សៀមរាប៖ វឌ្ឍនភាព គម្រោងសាងសង់អាកាសយានដ្ឋានអន្តរជាតិសៀមរាបថ្មី បច្ចុប្បន្ន សម្រេចបានប្រមាណ ៤៥ភាគរយហើយ គ្រោងបញ្ចប់សាងសង់នៅចុងឆ្នាំ២០២២ខាងមុខនេះ ខណៈ ប្រឈមខ្វះទឹកស្អាតមិនទាន់ផ្គត់ផ្គង់គ្រប់គ្រាន់។ បើតាមជំនួបពិភាក្សា លើការផ្គត់ផ្គង់បណ្តាញទឹក នៅអាកាសយានដ្ឋានអន្តរជាតិសៀមរាបអង្គរ កាលពីថ្ងៃទី២១ ខែកញ្ញា ឆ្នាំ២០២១។ បើតាមក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបន្តឱ្យដឹងថា ដើម្បីចូលរួមដោះស្រាយបញ្ហាប្រឈមផ្នែកផ្គត់ផ្គង់ទឹកស្អាត នៅអាកាសយានដ្ឋានអន្តរជាតិសៀមរាបថ្មី លោក ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបពិភាក្សាការងារជាមួយ លោក ម៉ៅ ហាវណ្ណាល់ រដ្ឋមន្រ្តីទទួលបន្ទុកអាកាសចរណ៍ស៊ីវិល និងតំណាងក្រុមហ៊ុនវិនិយោគ AIAI នៅទីស្តីការក្រសួង និងតាមប្រព័ន្ធអនឡាញផងដែរ។
បើតាមរបាយការណ៍រួមគ្នា របស់ លោក ម៉ៅ ហាវណ្ណាល់ និងក្រុមហ៊ុនវិនិយោគ AIAI បានបង្ហាញថា ក្នុងន័យដើម្បីចូលរួមការពារប្រាសាទអង្គរវត្ត ក៏ដូចជាប្រាសាទនានានៅជុំវិញខេត្តសៀមរាបដែលជាបេតិកភ័ណ្ឌដ៏មានតម្លៃរបស់ជាតិនិងពិភពលោក។ ក្នុងនោះ អាកាសយានដ្ឋានអន្តរជាតិខេត្តសៀមរាបចាស់ ក៏ត្រូវរាជរដ្ឋាភិបាលសម្រេចឱ្យមានការប្តូរទីតាំង និងតម្រូវឱ្យមានការវិនិយោគនូវព្រលានយន្តហោះថ្មី ឱ្យមានលក្ខណៈឆ្ងាយពីទីរួមខេត្ត និងពីប្រាសាទអង្គរវត្តផងដែរ។
បើតាមរបាយការណ៍រួមគ្នាបានឱ្យដឹងទៀតថា ជាក់ស្តែងបន្ទាប់ពីចុះអនុស្សារណៈយោគយល់គ្នាកាលពីឆ្នាំ២០១៦ រវាងរាជរដ្ឋាភិបាលកម្ពុជា និងភាគីចិនមកពីខេត្តយូណាន ស្តីពីការវិនិយោគអាកាសយានដ្ឋានអន្តរជាតិខេត្តសៀមរាបថ្មីរួចមក ដំណើរការសាងសង់មកដល់បច្ចុប្បន្នបានប្រមាណ ៤៥ភាគរយហើយ គ្រោងសម្រេចរួចរាល់នៅចុងឆ្នាំ២០២២ខាងមុខនេះ។
បើតាមរបាយការណ៍រួមគ្នាដដែល បានបញ្ជាក់ «ប៉ុន្តែចំពោះមុខគឺមានបញ្ហាប្រឈមផ្នែកផ្គត់ផ្គង់ទឹកស្អាតពីព្រោះអាកាសយានដ្ឋានអន្តរជាតិសៀមរាបថ្មីត្រូវបានប្តូរទីតាំងនៅក្នុងស្រុកសូត្រនិគម មានចម្ងាយប្រមាណ ៥០គីឡូម៉ែត្រ ពីក្រុងសៀមរាប និង ៤០គីឡូម៉ែត្រ ពីព្រលានចាស់ ដែលព្រលានថ្មីនេះមានផ្ទៃដីសរុបប្រមាណ ៧០០ហិកតា វិនិយោគជាលក្ខណៈ BOT រយៈពេល ៥៥ឆ្នាំ»។
បន្ទាប់ពីស្តាប់របាយការណ៍ពី លោក ម៉ៅ ហាវណ្ណាល់ និងបទបង្ហាញពីតំណាងក្រុមហ៊ុន AIAI វិនិយោគព្រលានយន្តហោះថ្មីសៀមរាប ដូចរៀបរាប់ខាងលើរួចមក លោក ចម ប្រសិទ្ធ បានថ្លែងថា ទោះបីកាលពីចុះអនុស្សារណៈយោគយល់គ្នាតំណាងក្រសួងរបស់ខ្ញុំមិនបានចូលរួមក៏ដោយ តែពេលនេះខ្ញុំនឹងខិតខំដោះស្រាយជូន ក្នុងជម្រើសមួយដើម្បីយកទៅពិចារណា។
លោក រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងបន្តថា គឺលទ្ធភាពល្អតែមួយគត់ ដោយក្រុមហ៊ុនត្រូវវិនិយោគលើការតបណ្តាញចែកចាយទឹករបស់រដ្ឋាករទឹកស្វយ័តខេត្តសៀមរាបពីព្រំប្រទល់ នៃទីក្រុងសៀមរាបទៅដល់ព្រលានថ្មីប្រមាណជិត ២៥គីឡូម៉ែត្រ ដោយប្រើបំពង់ទុយោពីដើមទីទំហំ ៦០០មីលីម៉ែត្រ រួមជាមួយការសាងសង់អាងស្តុក និងស្ថានីយ៍ចែកចាយបន្ត ដើម្បីឱ្យការងារនេះដើរទាន់នឹងការដ្ឋានសាងសង់។
លោក ចម ប្រសិទ្ធ បានថ្លែងបន្តទៀតថា ក្នុងនោះទឹកប្រាក់ចំណាយប្រមាណ ១២ ទៅ១៣លានដុល្លារ។ ការចំណាយនេះគឺយើងគិតការផ្គត់ផ្គង់ក្នុងមួយថ្ងៃ ៥ពាន់ម៉ែតគូប ទៅ១ម៉ឺនម៉ែត្រគូប លើសពីគម្រោងរបស់ក្រុមហ៊ុនសុំតែ ២ពាន់ម៉ែត្រគូប។ លោក បានគិតថាមិនគ្រប់គ្រាន់ទេ បើមើលពីគម្រោងវិនិយោគរបស់ក្រុមហ៊ុន មានទឹកប្រាក់ហូតដល់ ១៥០០លានដុល្លារឯណោះ ដោយរួមបញ្ចូលទាំងមូលដ្ឋានអាជីវកម្ម រោងចក្រសហគ្រាស និងហេដ្ឋារចនាសម្ព័ន្ធផ្សេងៗទៀត។
ក្នុងឱកាសនោះ តំណាងក្រុមហ៊ុនចិន បានថ្លែងអំណរគុណចំពោះអនុសាសន៍ណែនាំនិងកិច្ចសហការជួយគាំទ្រយ៉ាងល្អរបស់ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ ហើយនឹងពាំនាំព័ត៌មាននេះជូនទៅថ្នាក់លើរបស់ខ្លួន ដើម្បីពិចារណានិងសម្រេច៕
ដោយ៖ មឿន ឌីណា (Moeun Dyna)
