្សេងៗ ដើម្បីដកស្រង់យកបទពិសោធ៍មកអនុវត្ត ទាក់ទងនឹងការអភិវឌ្ឍតំបន់ប្រជុំជន ជាពិសេសពាក់ព័ន្ធនឹងការផ្ដល់សេវាជូនប្រជាពលរដ្ឋនៅក្នុងមូលដ្ឋាន។ បើតាមប្រសាសន៍របស់ លោក ម៉ម សារិន ប្រធានសមាគមជាតិក្រុមប្រឹក្សារាជធានីខេត្ត និងជាប្រធានក្រុមប្រឹក្សារាជធានីភ្នំពេញ៕
ដោយ៖ មឿន ឌីណា (Moeun Dyna)
