ភ្នំពេញ៖ ក្រសួងទេសចរណ៍ គ្រោងស្នើរាជរដ្ឋាភិបាល និងសហការជាមួយបណ្តាស្ថាប័នពាក់ព័ន្ធ បង្កើតតំបន់ទេសចរណ៍ពិសិដ្ឋ ដែលតំបន់នោះនឹងគ្រោងអភិវឌ្ឍន៍អោយក្លាយជាតំបន់ទេសចរណ៍ដែលអាចជួយសម្រាល និងព្យាបាលជំងឺរបស់ភ្ញៀវទេសចរជាតិ អន្តរជាតិបានតាមរបៀបធម្មជាតិ។
លោក ទិត ចន្ថា រដ្ឋលេខាធិការក្រសួងទេសចរណ៍បានមានប្រសាសន៍ឲ្យដឹងនៅក្រោយកិច្ចប្រជុំអន្តរក្រសួងស្តីពី ការអភិវឌ្ឍឧស្សាហកម្មទេសចរណ៍កម្ពុជា កាលពីថ្ងៃទី២៩ខែវិច្ឆិកន្លងមកថា ដោយសារកម្ពុជា មានកំណើនឡើងនូវចំនួនភ្ញៀវទេសចរអន្តរជាតិវ័យចំណាស់ ដែលធនធានថវិកាច្រើន បានជ្រើសរើសយកកម្ពុជា ធ្វើជាគោលដៅធ្វើដំណើរទេសចរណ៍សំរាកលំហែរកាយ និងកាត់បន្ថយភាពតាននៃជំងឺតាមបែបធម្មជាតិ កម្ពុជានឹងបង្កើតគោលដៅតំបន់ទេសចរណ៍ប្រភេទនេះ បានច្រើនកន្លែង ដើម្បីរួមចំណែកលើកសុខភាពមនុស្សជាតិរបស់ពិភពលោក។
លោកបន្តថា“ការបង្កើតតំបន់ទេសចរណ៍ ដែលអាចអោយភ្ញៀវបរទេសមកសំរាកលំហែកាយបានរយៈពេលវែង ឬរយៈពេលខ្លីដើម្បីកាត់បន្ថយភាពតានតឹង និងព្យាបាលជំងឺតាមបែបធម្មជាតិនេះ “។ លោកបន្តថា “ក្រសួងនឹងសហការបង្កើតឲ្យមានផ្ទះស្នាក់ដ៏ប្រណីត មានអាហារហូបឆ្ងាញ់ ផ្តល់សេវាពិសេស មានទេសភាពស្អាត មានខ្យល់អាកាសធាតុល្អ ខុសពីប្រទេសដើមកំណើតរបស់ភ្ញៀវ ហើយនៅក្នុងតំបន់នោះ ក៏នឹងបង្កើតមានមណ្ឌលផ្តល់សេវាសុខភាពដ៏ប្រសើរ ជូនភ្ញៀវទេសចរទាំងអស់នោះផងដែរ។
លោកទិត ចន្ថាបានបន្តថា បច្ចុប្បន្នក្រសួងទេសចរណ៍ បាននិងកំពុងសិក្សាតំបន់ទេសចរណ៍មានឈ្មោះថា តំបន់នាគរាជដែលមានសក្តានុពលមួយកន្លែងនៅខេត្តព្រះសីហនុ ដែលអាចរៀបចំបង្កើតអោយទៅជាតំបន់ទេសចរណ៍ពិសិដ្ឋ និងអាចផ្តល់សេវាព្យាបាលជំងឺនានាតាមបែបធម្មជាតិបាន។លោកបន្តថា ក្រៅពីនេះក្រសួងទេសចរណ៍ ក៏បាននិងកំពុងមើលឃើញតំបន់ទេសចរណ៍ពិសិដ្ឋនេះជាច្រើនកន្លែងទៀតដូចជា នៅតំបន់ភ្នំបូកគោ តំបន់ភាគឦសាន្តកម្ពុជា ខេត្តសៀមរាប រាជធានីភ្នំពេញ តំបន់នានានៅតំបន់បឹងទន្លេសាបជាដើម ក៏អាចបង្កើតអោយទៅជាតំបន់ទេសចរណ៍ពិសិដ្ឋបានដែរ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងថា គំរោងនេះបើបង្កើតជាមួយស្ថាប័នជំនាញ និងមានការចូលរួមពីក្រសួងជំនាញ ទើបគំរោងនេះទាក់ទាញនិងទទួលបានជោគជ័យ ប៉ុន្តែអ្វីសំខាន់គឺការផ្តល់ទុនពីរដ្ឋាភិបាល ទើបគំរោងនេះអាចដំណើរការបានលឿន និងជោគជ័យ។លោកបន្តថា បើមានគំនិតធ្វើជារឿងល្អមួយ តែបើគ្មានថវិកាគឺបរាជ័យ ហេតុនេះយើងចង់បានការជួយទុនពីរដ្ឋាភិបាល ដើម្បីជំរុញឲ្យគំរោងនេះទទួលជោគជ័យប្រកបដោយនិរន្តរភាព។
លោកបន្តថា “ភ្ញៀវទេសចរណ៍វ័យចំណាស់មកទស្សនាកម្ពុជា នៅមានតិចតួចនៅឡើយ ហេតុនេះដើម្បីទាក់ទាញទេសចរណ៍ប្រភេទនេះ យើងត្រូវមានអនាម័យអាហារ អនាម័យបរិស្ថាន មានសុខសុវត្ថិភាព និងរៀបចំកន្លែងដែលមានលក្ខខ័ណ្ឌអាកាសធាតុល្អសម្រាប់ភ្ញៀវ ទើបយើងទទួលបានទេសចរណ៍វ័យចំណាស់ច្រើន”៕
ប្រភព : /www.propertyarea.asia
