ភ្នំពេញ៖ ទំហំពាណិជ្ជកម្មទ្វេភាគីរវាង កម្ពុជា-អាមេរិក មានតម្លៃជាង ២ ៦៥៤លានដុល្លារ កើនជិត ២៥ភាគរយ ក្នុងរយៈពេល ៤ខែដើម ឆ្នាំ២០២១ ធៀបទៅនឹងរយៈពេលដូចគ្នានៅឆ្នាំ២០២០។ តាមការិយាល័យពាណិជ្ជកម្មអាមេរិក បានបញ្ជាក់ថា «ទោះវិបត្តិនៃការឆ្លងរាលដាលកូវីដ-១៩ បានធ្វើឱ្យការផ្លាស់ប្តូរពាណិជ្ជកម្មជាអន្តរជាតិភាគច្រើនធ្លាក់ចុះ តែពាណិជ្ជកម្ម កម្ពុជា-អាមេរិក មិនធ្លាក់ចុះទេ»។
ពាណិជ្ជកម្មកម្ពុជា-អាមេរិក មានតម្លៃសរុប ២ ៦៥៤,៩លានដុល្លារ កើន ២៤,៤៨ភាគរយ ធៀបទៅនឹងរយៈពេលដូចគ្នាឆ្នាំ២០២០ ដែលមាន ២ ១៣២,៧លានដុល្លារ។ បើតាមទិន្នន័យ ចាប់ពីខែមករា ដល់ខែមេសា ឆ្នាំ២០២១ បានបន្តឱ្យដឹងថា ក្នុងនោះការនាំចេញរបស់កម្ពុជាមានតម្លៃ ២ ៥១៩,២លានដុល្លារ កើន ២៤,៤៣ភាគរយ ហើយការនាំចូលពីអាមេរិក ១៣៥,៧លានដុល្លារ កើន ២៥,៥៣ភាគរយ។
ក្រៅពីការទទួលបាននូវភាពអនុគ្រោះពន្ធ GSP ពីអាមេរិក បច្ចុប្បន្ន កម្ពុជា ក៏កំពុងទទួលបានចំណែកទីផ្សារអាមេរិកពីជម្លោះពាណិជ្ជកម្មរវាងអាមេរិក-ចិន ព្រមទាំងពីអស្ថិរភាពនយោបាយប្រទេសក្នុងតំបន់ (មីយ៉ាន់ម៉ា) ផងដែរ។ បើតាមការលើកឡើងរបស់ អនុប្រធានសភាពាណិជ្ជកម្មកម្ពុជា លោក លឹម ហេង បានអះអាងថា ទំហំពាណិជ្ជកម្មប្រទេសទាំង២ នឹងកើនឡើងទៀត បើកម្ពុជានៅតែបន្តទទួលបានប្រព័ន្ធអនុគ្រោះពន្ធ GSP ពីអាមេរិក។
សូមរម្លឹកថា នៅឆ្នាំ២០២០ ទំហំពាណិជ្ជកម្មរវាងកម្ពុជា និងអាមេរិកមានតម្លៃ ៦ ៩២១,៣ លានដុល្លារ កើន ១៧,៨៩ ភាគរយ បើធៀបឆ្នាំទៅនឹង ឆ្នាំ២០១៩៕
ប្រភព៖ គេហទំព័រកាសែតភ្នំពេញប៉ុស្តិ៍
ដោយ៖ Moeun Dyna
