ភ្នំពេញ៖ កម្ពុជា បាននាំចេញទៅកាន់ប្រទេសជប៉ុន ក្នុងទំហំទឹកប្រាក់ប្រមាណ ៥៩៧លានដុល្លារ កើនឡើង ០.៩៥ភាគរយ ខណៈការនាំចូលពីជប៉ុន ក្នុងទឹកប្រាក់ប្រមាណ ៣៤៨លានដុល្លារ។ បើតាមរបាយការណ៍ របស់ក្រសួងពាណិជ្ជកម្មកម្ពុជា បានឱ្យបន្តដឹងថា ទំហំពាណិជ្ជកម្ម រវាងប្រទេសទាំងពីរ ក្នុងរយៈពេល ៧ខែ ឆ្នាំ២០២១ សម្រេចបានសរុបប្រមាណ ៩៤៥លានដុល្លារ ធ្លាក់ចុះ ២.៧៣ភគរយ បើប្រៀបធៀបនឹងរយៈពេលដូចគ្នា នៅឆ្នាំ២០២០ មានចំនួន ៩៧២លានដុល្លារ។

នៅក្នុងរបាយការណ៍របស់ក្រសួងពាណិជ្ជកម្មបានបន្តឱ្យដឹងទៀតថា ទំនិញដែលត្រូវបាននាំចេញពីកម្ពុជា ទៅជប៉ុនរួមមាន៖ វាយណ្ឌភាព ស្បែកជើង ស្បៀងអាហារ និងគ្រឿងអេឡិចត្រូនិក ជាដើម ។ល។ ចំណែកឯជប៉ុន នាំចូលមកកម្ពុជា រួមមាន៖ ស្បៀងអាហារ ទំនិញឧស្សហកម្ម ផលិតផលពេទ្យ គ្រឿងម៉ាស៊ីន ឡាន និងគ្រឿងអេឡិចត្រូនិក ជាដើម ។ល។

បច្ចុប្បន្ននេះទោះជានៅក្នុងតំណាក់កាល ប្រឈមនឹងវិបត្តិកូវីដ១៩ក្តី ក៏ចរន្តពាណិជ្ជកម្មរវាងកម្ពុជា-ជប៉ុន នៅប្រព្រឹត្តទៅជាធម្មតា។ បើតាមការថ្លែងរបស់​ លោក ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម។

សូមបញ្ជាក់ថា នៅក្នុងឆ្នាំ២០២០ កម្ពុជា បាននាំចេញទៅកាន់ប្រទេសជប៉ុន ក្នុងទំហំទឹកប្រាក់ជាង ១ពាន់លានដុល្លារ ខណៈ ការនាំចូលពីជប៉ុន ចូលមកប្រទេសកម្ពុជាវិញ ក្នុងទំហំទឹកប្រាក់ជាង ៦៣៧លានដុល្លារ។

គិតត្រឹមខែកក្កដា ឆ្នាំ២០២១នេះ ក្រុមប្រឹក្សាអភិវឌ្ឍន៍កម្ពុជា បានសម្រេចអនុញ្ញាតឱ្យក្រុមហ៊ុនជប៉ុន វិនិយោគសរុបចំនួន២១១គម្រោង ក្រោមទុនវិនិយោគសរុប ៣,១៤០លានដុល្លារ៕

ដោយ៖ មឿន ឌីណា (Moeun Dyna)