ភ្នំពេញ៖ គម្រោងស្ថាបនាផ្លូវល្បឿនលឿនភ្នំពេញ-ព្រះសីហនុ ដែលមានប្រវែងសរុប ១៩០គីឡីម៉ែត្រ គិតត្រឹម ខែវិច្ឆិកា ឆ្នាំ២០២០ សម្រេចបាន ២៦,៨៦ភាគរយ ដោយប្រឈមជាមួយនឹងវិបត្តិជំងឺសកល ជាហេតុធ្វើឱ្យការស្ថាបនាផ្លូវនេះហាក់នៅយឺតបន្តិច។ បើតាមការថ្លែងឱ្យដឹងពីអ្នកនាំពាក្យរបស់ក្រសួងដឹកជញ្ជូន លោក វ៉ាស៊ីម សូរិយា។
លោក វ៉ាស៊ីម សូរិយា បានថ្លែងបញ្ជាក់ថា «ទោះបីជាមានវិបត្តិជំងឺសកលក្ដី ការស្ថាបនាផ្លូវល្បឿនលឿន ភ្នំពេញ-ព្រះសីហនុ នៅតែដំណើរទៅមុខ ទៅតាមផែនការដែលបានគ្រោង»។ លោក ថា មានក្រុមមន្រ្តីក្រុមហ៊ុន សាងសង់ខ្លះបានផ្អាកការងារទៅតាមផ្នែក ហើយសម្ភារសម្រាប់ដឹកជញ្ជូន ឬធ្វើសកម្មភាពហាក់មិនសូវគគ្រឹកគគ្រេងដូចមុនសម័យជំងឺកូវីដ-១៩ ទេ។
មន្រ្តីជាន់ក្រសួងបានបន្តទៀតថា បើទោះបីយ៉ាងនេះក្ដី ក្រុមសាងសង់បានប្ដេជ្ញាថា នឹងនៅតែបន្តសាងសង់ផ្លូវនេះទៅតាមផែនការដែល់បានគ្រោងទុក។ លោក ថា ដំណើរការសាងសង់ផ្លូវ ល្បឿនលឿននេះកំពុងដើរស្របគ្នាជាមួយនឹងផែនការ ដែលបានកំណត់ទុក ដែលអាចបញ្ចប់ក្នុងឆមាសទី១ ឆ្នាំ២០២២។
សូរម្លឹកថា ផ្លូវល្បឿនលឿនភ្នំពេញ-ព្រះសីហនុ ដែលមានប្រវែងសរុប ១៩០ គីឡូម៉ែត្រ តភ្ជាប់ពីសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដោយឆ្លងកាត់ ខេត្តកណ្តាល ៩,១០គីឡូម៉ែត្រ ខេត្តកំពង់ស្ពឺ ៨០,៨០គីឡូម៉ែត្រ ខេត្តកោះកុង១,៩២គីឡូម៉ែត្រ និងខេត្តព្រះសីហនុ ៨៩,៨៩គីឡូម៉ែត្រ។
ផ្លូវល្បឿនលឿនដំបូងបង្អស់នៅកម្ពុជា និងជាគម្រោងហេដ្ឋារចនាសម្ព័ន្ធដ៏ធំសម្បើមមួយ ដែលចំណាយថវិកាសាងសង់ ១៩០០លានដុល្លារ។ ផ្លូវនេះ ចាប់ផ្តើមសាងសង់ កាលពីថ្ងៃទី២២ ខែមីនា ឆ្នាំ២០១៩ ដោយក្រុមហ៊ុនសាជីវកម្មស្ពាន និងថ្នល់ចិន (CRBC) ហើយគ្រោងនឹងបញ្ចប់នៅត្រឹមខែមីនា ឆ្នាំ២០២៣៕
ដោយ៖ Moeun Dyna
