ភ្នំពេញ៖ គិតត្រឹមដំណាច់ឆមាសទី១ ឆ្នាំ២០២១ អត្រាស្នាក់នៅ និងតម្លៃជួលរបស់អាផាតមិននៅក្នុងរាជធានីភ្នំពេញដែលភាគច្រើនពឹងផ្អែកលើជនបរទេសនោះ បានធ្លាក់ចុះជាបន្តបន្ទាប់ ដោយសារជំងឺកូវីដ-១៩ បានអូសបន្លាយ មកដល់បច្ចុប្បន្ន។ បើតាមរបាយការណ៍របស់ក្រុមហ៊ុនអចលនទ្រព្យ CBRE Cambodia ដែលបានស្រាវជ្រាវ។
នៅក្នុងរបាយការណ៍ខាងលើបានបន្តឱ្យដឹងថា នៅរាជធានីភ្នំពេញមាន អគារអាផាតមិនកម្រិត A និង B សរុបចំនួន ៥៤ គម្រោង ស្មើនឹងបន្ទប់ស្នាក់នៅសរុប ៣,២០០យូនីត ក្នុងនោះ ខណ្ឌបឹងកេងកងមានប្រមាណ ៤៨ភាគរយ ខណ្ឌចំការមន ២៧ភាគរយ ខណ្ឌដូនពេញ ១៧ភាគរយ ខណ្ឌជ្រោយចង្វារ ៥ភាគរយ និងខណ្ឌទួលគោក ៣ភាគរយ។
អាផាតមិនកម្រិត A មានតម្លៃជួលជាមធ្យមជាង ២១ដុល្លារ ក្នុងមួយម៉ែត្រការ៉េ សម្រាប់រយៈពេល ១ខែ បានថយចុះ ៥,២ភាគរយ ពីចំនួនជិត ២៣ដុល្លារ កាលពីឆមាសទី២ ឆ្នាំ២០២០ និងកម្រិត B មានតម្លៃ ១៥ដុល្លារ ថយចុះមក ៦,៧ភាគរយ ពីចំនួន ១៦ដុល្លារ។ បើតាមការបន្តនៅក្នុងរបាយការណ៍ដដែល បានបញ្ជាក់ឱ្យដឹងថា «ដោយសារតែទីផ្សារអាផាតមិនពឹងផ្អែកលើជនបរទេស ដូច្នេះ ការរឹតត្បឹតការធ្វើដំណើរឆ្លងប្រទេសបានជះឥទ្ធិពលយ៉ាងខ្លាំងដល់ទីផ្សារមួយនេះ ដោយអត្រាស្នាក់នៅជារួមសម្រាប់អាផាតមិនកម្រិត A និង B ក្នុងឆមាសទី១ មានប្រមាណ ៥០ភាគរយ ធ្លាក់ចុះ ប្រមាណ ៦០ភាគរយ កាលពីឆ្នាំ២០២០»។
ទីផ្សារអាផាតមិន នៅរាជធានីភ្នំពេញ ទទួលរងឥទ្ធិពលដោយផ្ទាល់ពីការឆ្លងរាលដាលជំងឺកូវីដ-១៩ តាំងពីដើមឆ្នាំ ២០២០មក អតិថិជនជួលភាគច្រើនជាជនបរទេស បានធ្វើដំណើរត្រឡប់ទៅប្រទេសពួកគេវិញ និងភាគច្រើនមិនទាន់វិលត្រឡប់មកភ្នំពេញវិញនៅឡើយទេ។ បើតាមការលើកឡើងរបស់ អ្នកនាង គឹម គិនកេសា អ្នកគ្រប់គ្រងជាន់ខ្ពស់ CBRE Cambodia បានបញ្ជាក់ «កត្តានេះបានធ្វើឱ្យអត្រាជួល និងតម្លៃជួលធ្លាក់ចុះ»។
ដោយសារស្ថានភាពការឆ្លងរាលដាលកូវីដ-១៩ អាចនឹងបន្តអូសបន្លាយពេលយូរទៅមុខទៀតនោះ ដូច្នេះសម្ពាធទីផ្សារនឹងកើតមានមួយកម្រិតទៀតពិសេសនៅចុងឆ្នាំ២០២១ និងដើមឆ្នាំ២០២២។ បើតាមការលើកឡើងបន្តរបស់ អ្នកនាង គឹម គិនកេសា បានបន្ថែមថា ទីផ្សារអាផាតមិន និងខុនដូមានទំនាក់ទំនងនឹងគ្នាខ្លាំង តាមការរំពឹងទុកនៅចុងឆ្នាំនេះ និងដើមឆ្នាំក្រោយ នឹងមានគម្រោងសាងសង់ខុនដូមួយចំនួនទៀតបញ្ចប់ការសាងសង់ ដូច្នេះ សម្ពាធទីផ្សារអាផាតមិននឹងកើនឡើងមួយកម្រិតទៀត៕
ប្រភព៖ ភ្នំពេញប៉ុស្តិ៍
ដោយ៖ មឿន ឌីណា (Moeun Dyna)
