ភ្នំពេញ៖ ប្រទេសចិនបានសម្រេចផ្តល់ហិរញ្ញប្បទាន១៨២២លានយ័ន សម្រាប់អភិវឌ្ឍន៍សេដ្ឋកិច្ច សង្គមកម្ពុជាកាន់តែប្រសើរឡើង។
ឥណទានហិរញ្ញប្បទានសហប្រតិបត្តិការនេះ ត្រូវបានចុះហត្ថកេខាដោយលោកអូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក Deng Boqing អនុប្រធានទីភ្នាក់ងារចិន សម្រាប់កិច្ចសហប្រតិបត្តិការ នៃសាធារណរដ្ឋប្រជាមានិតចិនកាលពីល្ងាចថ្ងៃទី១៣ ធ្នូកន្លងមកនេះ។
យោងតាមសេចក្តីប្រកាសព៌តមាន ដែលបានចែកដល់បណ្តាញសារព៌តនានកាលពីថ្ងៃទី១៣ ធ្នូកន្ងលមកបានឲ្យដឹងថា ក្នុងចំណោមហិរញ្ញប្បទាន១៨២២លានយ័ននោះ មានហិរញ្ញប្បទានឥតសំណងចំនួន១,២០០លានយ័ន សម្រាប់អនុវត្តគម្រោងលើកកម្ពស់ជីវភាពប្រជាជន និងគម្រោងសាងសង់ហេដ្ឋារចនាសម្ព័ន្ធសំខាន់។ ចំណែកឥណទានសម្បទានមានទឹកប្រាក់ចំនួន៦២២លានយ័ន សម្រាប់គម្រោងអភិវឌ្ឍន៍អាងទឹករក្សាក្នុង ខេត្តព្រះវិហារ ។
លោកអូន ព័ន្ឋមុនីរ័ត្នបានថ្លែងថា ពិធីចុះហត្ថលេខានាពេលនេះ សបញ្ជាក់ឲ្យឃើញនូវកិច្ចសហប្រតិបត្តិការល្អ ក្នុងក្របខណ្ឌភាពជាដៃគូ យុទ្ធសាស្ត្រគ្រប់ជ្រុងជ្រោយ កម្ពុជា-ចិន ក្រោមការដឹកនាំប្រកបដោយបញ្ញាញាណ របស់ សម្តេចតេជោ ហ៊ុន សែន នាយករដ្ឋមន្ត្រី ដែលធ្វើឲ្យរដ្ឋាភិបាលនៃប្រទេសទាំងពីរ កម្ពុជា-ចិន បន្តពង្រឹងកិច្ចសហប្រតិបត្តិការលើគ្រប់វិស័យ ក្នុងការជម្រុញធ្វើឲ្យប្រសើរឡើងនូវកំណើនសេដ្ឋកិច្ច និងកំណើនជីវភាពរបស់ប្រជាជននៃប្រទេសទាំងពីរ។
គិតត្រឹមថ្ងៃទី១៣ ខែធ្នូឆ្នាំ២០១៨ ទំហំហិរញ្ញប្បទានសហប្រតិបត្តិការពីរដ្ឋាភិបាលនៃសាធារណរដ្ឋប្រជាមានិតចិន ផ្តល់ជូនកម្ពុជាមានទំហំទឹកប្រាក់ប្រមាណ៥,៨០០លានដុល្លារអាមេរិក ក្នុងនោះ ឥណទានសម្បទាន មានសរុបចំនួនប្រមាណ៤,៤០០លានដុល្លារអាមេរិក និងហិរញ្ញប្បទានក្នុងក្របខណ្ឌនៃកិច្ចសហប្រតិបត្តិការសេដ្ឋកិច្ច និងបច្ចេកទេសចំនួនប្រមាណ១,៤០០លានដុល្លារអាមេរិក៕
ប្រភព : www.propertyarea.asia
