ភ្នំពេញ៖ ទីផ្សារលំនៅដ្ឋាននៅក្នុងប្រទេសថៃ នៅតែមានសញ្ញាល្អប្រសើរសម្រាប់ដំណាច់ឆ្នាំ២០១៨ នេះ ដោយសារកំនើនសេដ្ឋកិច្ច និងអត្រាការប្រាក់ទាប។
យោងតាមរបាយការណ៍របស់ធនាគារថៃ (Bank of Thailand )បានបង្ហាញឲ្យដឹងកាលពីពេលថ្មីៗនេះថា តំលៃលំនៅដ្ឋានគិតជាមធ្យមកើនឡើង រហូតដល់៦.៣ % នៅក្នុងត្រីមាសទី២សម្រាប់ឆ្នាំ២០១៨នេះ បើធៀបនឹងរយៈពេលដូចគ្នាកាលពីកន្លងទៅដែលមានកំនើនត្រឹមតែ៣.១ %។ ចំណែកតម្លៃខុនដូបានកើនឡើង៤,៩% ក្នុងអំឡុងត្រីមាសទី២ឆ្នាំនេះផងដែរ ខណៈកាលពីឆ្នាំមុនតម្លៃខុនដូកើនឡើងត្រឹម៣,៩%ប៉ុណ្ណោះ។ ទោះជាយ៉ាងណាក៏ដោយ តម្លៃខុនដូបានធ្លាក់ចុះមកនៅត្រឹម១,៧% ក្នុងត្រីមាសចុងក្រោយ។
រីឯតម្លៃផ្ទះល្វែងបានកើនឡើង៦,៨% ក្នុងអំឡងត្រីមាស២ ឆ្នាំ ២០១៨ ដែលជាការកើនឡើងគួរឱ្យកត់សម្គាល់ពីកំណើន0,៧% កាលពីឆ្នាំមុន។ ក្នុងអំឡុងត្រីមាសទី២ តម្លៃផ្ទះល្វែងបានកើនឡើង២,៥% ក្នុងត្រីមាសទី២ ឆ្នាំ២០១៨ ។ តម្លៃដីធ្លីកំពុងតែកើនឡើងយ៉ាងខ្លាំង ពោលសន្ទស្សន៍តម្លៃដីបានកើនឡើង ៧,៩២% នៅក្នុងឆមាសទី២ ឆ្នាំ២០១៨ ពោលកើនឡើងពី៥,៥% ក្នុងត្រីមាសទី២ ឆ្នាំ ២០១៧ ។តម្លៃដីបានកើនឡើង ០,៨៥% នៅត្រីមាសទី២ ឆ្នាំ២០១៨ ។
ជាមួយគ្នានេះ សកម្មភាពសាងសង់លំនៅដ្ឋាន កំពុងកើនឡើងដូចគ្នា ពោលការចុះបញ្ជីសាងសង់ខុនដូ នៅទូទាំងប្រទេសបានកើនឡើង៦៩% ដែលមានផ្ទះរហូតដល់ចំនួន៥៣,១៨៦ យូនីត នៅក្នុងឆ្នាំ២០១៨ បើធៀបនឹងឆ្នាំមុន។ របាយការណ៍ដដែលបានឲ្យដឹងថា ការលក់ដីធ្លី និងអគារនៅទូទាំងប្រទេសបានកើនឡើង៥,១ភាគរយ ដែលមានទំហំទឹកប្រាក់រហូតដល់ចំនួន៥៣៩,៦៤ ពាន់លានបាត ស្មើនឹង១៦,៥៦ពាន់លានដុល្លារ ក្នុងឆមាសទី១ នៃឆ្នាំ២០១៨ ធៀបនឹងរយៈពេលដូចគ្នាកាលពីឆ្នាំមុន។
តំណាងក្រុមហ៊ុន CBRE ប្រចាំប្រទេសថៃបានឲ្យដឹងផងដែរថា ទីផ្សារលំនៅដ្ឋាននឹងបន្តកើនឡើងខ្លាំងជាងមុន ខណៈធនាគារបានកាត់បន្ថយលក្ខខណ្ឌកម្ចី សម្រាប់ប្រាក់កម្ចីទិញផ្ទះ ដែលជួយបង្កើនសមត្ថភាពរបស់អ្នកទិញក្នុងការខ្ចីប្រាក់។ សេដ្ឋកិច្ចរបស់ប្រទេសថៃបានកើនឡើង៤.៦% ក្នុងត្រីមាសទី២ឆ្នាំនេះ ធៀបនឹងឆ្នាំមុន ខណៈកាលពីត្រីមាសទី១ សេដ្ឋកិច្ចប្រទេសនេះសម្រេចបាន៤%%ប៉ុណ្ណោះ នៅក្នុងត្រីមាសចុងក្រោយឆ្នាំនេះ សេដ្ឋកិច្ចរបស់ថៃត្រូវរំពឹងថា នឹងសម្រេចបានកំនើន៤%ផងដែរ។ នេះបើយោងតាមគណៈកម្មាធិការអភិវឌ្ឍន៍សេដ្ឋកិច្ចនិងសង្គមរបស់ថៃ៕
ប្រភព : www.propertyarea.asia
