ភ្នំពេញ៖ ឆ្លើយតបទៅនឹងប្រតិកម្ម និងការត្អូញត្អែរ ពីការខ្វះខាតថាមពលអគ្គិសនីប្រើប្រាស់ប្រចាំថ្ងៃពីសំណាក់ប្រជាពលរដ្ឋ ជាពិសេសអ្នកដែលកំពុងរស់នៅក្នុងតំបន់រាជធានីភ្នំពេញ រួមជាមួយនឹងតំបន់ជិតខាងនោះ នៅព្រឹកថ្ងៃទី១៨ ខែមីនា ឆ្នាំ២០១៩ នេះ អាជ្ញាធរអគ្គិសនីកម្ពុជា បានចេញសេចក្ដីប្រកាសមួយ ដែលបង្ហាញពីការខិតខំរកដំណោះស្រាយ ដោយការរៀបចំផែនការអភិវឌ្ឍប្រភពផ្គត់ផ្គង់អគ្គិសនីបន្ថែម។
នៅក្នុងសេចក្ដីប្រកាសរបស់អាជ្ញាធរអគ្គិសនីកម្ពុជា នៅព្រឹកថ្ងៃទី១៨ មិនានេះថា បញ្ហាខ្វះខាតថាមពលអគ្គិសនី សម្រាប់ផ្គត់ផ្គង់នាពេលបច្ចុប្បន្ននេះ បញ្ហាចម្បងគឺបណ្តាលមកពីកត្តាអាកាសធាតុក្ដៅខ្លាំង និងការខ្វះទឹកខុសប្រក្រតី ធ្វើឱ្យតម្រូវការនៃការប្រើប្រាស់ថាមពលអគ្គិសនីនៅឆ្នាំ២០១៩ មានការកើនឡើងយ៉ាងគំហុកលើសពីការរំពឹងទុក។ ដោយឡែកការខ្វះខាតទឹកនេះ បានធ្វើឱ្យសមត្ថភាពផ្គត់ផ្គង់ថាមពលចេញវារីអគ្គិសនីថយចុះ មិនអាចធានាការផ្គត់ផ្គង់ថាមពលអគ្គិសនី បានពេញលេញទូទាំងប្រទេសដល់ចុងរដូវប្រាំងនោះឡើយ។
ជាដំណោះស្រាយបញ្ហានេះ អគ្គិសនីកម្ពុជាបានទាក់ទងប្រទេសជិតខាងឱ្យជួយបង្កើនការផ្គត់ផ្គង់អគ្គិសនីបន្ថែមដល់កម្ពុជា។ ជាលទ្ធផល ប្រទេសថៃបានជួយបង្កើនការផ្គត់ផ្គង់បន្ថែម ៨០MW ប្រទេសឡាវបន្ថែម ១០WM និងប្រទេសវៀតណាមបានជួយរក្សាការផ្គត់ផ្គង់ឱ្យនៅដដែល ទោះបីជាភាគខាងត្បូង នៃប្រទេសវៀតណាមកំពុងជួបបញ្ហាផ្គត់ផ្គង់អគ្គិសនីដូចគ្នា។
សេចក្តីប្រកាសព៌តមានដដែលបានបន្តថា ទោះបីជាយ៉ាងណាក៏ដោយ កម្ពុជានៅតែខ្វះខាតថាមពលប្រមាណ១៣% ដែលតម្រូវឱ្យអគ្គិសនីកម្ពុជាធ្វើការកាត់បន្ថយការផ្គត់ផ្គង់ខ្លះរហូតរដូវវស្សាចូលមកដល់ ដោយការបន្ថយការផ្គត់ផ្គង់នេះ ត្រូវធ្វើឡើងនៅពេលថ្ងៃ និងតាមកន្លែងឆ្លាស់គ្នា ដើម្បីរក្សាការផ្គត់ផ្គង់ពេលយប់ ដែលជាពេលដែលប្រជាពលរដ្ឋត្រូវការប្រើប្រាស់ជាចាំបាច់ប្រចាំថ្ងៃ។
ជាមួយនឹងការខិតខំស្វះស្វែងរកប្រភពបំពេញបន្ថែម នូវថាមពលអគ្គិសនីនាពេលនេះ អាជ្ញាធរអគ្គិសនីកម្ពុជាកំពុងតែរៀបចំផែនការអភិវឌ្ឍប្រភពអគ្គិសនី រួមមាន វារីអគ្គិសនី រោងចក្រផលិតអគ្គិសនីដើរដោយធ្យូងថ្ម និងប្រភពផ្សេងៗទៀតដែលដើរដោយថាមពលពន្លឺព្រះអាទិត្យជាដើម។ ដូច្នេះទាំងអស់នេះ ជាសេចក្ដីប្រកាសរបស់អគ្គិសនីកម្ពុជាជូនប្រជាជនកម្ពុជា ដែលកំពុងតែជួបភាពលំបាក ក្នុងការប្រើប្រាស់អគ្គិសនីមិនគ្រប់គ្រាន់តាមតម្រូវការ៕
ប្រភព : www.propertyarea.asia
