នាព្រឹកថ្ងៃសុក្រ ១២រោច ខែមិគសិរ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី០៤ ខែមករា ឆ្នាំ២០១៩ រដ្ឋបាលរាជធានីភ្នំពេញបានរៀបចំសន្និសីទសារព័ត៌មាន ស្តីពីការរៀបចំផ្សារបន្លែ​ ផ្លែឈេីបោះដុំ​ និងចំណតរថយន្តនៅតំបន់បឹងតាមោកក៏ដូចជាជូនដំណឹងដល់បងប្អូនប្រជាពលរដ្ឋ ពិសេសអាជីវករលក់ដូរនៅផ្សារដើមគទាំងអស់មេត្តាជ្រាបជៀសវាងមានការភន្ត័ច្រឡំ​។ ​

ក្នុងសន្និសីទសារពត៌មាននេះរដ្ឋបាលរាជធានីភ្នំពេញសូមបញ្ជាក់សារជាថ្មីថា រដ្ឋបាលរាជធានីភ្នំពេញ ពុំមានគម្រោងរុះរើផ្សារដើមគ ឬតម្រូវឱ្យអាជីវករកំពុងលក់ដូរនៅផ្សារដើមគ ធ្វើការផ្លាស់ប្តូរទីតាំងអាជីវកម្មរបស់ខ្លួន ទៅទីតាំងថ្មីណាមួយឡើយ។ ដោយឡែក គម្រោងសាងសង់ផ្សារនៅបឹងតាមោក គឺដើម្បីសាងសង់ជាផ្សារផ្គត់ផ្គង់បន្លែ ផ្លែឈើ និងជាចំណតរថយន្ត ក្នុងន័យបន្ថែមជាទីតាំងផ្សារបោះដុំមួយកន្លែងផ្សេងទៀត ដើម្បីជួយសម្រួលដល់ការប្រកបអាជីវកម្ម ក៏ដូចជាដើម្បីកាត់បន្ថយ និងឈានដល់ការលុបបំបាត់ការរំលោភយកចិញ្ចើមផ្លូវ ទ្រូងផ្លូវសាធារណៈ ដើម្បីធ្វើជាទីតាំងលក់បន្លែផ្លែឈើ ដែលបង្កការកកស្ទះចរាចរណ៍ ប៉ះពាល់ដល់បរិស្ថាន សណ្តាប់ធ្នាប់ និងអនាម័យតាមដងផ្លូវ។ ​

សូមបញ្ជាក់ដែរថា​ រដ្ឋបាលរាជធានីភ្នំពេញ​ធ្វេីការបញ្ជាក់សារជាថ្មីនេះ​ គឺដេីម្បីឆ្លេីយតបទៅនឹង ព័ត៌មានមួយចំនួនបានផ្សព្វផ្សាយថា មានគម្រោងរុះរើផ្សារដើមគ ស្ថិតនៅសង្កាត់ផ្សារដើមគ ខណ្ឌទួលគោក ដើម្បីធ្វើការវិនិយោគជូនវិស័យឯកជនវិញ និងរើបងប្អូនអាជីវករទៅទីតាំងផ្សារថ្មីនៅបឹងតាមោកវិញ​៕

ប្រភព៖រដ្ឋបាលរាជធានីភ្នំពេញ

ប្រភព : www.interior.gov.kh