ព្រះសីហនុ៖ រដ្ឋបាលខេត្តព្រះសីហនុ ប្រកាសមិនទទួលស្គាល់ឯកសារសម្គាល់កម្មសិទ្ធិ ទីតាំងដីស្ថិតនៅសង្កាត់កោះរ៉ុង និងសង្កាត់ក៉រ៉ុងសន្លឹមដីចំនួន ៥៨៤ក្បាលដី ប្រភេទដីកោះដែលជាទ្រព្យសម្បត្តិសាធារណៈរបស់រដ្ឋ ត្រូវបានរាជរដ្ឋាភិបាលសម្រេចធ្វើអនុបយោគពីដីសាធារណៈ របស់រដ្ឋមកជាដីឯកជនរបស់រដ្ឋតាមអនុក្រឹត្យលេខ ០៥អនក្រ.បក ចុះថ្ងៃទី២១ ខែមករា ឆ្នាំ២០០៨ ដើម្បីអភិវឌ្ឍន៍ក្រោមលក្ខខណ្ឌជួលវិនិយោគ។ បើតាមការជូនដំណឹងរបស់ រដ្ឋបាលខេត្តព្រះសីហនុ។
រដ្ឋបាលខេត្តបានបន្តថា នៅថ្ងៃទី៤ ខែមេសា ឆ្នាំ២០១៨ រាជរដ្ឋាភិបាលបានចេញអនុក្រឹត្យលេខ ៤៨អនក្រ.បក សម្រេចកាត់ដីទំហំ ៥២៨,៣៧ហិកតា នៅទីតាំងខាងលើ ក្រុងព្រះសីហនុ (បច្ចុប្បន្នក្រុងកោះរ៉ុង) ចេញពីដីឯកជនរបស់រដ្ឋកំណត់ដោយអនុក្រឹត្យលេខ ០៥អនក្រ.បក ចុះថ្ងៃទី២១ ខែមករា ឆ្នាំ២០០៨ ដើម្បីប្រទានកម្មជាកម្មសិទ្ធិជូនប្រជាពលរដ្ឋរស់នៅអចិន្ត្រៃយ៍នៅលើកោះរ៉ុងចំនួន ២៩៨គ្រួសារ ស្មើនឹង ៦៣៧ក្បាលដី ស្មើនឹងទំហំ ៥២៨,៣៧ហិកតា។
ចំពោះទីតាំងដីចំនួន ៥៨៤ក្បាលដី ដែលមានទីតាំងខាងលើ គណៈកម្មការរដ្ឋបាល បានសម្រេចមិនផ្តល់ជូនជាកម្មសិទ្ធិ គឺជាឯកសារដែលគ្មានតម្លៃគតិយុត្តសម្រាប់ប្រើប្រាស់ ឬទាមទារសិទ្ធិលើដីធ្លីនៅលើកោះរ៉ុងនោះទេ។ បើតាមការបន្តរបស់រដ្ឋបាលខេត្តព្រះសីហនុ បញ្ជាក់ថា ដោយយោងលើហេតុផលដូចខាងក្រោម៖
១.«ប្រជាពលរដ្ឋមិនមានអាសយដ្ឋានជចិន្ត្រៃយ៍លើកោះ មានចំនួន ៣៦០ក្បាលដី»។ ២.«ទីតាំងដីគ្មានទិន្នន័យមានចំនួន ៧២ក្បាលដី»។ ៣.«ទីតាំងដីមានទំនាស់ចំនួន ១០៧ក្បាលដី ក្នុងនោះ -ប្រជាពលរដ្ឋមានអាសយដ្ឋានលើកោះចំនួន ៤៧ក្បាលដី, -ប្រជាពលករដ្ឋនៅក្រៅកោះចំនួន ៦០ក្បាលដី»។ ៤.ទីតាំងដីពាក់ព័ន្ធនឹងគម្រោងព្រលានយន្តហោះចំនួន ៤៥ក្បាលដី ក្នុងនោះ -ប្រជាពលរដ្ឋមានអាសយដ្ឋានលើកោះចំនួន ៤៥ក្បាលដី, -ប្រជាពលករដ្ឋនៅក្រៅកោះចំនួន ៩ក្បាលដី។
បើតាមរដ្ឋបាលដដែលបានបញ្ជាក់ទៀតថា រាលឯកសារពាក់ព័ន្ធទាំងឡាយរួមមាន ឯកសារសម្គាល់លេខក្បាលដី(ចុងសន្លឹក) លិខិតផ្ទេរសិទ្ធិកាន់កាប់ប្រើប្រាស់ដីធ្លី ពាក្យស្នើសុំកាន់កាប់ប្រើប្រាស់ដីធ្លី កិច្ចសន្យាទិញ-លក់ មានប្រថាប់ត្រាអាជ្ញាធេសង្កាត់ ឬមេធាវី ឬកិច្ចសន្យាផ្ទេរសិទិ្ធដីធ្លីឃាលក្ខណៈឯកជន (រវាងគូភាគី) គំនូសបង្ហាញទីតាំង និងឯកសារពាក់ព័ន្ធផ្សេងៗទៀត រួមនឹងក្បាលដីក្នុងប្លង់សយរិយោដីចំនួន ៥៨៤ក្បាលដី សម្រេចមិនផ្តល់ជូនជាកម្មសិទ្ធិ គឺជាឯកសារដែលគ្មានតម្លៃគតិយុត្តសម្រាប់ប្រើប្រាស់ ឬទាមទារសិទ្ធិលើដីធ្លីនៅលើកោះរ៉ុងនោះទេ។
ជាមួយគ្នានេះ រដ្ឋបាលខេត្តព្រះសីហនុ សូមបញ្ជាក់ជំហរយ៉ាងម៉ឺងម៉ាត់ថា នឹងចាត់វិធានការផ្លូវច្បាប់យ៉ាងតឹងរឹងបំផុតដោយមិនលើកលែងចំពោះជន ណាដែលបានប៉ះពាល់កម្មសិទ្ធិនៃទ្រព្យសម្បត្តិរបស់រដ្ឋ ដូចមានក្នុងមាត្រា២៥៩ នៃច្បាប់ភូមិបាល៕
ដោយ៖ Moeun Dyna
