ភ្នំពេញ៖ ជាលើកដំបូងហើយក្នុងប្រវត្តិសាស្ត្រខេត្តរតនគិរី អ្នកវិនិយោគក្នុងស្រុកបានសម្រេចចិត្តបោះទុនជាង៧លានដុល្លារអាមេរិក ដើម្បីសាងសង់និងបើកដំណើរការផ្សារទំនើបជាលើកដំបូងនៅក្នុងទីក្រុងបានលុង ខេត្តរតនៈគិរី។
ប្រធានប្រតិបត្តិផ្សារទំនើបស៊ីត្រា លោកង៉ូវ សេរីរ័ត្នបានមានប្រសាសន៍ឲ្យដឹងក្នុងពិធីបើកសម្ភោធផ្សារទំនើបរបស់ខ្លួនកាលពីថ្ងៃទី២៩ វិច្ឆិកាកន្លងមកថា អាគារផ្សារទំនើបស៊ីត្រា គឺជាមជ្ឈមណ្ឌលពាណិជ្ជកម្មដ៏ល្អធំបំផុត និងមុនដំបូងគេបង្អស់នៅភូមិភាគឥសាន្ត។
លោកបន្តថា អាគារផ្សារទំនើបស៊ីត្រានេះ មិនត្រឹមតែជាផ្សារលក់គ្រឿងឧបភោគបរិភោគ និងសម្ភារ:ការិយាល័យសិក្សានោះទេ ប៉ុន្តែមជ្ឈមណ្ឌលពាណិជ្ជកម្ម១នេះ ក៏មានមជ្ឈមណ្ឌលកំសាន្ត Play Ground និងរោងកុនខ្នាត១២ D សម្រាប់មនុស្សគ្រប់វ័យ រួមទាំងមានសណ្ឋាគារ ភោជនីដ្ឋាន និងស្កាយបារ លើលំហរអាកាសជាន់ទី៦ផងដែរ។
អាគារផ្សារទំនើបទី១ ក្នុងខេត្តរតនគិរីនេះមានកម្ពស់៦ជាន់ ដែលជាមជ្ឈមណ្ឌលដ៏ល្អធំបំផុតមុនដំបូងគេបង្អស់នៅតំបន់ភូមិភាគឦសាន្ត បានលេចធ្លោឡើងនៅចំកណ្ដាលទីក្រុងបានលុង ដែលបានញាំងអោយខេត្តរតនគិរី កាន់តែមានភាពលេចធ្លោ និងមានការទទួលស្គាល់ពីមជ្ឈដ្ឋានទូទៅ ជាពិសេសគឺភ្ញៀវទេសចរជាតិ និងអន្តរជាតិ។
អភិបាលខេត្តរតនគិរី លោកថង សាវុន បានមានប្រសាសន៍ថា មជ្ឈមណ្ឌលពាណិជ្ជកម្មនេះ មិនត្រឹមតែជាផ្សារដ៏ទំនើបសម្រាប់ធ្វើអាជីវកម្មប៉ុណ្ណោះទេ ប៉ុន្តែផ្សារទំនើប១នេះ ក៏បានចូលរួមក្នុងការអភិវឌ្ឍមុខមាត់ថ្មីបន្ថែមរបស់ខេត្តរតនគីរី រួមទាំងជួយបន្ថែមលើកស្ទួយវិស័យទេសចរណ៍ បន្ទាប់ពីតំបន់ទេសចរណ៍វប្បធម៌ធម្មជាតិផងដែរ។
លោកបន្តថា “ផ្សារទំនើប១នេះក៏បានចូលរួមបង្កើត ឱកាសការងារដល់ប្រជាពលរដ្ឋក្នុងខេត្តរតនគិរី និងសិស្សានុសិស្សបានជាង២០០នាក់ផងដែរ ដើម្បីទទួលបានប្រាក់កម្រៃជួយផ្គត់ផ្គង់ដល់ជីវភាពគ្រួសារ និងជំនួយថវិកាក្នុងការសិក្សា”៕
ប្រភព : www.propertyarea.asia
