កណ្ដាល៖ នាយកដ្ឋានវិស្វកម្ម ក្រសួងការពារជាតិ កំពុងសាងសង់ ផ្លូវបេតុង ៣ខ្សែ និងផ្លូវក្រាលល្បាយថ្មភ្នំ ១ខ្សែ ប្រវែងជិត ៦ពាន់ម៉ែត្រ ក្នុងស្រុកខ្សាច់កណ្ដាល ហើយនិងរៀបថ្មសំណាញ់ការពារតាមជើងទេរផ្លូវប្រវែង ២,០០០ម៉ែត្រ ក្នុងស្រុកល្វាឯម ខេត្តកណ្ដាល។ នេះបើតាមក្រសួង​អភិវឌ្ឍន៍​ជនបទ។

ក្រសួងបានឱ្យដឹងថា អ៊ិន ចន្ថា រដ្ឋលេខាធិការ​ ​តំណាង លោក អ៊ុក​ រ៉ាប៊ុន​ រដ្ឋ​មន្ត្រី​ក្រសួង​អភិវឌ្ឍន៍​ជនបទ​ បានដឹកនាំគណកម្មការអន្ដរក្រសួង រួមមានតំណាងក្រសួងអភិវឌ្ឍន៍ជនបទ ក្រសួងសេដ្ឋកិច្ច និងហិរញ្ញវត្ថុ អញ្ជើញទៅត្រួតពិនិត្យ និងវាយតម្លៃលទ្ធផលការងារទាំង៣ ខាងលើកាលពីថ្ងៃទី៧ ខែមីនា ឆ្នាំ២០២២។

ក្រសួងបានបន្តថា គម្រោងទាំង៣ រួមមាន៖

-គម្រោងទី១៖ ការងាររៀបថ្មសំណាញ់ការពារតាមជើងទេរផ្លូវប្រវែង ២,០០០ម៉ែត្រ ស្ថិតនៅភូមិព្រែកឬស្សី ឃុំព្រែកឬស្សី និងភូមិសំបូរ ស្រុកល្វាឯម ខេត្តកណ្ដាល។

-គម្រោងទី២៖ ការងារស្ថាបនាផ្លូលក្រាលបេតុងចំនួន ៣ខ្សែ ប្រវែងសរុប ១,៦១៣ម៉ែត្រ នៅភូមិស៊ីធរកើត ឃុំស៊ីធរ ភូមិសេដា ឃុំវិហារសួគ៌ និងភូមិដុល ឃុំសន្លុង ស្រុកខ្សាច់កណ្ដាល ខេត្តកណ្ដាល ។

-គម្រោងទី៣៖ ការងារស្ថាបនាផ្លូវក្រាលល្បាយថ្មភ្នំ ១ខ្សែ ប្រវែង ៤,៣២០ម៉ែត្រ ទទឹង ៨ម៉ែត្រ កម្រាស់ ០.២ម៉ែត្រ និងស្ពានបេតុង ១កន្លែង ប្រវែង ១៥ម៉ែត្រ ទទឹង ៨ម៉ែត្រ ស្ថាបនាលូដោះទឹកគ្រប់ប្រភេទ ចំនួន ១៣កន្លែង និងផ្លាកឈ្មោះផ្លូវចំនួន ២កន្លែង ស្ថិតនៅភូមិតាគាត់កើត ទៅភូមិជ្រៃលាស់ ឃុំជ័យធំ ស្រុកខ្សាច់កណ្ដាល ខេត្តកណ្ដាល៕

ដោយ៖ មឿន ឌីណា (Moeun Dyna)