ភ្នំពេញ៖ ចាប់ពីពេលនេះតទៅប្រជាពលរដ្ឋទាំងអស់ អាចធ្វើការរាយការណ៍ដោយផ្ទាល់ពីផ្លូវជង្ហុកសំបុកមាន់ និងផ្លូវខូចទៅកាន់អាជ្ញាធរ ដើម្បីធ្វើការជួសជុលបានទាន់ពេលវេលាតាមរយៈ “កម្មវិធីថែទាំផ្លូវ (ROAD CARE mobile app)” ដែលក្រសួងសាធារណៈការ នឹងដឹកជញ្ជូនដាក់ឲ្យដំណើរការជាផ្លូវការទី១៣ ខែធ្នូ ឆ្នាំ២០១៨នេះ និង ជាកម្មវិធីថ្មីមួយដែលអាចទាញយកដោយឥតគិតថ្លៃ នៅលើ App Store និង Play Store ក្នុងទូរសព្ទដៃ។
លោកទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនបានឲ្យដឹងថា កម្មវិធីថែទាំផ្លូវ (ROAD CARE mobile app) អាចឲ្យប្រជាពលរដ្ឋរាយការណ៍ដោយផ្ទាល់ពីស្ថានភាពជង្ហុកសំបុកមាន់ ឬផ្លូវខូចទៅកាន់អាជ្ញាធរពាក់ព័ន្ធ ដើម្បីធ្វើការជួសជុលបានទាន់ពេលវេលា។
លោកបន្តថា ព័ត៌មានទាំងអស់អំពីជង្ហុកសំបុកមាន់ និងផ្លូវខូច ដែលត្រូវបានរាយការណ៍ដោយប្រជាពលរដ្ឋ តាមរយៈការបង្ហោះជារូបថត និងវីដេអូនៅក្នុងកម្មវិធីថែទាំផ្លូវ នឹងត្រូវបានបញ្ជូន ទៅកាន់ក្រុមការងារទទួលបន្ទុករបស់ក្រសួង មន្ទីរសាធារណការ និងដឹកជញ្ជូនទាំង២៥ និងអាជ្ញាធរពាក់ព័ន្ធដើម្បី ធ្វើការជួសជុល។ កម្មវិធីនេះបង្កើតឡើងក្នុងគោលបំណងដើម្បីពង្រឹងគុណភាពផ្លូវ ដែលទាមទារឲ្យមានការជួសជុល និងថែទាំទូទាំងប្រទេស តាមរយៈការរាយការណ៍ពីស្ថានភាពជង្ហុកសំបុកមាន់ និងផ្លូវខូចដោយអ្នកប្រើប្រាស់។
លោកស៊ុន ចាន់ថុលបន្ថែមថា ដោយបង្ហាញពីការតាំងចិត្តរបស់រាជរដ្ឋាភិបាល ក្នុងការកសាង និងថែទាំផ្លូវថ្នល់ឲ្យមានលក្ខណៈកាន់តែល្អប្រសើរ សម្រាប់ប្រជាពលរដ្ឋអ្នកប្រើប្រាស់ផ្លូវ “កម្មវិធីថែទាំផ្លូវ (ROAD CARE mobile app)” នឹងក្លាយជាកិច្ចខិតខំប្រឹងប្រែង រួមគ្នារវាងអាជ្ញាធរពាក់ព័ន្ធ ក្នុងការជួសជុលថែទាំផ្លូវ ដែលស្ថិតនៅក្រោមសមត្ថកិច្ចរបស់ក្រសួងសាធារណការ និងដឹកជញ្ជូន និងរដ្ឋបាលថ្នាក់ក្រោមជាតិទាំង២។ កម្មវិធីថែទាំផ្លូវនេះ នឹងគ្របដណ្តប់ទៅលើការជួសជុលថែទាំផ្លូវជាតិទាំង៧៥ខ្សែ គ្រប់ផ្លូវនៅក្នុងរាជធានីភ្នំពេញ និង ផ្លូវក្នុងក្រុងរបស់ខេត្តទាំង២៤ ។
លោករដ្ឋមន្ត្រីរូបនេះបញ្ជាក់ថា កម្មវិធីថែទាំផ្លូវនឹងចូលរួមចំណែកក្នុងការអភិវឌ្ឍប្រទេសឲ្យកាន់តែរីកចម្រើន ដើម្បីកាត់បន្ថយគ្រោះថ្នាក់ចរាចរណ៍ ដែលកើតឡើងដោយសារជង្ហុកសំបុកមាន់ និងផ្លូវខូច ព្រមទាំងជួយឲ្យប្រជាពលរដ្ឋធ្វើដំណើរលើប្រព័ន្ធបណ្តាញផ្លូវប្រកបដោយសុវត្ថិភាព៕
ប្រភព : www.propertyarea.asia
