ភ្នំពេញ៖ មជ្ឈមណ្ឌលសកម្មភាពកំចាត់មីនកម្ពុជា (CMAC) បានប្រកាសនៅថ្ងៃទី១៦ ខែកុម្ភៈ ឆ្នាំ២០២២ថា ខេត្តកណ្តាល និងខេត្តកែប ព្រមទាំងរាជធានីភ្នំពេញ ជាខេត្ត/រាជធានី អស់តំបន់រងការគំរាមកំហែងដោយសារគ្រាប់មីនប្រឆាំងមុនគេនៅក្នុងព្រះរាជាណាចក្រកម្ពុជា។
អង្គភាព CMAC បានបញ្ជាក់ថា អង្គភាពរបស់ខ្លួន បានបញ្ចប់កិច្ចប្រតិបតិ្តការរំដោះផ្ទៃដីរងផលប៉ះពាល់ដោយគ្រាប់មីនប្រឆាំងមនុស្ស ដែលបានដឹង និងមានកំណត់ត្រាពហុកោណក្នុងទិន្នន័យថ្នាក់ជាតិ (Landmines known areas with polygon records in National Database) ស្ថិតក្នុងខេត្តកែប ខេត្តកណ្តាល និងរាជធានីភ្នំពេញ បានសម្រេចជាស្ថាពរហើយ។
អង្គភាព CMAC បានបន្តឱ្យដឹងថា ក្នុងនោះ ខេត្តកណ្តាល មានចំនួន ៣ពហុកោណ (ចម្ការមីន) មានផ្ទៃដីចំនួន ៦៤ហិកតា ខេត្តកែប មានចំនួន ៨ពហុកោណ ស្មើនឹង ៦៩.៨ហិកតា និងរាជធានីភ្នំពេញមានចំនួន ៨ពហុកោណ ស្មើនឹង ៩៨៣ហិកតា។ សម្រាប់ទិសដៅបន្ត គឺអង្គភាព CMAC បានចល័តកម្លាំងចូលទៅខេត្តព្រះសីហនុ ខេត្តកំពត ខេត្តកំពង់ចាម និងខេត្តតាកែវ ដែលជាគោលដៅអាទិភាពក្នុងការបញ្ចប់បញ្ហាគ្រាប់មីនប្រឆាំងមនុស្ស ក្នុងឆ្នាំ២០២២នេះ។
ការប្រកាសថា ខេត្តគ្មានតំបន់គំរាមកំហែងដោយសារគ្រាប់មីនប្រឆាំងមនុស្ស ឬហៅថា «ខេត្តគ្មានគ្រាប់មីនប្រឆាំងមនុស្ស» វាមិនមានន័យថា «ខេត្តទាំងនោះអស់បញ្ហា ជាមួយសំណល់យុទ្ធភណ្ឌសង្គ្រាមនោះទេ» ។ ការពិតអាចបន្តមានបញ្ហាសំណល់យុទ្ធភណ្ឌមិនទាន់ផ្ទុះពីសង្គ្រាមដទៃទៀត ដូចជាគ្រាប់បែកចង្កោម គ្រាប់បែកទម្លាក់ពីយន្តហោះ និងសំណល់គ្រាប់មិនទាន់ផ្ទុះផេ្សងៗ ក្រៅពីគ្រាប់មីនប្រឆាំងមនុស្ស។ បើតាមការបញ្ជាក់របស់ អង្គភាព CMAC។
អង្គភាព CMAC បានលើកឡើងថា បញ្ហាគ្រាប់មីនប្រឆាំងមនុស្ស ស្ថិតនៅក្រោមអនុសញ្ញាអន្តរជាតិអូតាវ៉ា ដែលមាន ១៦៤ប្រទេស គឺជាសមាជិកហត្ថលេខី។ ក្នុងចំនួននេះ មានប្រទេស ១៣៣ ជារដ្ឋសមាជិក ដោយបូករួមទាំងព្រះរាជាណាចក្រកម្ពុជាផងដែរ។ រាជរដ្ឋាភិបាលកម្ពុជា ក្នុងនាមជារដ្ឋសមាជិកមួយយ៉ាងសកម្មបានប្តេជ្ញាអនុវត្តអនុសញ្ញានេះយ៉ាងពេញលេញ ដោយអនុម័តផែនការយុទ្ធសាស្ត្រ «កម្ពុជាគ្មានគ្រាប់មីនប្រឆាំងមនុស្ស ត្រឹមឆ្នាំ២០២៥»។
អង្គភាព CMAC បានបន្ថែមថា ដូចនេះគោលដៅសំខាន់គឺតំរង់ទិសសំរេចបញ្ហាគ្រាប់មីនប្រឆាំងមនុស្សមួយនេះឱ្យខានតែបានត្រឹមឆ្នាំ២០២៥។ ដូចដែលបានដឹងមកហើយ ព្រះរាជាណាចក្រកម្ពុជាទទួលរងគ្រោះដោយសារសង្គ្រាមរយ:ពេលយូរនិងទំហំធ្ងន់ធ្ងរបំផុតលើពិភពលោកនេះ ដូចនេះសំណល់យុទ្ធភណ្ឌសង្គ្រាមក៏មានទំហំធំធេងណាស់ដែរ ហេតុនេះមិនអាចដោះស្រាយទិដ្ឋភាពបញ្ហាសំណល់យុទ្ធភណ្ឌសង្គ្រាមគ្រប់ប្រភេទបានត្រឹមឆ្នាំ២០២៥នោះទេ។
ផ្អែកតាមផែនការរបស់រាជរដ្ឋាភិបាល អង្គភាព CMAC បានដាក់ចេញនូវផែនការយុទ្ធសាស្ត្ររយៈពេល ៤ឆ្នាំ (២០២២-២០២៥) ដើម្បីរំដោះផ្ទៃដីរងផលប៉ះពាល់ដោយសារគ្រាប់មីនប្រឆាំងមនុស្ស ដែលបានដឹង និងមានកំណត់ត្រាក្នុងទិន្នន័យថ្នាក់ជាតិចំនួនជាង ៧០០គីឡូម៉ែត្រក្រឡា គឺប្រមាណ ៩០% នៃបញ្ហាគ្រាប់មីនដែលកំពុងនៅសេសសល់។
សូមចៀសវាងមានការយល់ច្រឡំថា «ខេត្តគ្មានគ្រាប់មីន» ជាខេត្តអស់បញ្ហាសំណល់យុទ្ធភណ្ឌសង្គ្រាមដទៃទៀតនោះ! «ខេត្តគ្មានគ្រាប់មីន"» ធាតុពិតខេត្តនោះមិនទាន់អស់បញ្ហាសំណល់យុទ្ធភណ្ឌមិនទាន់ផ្ទុះជាមរតកពីសង្គ្រាមផ្សេងៗទៀតដូចជាគ្រាប់បែកទម្លាក់ពីយន្តហោះ គ្រាប់បែកចង្កោមនិងគ្រប់មិនទាន់ផ្ទុះគ្រប់ប្រភេទនៅឡើយទេ៕
ដោយ៖ មឿន ឌីណា (Moeun Dyna)
