ភ្នំពេញ៖ គម្រោងសាងសង់ស្ពានក្រចេះ-កំពង់ធំ ដែលជាគម្រោងស្ពានដ៏សំខាន់ ត្រូវបានចរចារចប់សព្វគ្រប់ និងបានចុះហត្ថលេខាលើកិច្ចព្រមព្រៀងសាងសង់ស្ពានរួចហើយដែរ ប៉ុន្តែនៅរង់ចាំក្រសួងសេដ្ឋកិច្ច និងហិរញ្ញវត្ថុ ចុះហត្ថលេខាលើប្រាក់កម្ចី។ បើតាមការថ្លែងឱ្យដឹងពី រដ្ឋមន្រ្តីក្រសួងសាធារណការ និងដឹកញ្ជូន លោក ស៊ុន ចាន់ថុល បញ្ជាក់ថា «គម្រោងស្ពាននេះអាចបើកការដ្ឋានសាងសង់នៅចុងឆ្នាំនេះ ឬដើមខែមករា ឆ្នាំ២០២២ បន្ទាប់ពីបានចុះហត្ថលេខាលើប្រាក់កម្ចីរួច»។
យោងមការសិក្សារបស់ក្រសួង ស្ពានមួយខ្សែនេះ មានប្រវែង ១,៧៦១ម៉ែត្រ ក្រោមថវិកាកម្ចីសម្បទានពីរដ្ឋាភិបាលចិន ប្រើប្រាស់រយៈពេលសាងសង់ចន្លោះពី ២ ទៅ៣ឆ្នាំ។ ចំពោះទីកន្លែងចំណុចសាងសង់ស្ពាននេះ គឺមិនទាន់ច្បាស់ការនៅឡើយទេ ប៉ុន្តែប្រហែលជាអាចនឹងធ្វើពីចន្លោះកោះទ្រុង និងកោះឆាង បើមើលតាមផែនទី។ តែទីតាំងជាក់លាក់ ធ្លាប់ត្រូវបាន លោក ស៊ុន ចាន់ថុល បញ្ជាក់ថា អាចនឹងត្រូវសាងសង់ឆ្ងាយពីទីក្រុងបន្តិច ដើម្បីអាចឱ្យខេត្តក្រចេះមានឱកាសពង្រីកខ្លួនបន្ថែមទៀតនាពេលអនាគត។
នៅក្នុងពិធីសម្ពោធសាកលវិទ្យាល័យក្រចេះ នៅក្នុងខេត្តក្រចេះ កាលពីខែមេសា ឆ្នាំ២០១៨ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាស ពីគម្រោងសាងសង់ស្ពានឆ្លងកាត់ទន្លេមេគង្គក្នុងខេត្តនេះ ដើម្បីបង្កើតភាពងាយស្រួលដល់ទំនាក់ទំនងរវាងអ្នកនៅខេត្តក្រចេះ ជាមួយអ្នកខេត្តកំពង់ធំ និងសៀមរាប។ សម្តេច បានថ្លែងបន្តថា ប្រសិនបើធ្វើដំណើរឆ្លងកាត់ស្ពាននេះពីខេត្តក្រចេះ ទៅកាន់ខេត្តកំពង់ធំ គឺមានចម្ងាយតែ ១២៩គីឡូម៉ែត្រតែប៉ុណ្ណោះ។
នៅក្នុងកម្មវិធី MPWT LIVE SHOW ក្រោមប្រធានបទ «សមិទ្ធផលហេដ្ឋារចនាសម្ព័ន្ធផ្លូវថ្នល់ចាប់ពីចុងឆ្នាំ២០១៨ ដល់ពេលបច្ចុប្បន្ន និងផែនការកំពុងបន្តរហូតដល់ឆ្នាំ២០២៣» កាលពីថ្ងៃទី៣០ ខែសីហា ឆ្នាំ២០២១ លោក ស៊ុន ចាន់ថុល បានថ្លែងបញ្ជាក់ថា គម្រោងសាងសង់ស្ពានក្រចេះ-កំពង់ធំ ដែលជា គម្រោងស្ពានដ៏សំខាន់មួយដែលអាចឱ្យបងប្អូនប្រជាពលរដ្ឋអាចធ្វើដំណើរត្រង់ពីខេត្តក្រចេះទៅខេត្តកំពង់ធំ និងចំណេញពេលវេលាក្នុងការធ្វើដំណើរ។
នៅក្នុងកម្មវិធីខាងលើ លោក រដ្ឋមន្រ្តី ក៏បានលើកឡើងផងដែរអំពីការត្រៀមបើកការដ្ឋានគម្រោងពង្រីក និងលើកកម្ពស់ គុណភាពពីផ្លូវកៅស៊ូពីរស្រទាប់ស្តើង DBST ទៅជាផ្លូវបេតុងកៅស៊ូ(AC) ក្នុងនោះរួមមាន៖ ផ្លូវជាតិលេខ៤១ តភ្ជាប់ផ្លូវជាតិលេខ៤ និងតភ្ជាប់ផ្លូវជាតិលេខ៣ ផ្លូវជាតិលេខ៣១ ពីបែកគុស ទៅស្រុកកំពង់ត្រាច ផ្លូវជាតិលេខ៣៣ ពីកែបមកកំពង់ត្រាច ដើម្បីអភិវឌ្ឍតំបន់ឆ្នេរ ជាពិសេសខេត្តព្រះសីហនុ ដែលនឹងក្លាយជាតំបន់សេដ្ឋកិច្ចពិសេសយ៉ាងសំខាន់ផងដែរ។
ឆ្លើយតបទៅកាន់សំណួរប្រជាពលរដ្ឋ ដែលបានលើកឡើងនៅក្នុងកម្មវិធី MPWT LIVE SHOW លោក ស៊ុន ចាន់ថុល បានគូសបញ្ជាក់អំពីគម្រោងសាងសង់ដែលក្រសួងសម្រេចបាន គម្រោងសាងសង់កំពុងបន្ត និងគម្រោងត្រៀមនឹងអនុវត្ត ទាក់ទងនឹងការអភិវឌ្ឍហេដ្ឋារចនាសម្ព័ន្ធរូបវន្តនានានៅកម្ពុជា ដែលក្នុងនោះរួមមាន៖ បណ្តាញផ្លូវជាតិសំខាន់ៗ ផ្លូវល្បឿនលឿន និងស្ពានជាដើម៕
ដោយ៖ មឿន ឌីណា (Moeun Dyna)
