ភ្នំពេញ៖ ក្រុមហ៊ុន​ធំ​មួយ​បានប្រកាស​គំរោង​វិនិយោគ​ទឹកប្រាក់៩៤,៥លាន​ដុល្លារ​អាមេរិក ដើម្បី​សាងសង់​សណ្ឋាគារ​ប្រណីត កម្រិត​ផ្កាយ៥ នៅ​តំបន់​ជ្រៃ​ធំ​ក្នុង​ឃុំ​សំពៅ​ពូន ស្រុក​កោះធំ ខេត្តកណ្តាល។

យោងតាម​សេចក្តីប្រកាស​ព៌​ត​មាន របស់​ក្រុមប្រឹក្សា​អភិវឌ្ឍន៍​កម្ពុជា (CDC) ដែល​យើង​ទទួលបាន​នា​ព្រឹក​ថ្ងៃទី២៥ ធ្នូ​នេះ​ថា គណកម្មការ​ធិ​ការវិនិយោគ​នៃ​ក្រុមប្រឹក្សា​អភិវឌ្ឍ​កម្ពុជា​បានអនុម័ត​ឲ្យ​ក្រុមហ៊ុន SCORPIO CAMTRIP CO.,LTD គម្រោង​សាងសង់ និង​ធ្វើ​អាជីវកម្ម​សណ្ឋាគារ​ថ្នាក់​ផ្កាយ៥ចំនួន៦០០បន្ទប់ ដែលមាន​ទីតាំង​វិនិយោគ​ស្ថិតនៅ​ភូមិ​លេខ៨ ឃុំ​សំពៅ​លូន ស្រុក​កោះធំ ខេត្តកណ្តាល។

ឃុំ​សំពៅ​ពូន ស្រុក​កោះធំ ខេត្តកណ្តាល ត្រូវបាន​រៀបចំ​រៀបចំ​ប្លង់គោល​ជិត​រួចហើយ ដើម្បី​រៀបចំ​ទីរួមស្រុក​នេះ​មាន​លក្ខណៈពិសេស និង​មាន​បែបផែន​ពិសេស​មួយ​ដែល​ត្រូវបាន​រដ្ឋាភិបាល​បានអនុម័ត​រួចហើយ។

លោក​បណ្ឌិត​វ៉ាន់ វ៉ាត​អនុប្រធាន​មន្ទីរ​រៀបចំ​ដែនដី នគរូបនីយកម្ម​និង​សំណង់​ខេត្តកណ្តាល​បាន​មានប្រសាសន៍​ឲ្យ​ដឹង​នា​ព្រឹក​ថ្ងៃ​ដដែល​នេះ​ថា រដ្ឋាភិបាល​តាមរយៈ​ក្រសួង​រៀបចំ​ដែនដី នគរូបនីយកម្ម​និង​សំណង់​បានអនុម័ត​ដាក់​ឲ្យ​ប្រើប្រាស់​ប្លង់គោល ប្រើប្រាស់​ដី​ទីប្រជុំជន​ជ្រៃ​ធំ ដែល​គ្របដណ្តប់​លើ​ភូមិ​ចំនួន៣ និង​មាន​ប្រជាពលរដ្ឋ​រស់នៅ​ប្រមាណ៧០០០នាក់។

លោក​បន្តថា ការរៀបចំ​ប្លង់គោល​ប្រើប្រាស់​ដី​នេះ ជាការ​ជំរុញ​ការអភិវឌ្ឍ​នៅ​មូលដ្ឋាន​ប្រកបដោយ​និរន្តរភាព និង​ធ្វើយ៉ាងណា​ឲ្យ​ការអភិវឌ្ឍន៍​នៅ​តំបន់​នោះ​មាន​សណ្តាប់ធ្នាប់ និង​របៀបរៀបរយ។

អភិបាលខេត្ត​កណ្តាល លោក​ម៉ៅ ភិ​រុណ​ធ្លាប់បាន​មានប្រសាសន៍​ឲ្យ​ដឹងថា អាជ្ញាធរខេត្ត​បាននិងកំពុង​រៀបចំ​តំបន់​ជ្រៃ​ធំ ជា​តំបន់​ពិ​សេសមួយ​តាមរយៈ​ការរៀបចំ​ហេ​ដ្ឋា​រចនា​ស​ម្ព័​ន្ឋ​នានា​ឲ្យ​មាន​ភាពសមស្រប ដើម្បី​ទាក់ទាញ​ការអភិវឌ្ឍ​ពី​អ្នកវិនិយោគ​ជាតិ និង​អន្តរជាតិ៕

ប្រភព : www.propertyarea.asia