ភ្នំពេញ៖ រយៈពេល១១ខែ ពីខែមករា-វិច្ឆិកា ឆ្នាំ២០២១ មជ្ឈមណ្ឌលសកម្មភាពកំចាត់កម្ពុជា (CMAC) បានបើកកិច្ចប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាម រំដោះផ្ទៃដីចម្ការមីននិងចម្ការគ្រាប់សរុបទំហំ៩១,៩១៩,៩៧២ម៉ែត្រក្រឡា ស្មើនឹងជាង ៩២% នៃផែនការ ដោយរុករកឃើញនិងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទសរុបចំនួន ៨២,១៣៨គ្រាប់។ បើតាមទំព័រហ្វេសប៊ុករបស់ លោក ហេង រតនា អគ្គនាយក CMAC។
ទំព័រហ្វេសប៊ុករបស់ លោក ហេង រតនា បានបន្តឱ្យដឹងថា ក្នុងនោះគ្រាប់មីនប្រឆាំងមនុស្សចំនួន ១៦,១៣៨គ្រាប់ មីនប្រឆាំងរថក្រោះចំនួន ៣២៣គ្រាប់ គ្រាប់បែកទម្លាក់ពីយន្ដហោះ ៣៩គ្រាប់ គ្រាប់បែកចង្កោម ៨,០៩០គ្រាប់ មីនច្នៃចំនួន ១៧គ្រាប់ និងគ្រាប់យុទ្ធភណ្ឌមិនទាន់ផ្ទុះគ្រប់ប្រភេទមានចំនួន ៥៧.៥៣១គ្រាប់។
នៅក្នុងរយៈពេល ១១ខែ ពីខែមករា-វិច្ឆិកា ឆ្នាំ២០២១នេះដែរ អង្គភាពសុីម៉ាក់និងបណ្តាញស្ម័គ្រចិត្តតាមភូមិឃុំស្រុកបានចុះធ្វើការផ្សព្វផ្សាយអប់រំការយល់ដឹងពីគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមដល់ក្រុមគោលដៅបានចំនួនជាង១៦,០០០ លើក ដោយចុះជួបតាមខ្នងផ្ទះមានចំនួនជាង ៦០០,០០០ខ្នងផ្ទះ មានប្រជាពលរដ្ឋចូលរួមសរុបចំនួនជិត១លាននាក់។ បើតាមការបន្តនៅក្នុងទំព័រហ្វេសរបស់ លោក ហេង រតនា។
បើតាមប្រភពខាងលើបានបន្ថែមថា ជាមួយគ្នានេះដែរ ក្រុមការងារក៏បានចុះពិនិត្យទីតាំងគ្រាប់មីននិងយុទ្ធភណ្ឌមិនទាន់ផ្ទុះ ដែលប្រជាពលរដ្ឋបានរាយការណ៍ និងបានកម្ទេចចោលគ្រាប់មីននិងយុទ្ធភណ្ឌមិនទាន់ផ្ទុះគ្រប់ប្រភេទបានចំនួនជិត១៥,៤០០គ្រាប់ ហើយនិងអាវុធធុនស្រាលមួយចំនួនផងដែរ។
បើតាមប្រភពដដែលបានបន្ថែមថា សម្រាប់ផែនការឆ្នាំ២០២២ខាងមុខ អង្គភាព CMAC មានផែនការរំដោះផៃ្ទដីរងការគំរាមកំហែងដោយសារគ្រាប់មីននិងសំណល់យុទ្ធភណ្ឌសង្គ្រាមជាង ១២៥គីឡូម៉ែត្រក្រឡា លើផែនការនេះកម្លាំងអង្គភាព CMAC បានទទួលការគាំទ្រពីគំរោងរបស់រាជរដ្ឋាភិបាល គម្រោងជំនួយរបស់រដ្ឋាភិបាលជប៉ុន។
ជាមួយគ្នា ក៏មានគម្រោងជំនួយតាមរយ:ដេញថ្លៃពី UNDP/អាជ្ញាធរមីន គម្រោងជំនួយរបស់រដ្ឋាភិបាលចិន គម្រោងជំនួយរបស់អង្គការជំនួយប្រជាជនណរ័វេស្ស (NPA ដែលទទួលបានពីរដ្ឋាភិបាលណ័រវេស្សនិងអាមេរិក) គម្រោងជំនួយអង្គការ APOPO របស់រដ្ឋាភិបាលប៊ែលហ្សិក គម្រោងជំនួយរបស់អង្គការ JMAS និងគម្រោងជាមួយអង្គការ MAG សរុបមានចំនួន ២៥គម្រោង នឹងអាចមានលទ្ធភាពពង្រីកបន្ថែមដើម្បីសម្រេចមហិច្ឆតាផែនការឆ្នាំ២០២២ខាងមុខនេះ៕
ដោយ៖ មឿន ឌីណា (Moeun Dyna)
