ព្រះសីហនុ៖ លោក លី រស្មី អនុរដ្ឋលេខាធិការក្រសួងដែនដីនគរូបនីយកម្ម និងសំណង់ និងលោក ជាវ វិជ្ជាក់ អភិបាលរងខេត្តព្រះសីហនុ បានដឹកនាំកិច្ចប្រជុំស្តីពីការចុះពិនិត្យការស្ថាបនាផ្លូវ ៣៤ខ្សែក្នុងក្រុងព្រះសីហនុ នាថ្ងៃទី១៩ ខែតុលា ឆ្នាំ២០២១ ដើម្បីត្រៀមប្រគល់ជូនរដ្ឋបាលខេត្តព្រះសីហនុនាពេលខាងមុខនេះ។ បើតាមទំព័រហ្វេសប៊ុករដ្ឋបាលខេត្តព្រះសីហនុផ្សាយនៅថ្ងៃទី១៩ ខែតុលា ឆ្នាំ២០២១។
លោក លី រស្មី បានមានប្រសាសន៍ បើកកិច្ចប្រជុំពិនិត្យមើលសមិទ្ធិផលដែលក្រុមហ៊ុន និងអង្គភាពនីមួយៗស្ថាបនាតាមនិតិវិធី ដើម្បីត្រៀមរៀបចំការប្រគល់ទទួលនូវសមិទ្ធិផលដែលបានស្ថាបនារួចរាល់ ថាតើយើងត្រូវធ្វើអ្វីខ្លះក្នុងការប្រគល់ទទួល និងផ្ទេរជូនរដ្ឋបាលខេត្តព្រះសីហនុ ជាអ្នកគ្រប់គ្រងបន្ត ក្នុងការធានានិរន្តរភាពក្នុងការថែទាំប្រើប្រាស់បានយូរ។
លោក បានលើកឡើងបន្តថា ម្យ៉ាងទៀតការខិតខំស្ថាបនាផ្លូវរបស់ក្រុមហ៊ុន និងអង្គភាពនីមួយៗបានសហការគ្នា ដោយការទទួលខុសត្រូវ ដែលទទួលបានសមិទ្ធិផលល្អដូចថ្ងៃនេះ ពិសេសការវាយតម្លៃការស្ថាបនា ទោះបីជួបប្រទះការរីករាលដាលនៃបរិបទជំងឺកូវីដ-១៩ យើងនៅតែទទួលខុសត្រូវក្នុងការស្ថាបនាផ្លូវទាំង ៣៤ខ្សែ ក្នុងក្រុងព្រះសីហនុទទួលបានជោគជ័យ ។
លោក អនុរដ្ឋលេខធិការ បានលើកឡើងបន្តទៀតថា យើងត្រូវបង្កើតក្រុមការងារចំនួន ៤ក្រុម ដែលមានក្រុមការងាររបស់រដ្ឋបាលខេត្ត មន្ទីរ អង្គភាពពាក់ព័ន្ធចូលរួម និងក្រុមការងាររបស់គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ក្រុមការងារនីមួយៗមានភារកិច្ចចុះបំពេញភារកិច្ចពិនិត្យកាងារស្ថាបនាផ្លូវទាំង ៣៤ខ្សែក្នុងក្រុងព្រះសីហនុ ដោយផ្តោតសំខាន់មានដូចជា៖
១.កំរាលផ្លូវ, ២.ប្រព័ន្ធលូទឹកភ្លៀង, ៣.លូទឹកកខ្វក់, ៤.ចិញ្ចើមផ្លូវ, ៥.ការងារក្រាលថ្មក្រានីត, ៦.បង្គោលភ្លើងបំភ្លឺផ្លូវសាធារណៈ, ៧.ជញ្ជាំងថ្មនៅតាមបណ្តោយឆ្នេរ, ៨.លូចំហរ, ៩.បេតុងអ៊ុតកៅស៊ូ, ១០.គំនូសចរាចរណ៍, ១១.ការងារដាំដើមឈើលម្អផ្លូវជាដើម។
នៅក្នុងកិច្ចប្រជុំខាងលើ លោក ជាវ វិជ្ជាក់ អភិបាលរងខេត្តព្រះសីហនុ បានថ្លែងអំណរគុណក្រុមហ៊ុន និងអង្គភាពដែលបានសាងសង់ផ្លូវ ៣៤ខ្សែ ក្នុងក្រុងព្រះសីហនុ ស្របតាមបទដ្ឋានលក្ខណបច្ចេកទេស និងបន្តត្រួតពិនិត្យអំពីគុណភាពមុននឹងផ្ទេរមកឱ្យរដ្ឋបាលខេត្តព្រះសីហនុជាគ្រប់គ្រងវិញ។
លោក បញ្ជាក់ថា ព្រោះផ្លូវ ៣៤ខ្សែនេះ ជាអំណោយដ៏ថ្លៃថ្លារបស់សម្តេច តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជូនចំពោះប្រជាពលរដ្ឋខេត្តព្រះសីហនុ ដែលក្រុមហ៊ុន និងអង្គភាព ដែលបានស្ថាបនាបញ្ចប់ទាំងស្រុង។
ក្នុងឱកាសនោះ លោកអភិបាលរងខេត្ត បានសំណូមពរឱ្យក្រុមការងារចុះពិនិត្យវាយតម្លៃនៃការខូចខាត និងចន្លោះខ្វះខាតដែលនៅសេសសល់ ដើម្បីឱ្យក្រុមហ៊ុន និងអង្គភាពទទួលកាស្ថាបនាផ្លូវ ៣៤ខ្សែ ក្នុងក្រុងព្រះសីហនុ ការជួសជុលឱ្យមានគុណភាព ១០០ភាគរយ។
លោក ជាវ វិជ្ជាក់ បានលើកឡើងបន្តថា ម្យ៉ាងវិញទៀតខេត្តព្រះសីហនុ និងត្រូវបើកទទួលភ្ញៀវទេសចរ និងបើកសេដ្ឋកិច្ចសង្គមឡើងវិញនៅចុងឆ្នាំ២០២១ខាងមុខនេះ ខេត្តព្រះសីហនុនឹងត្រូវធ្វើជាម្ចាស់ផ្ទះក្នុងកិច្ចប្រជុំវេទិការអាស៊ាននៅខែមករា ឆ្នាំ២០២២ និងបន្តបើកកិច្ចប្រជុំកំពូលផ្សេងៗទៀតនៅពេលខាងមុខ។
សូមរម្លឹកថា ដើម្បីលើកកម្ពស់សោភណ្ឌភាព និងសម្រួលដល់ការធ្វើចរាចរណ៍នៅក្នុងព្រះសីហនុ ដែលទីគោលដៅទេសចរណ៍ និងសេដ្ឋកិច្ចដ៏សំខាន់របស់កម្ពុជានៅភាគនិរតីនោះ រាជរដ្ឋាភិបាលបានសម្រេចទម្លាក់កញ្ចប់ថវិកាជាតិរហូតដល់ទៅជិត ៣០០លានដុល្លារ សាងសង់ផ្លូវធំតូចសរុបចំនួន ៣៤ខ្សែ មានប្រវែងផ្លូវសរុប ៨២.១៤៥គីឡូម៉ែត្រ។ ផ្លូវទាំង ៣៤ខ្សែ បានចាប់ផ្តើមបើកការដ្ឋានសាងសង់ក្រោមអធិបតីភាព សម្តេចតេជោ ហ៊ុន សែន កាលពីថ្ងៃទី១៦ ខែវិច្ឆិកា ឆ្នាំ២០១៩។
លោក ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ធ្លាប់បានលើកឡើងថា ដើម្បីប្រែក្លាយខេត្តព្រះសីហនុទៅជាប៉ូលសេដ្ឋកិច្ចទី២ របស់ប្រទេសកម្ពុជា ដោយក្នុងក្រុងមានមជ្ឈមណ្ឌលពាណិជ្ជកម្មទំនើបៗ ដែលអាចទាក់ទាញវិស័យទេសចរណ៍ និងក្លាយជាច្រកបង្កើនសេដ្ឋកិច្ចប្រទេស រដ្ឋាភិបាលបានវិនិយោគថវិកា ១០០លានដុល្លារ បន្ថែមទៀត ដើម្បីសាងសង់ផ្លូវ ១១ខ្សែទៀត នៅក្នុងស្រុកព្រៃនប់ និងស្រុកស្ទឹងហាវ បន្ថែមលើគម្រោងផ្លូវ ៣៤ខ្សែខាងលើនេះ។
អ្នកនាំពាក្យរដ្ឋបាលខេត្តព្រះសីហនុលោក ឃាង ភារម្យ បានថ្លែងឱ្យដឹងថា រយៈពេល៤ឆ្នាំចុងក្រោមនេះ គិតចាប់ពីឆ្នាំ២០១៧ ដល់ខែធ្នូ ឆ្នាំ២០២០ ខេត្តព្រះសីហនុមាន សំណង់សរុបបានអនុញ្ញាតឱ្យសាងសង់មានចំនួន ១,៥១៤អគារ មានក្រឡាផ្ទៃសរុប ១៤,៧៣៦,៥៥៩ម៉ែត្រការ៉េ និងទុនវិនិយោគសរុប ៨,០៤៩,៦៩២,៨៣១ដុល្លារ៕
ដោយ៖ ដោយ៖ មឿន ឌីណា (Moeun Dyna)
