សៀមរាប៖ មន្រ្តីជំនាញក្រសួងបរិស្ថាន និងអភិបាលរងខេត្តសៀមរាប ហើយនិងអាជ្ញាធរជាតិអប្សរា បានចុះពិនិត្យទីតាំងស្នើសុំវិនិយោគលើគម្រោងអភិវឌ្ឍន៍ទេសចរណ៍ធម្មជាតិខ្នាតតូច ស្ថិតក្នុងឧទ្យានជាតិព្រះជ័យវរ្ម័ន-នរោត្តម «ភ្នំគូលែន» របស់ក្រុមហ៊ុនឯកជនក្នុងស្រុក ដែលមាន ៥គម្រោង លើផ្ទៃដី ៥០ហិកតា កាលពីថ្ងៃទី២ ខែកញ្ញា ឆ្នាំ២០២១។ បើតាមរដ្ឋបាលខេត្តសៀមរាប។
រដ្ឋបាលខេត្តសៀមរាប បានបន្តឱ្យដឹងបន្តថា ក្រោយពីបានចុះពិនិត្យទីតាំងស្នើសុំវិនិយោគ លើគម្រោងអភិវឌ្ឍន៍ ទេសចរណ៍ធម្មជាតិខ្នាតតូច (ទំហំដីមិនលើសពី ១០ហិកតា ក្នុងមួយគម្រោង) ស្ថិតនៅភូមិតាពេញ និងភូមិខ្នងភ្នំ ឃុំខ្នងភ្នំ ស្រុកស្វាយលើ និងភូមិបុស្សធំ ឃុំខ្នារពោធិ៍ ស្រុកសូទ្រនិគម ខេត្តសៀមរាប និងបានប្រជុំពិភាក្សាលើករណីស្នើសុំវិនិយោគលើគម្រោងអភិវឌ្ឍន៍ ជាលទ្ធផល ក្រុមការងារបានគាំទ្រចំពោះគម្រោងអភិវឌ្ឍន៍ខាងលើ។
បើតាមរដ្ឋបាលខេត្ត បានបញ្ជាក់ថា «ប៉ុន្តែក្រុមការងារបច្ចេកទេសរបស់ក្រសួងបរិស្ថាន និងអាជ្ញាធរជាតិអប្សរា នឹងសិក្សាលម្អិតបន្ថែមទៀតអំពីផលប៉ះពាល់លើបុរាណវិទ្យា និងអេកូឡូស៊ី មុននឹងដាក់ស្នើសុំការពិនិត្យសម្រេចពី រដ្ឋមន្ត្រីក្រសួងបរិស្ថាន លោក សាយ សំអាល់»៕
ដោយ៖ មឿន ឌីណា (Moeun Dyna)
