ភ្នំពេញ៖ តំលៃ​ដីធ្លី​នៅក្នុង​ខេត្តកំពត​កំពុងតែ​កើនឡើង​យ៉ាង​កំ​ហុក ដោយសារ​មាន​អ្នកវិនិយោគ​ជាតិ និង​អន្តរជាតិ​បាននិងកំពុង​សម្រុក វិនិយោគ​ទៅលើ​វិស័យ​សណ្ឋាគារ ផ្ទះសំណាក់ រ​ម្មណី​យ​ដ្ឋា​ន​ទេសចរណ៍ និង​បឹង​កា​ឡូ​ដិ៍ ជាច្រើន​នៅក្នុង​ខេត្ត​មួយ​នេះ។

លោក ផុន បញ្ញា ប្រធាន​ក្រុមហ៊ុន 5Bright Sibling Construction Co,.td. ដែល​កំពុង​វិនិយោគ​លើ​វិស័យ សំណង់​លំនៅដ្ឋាន​ក្នុង​ខេត្តកំពត បានអោយដឹង​នា​ព្រឹក​ថ្ងៃទី២៧ តុលា​នេះ​ថា តម្លៃ​ដីធ្លី​នៅក្នុង​ខេត្តកំពត​កើនឡើង៥ ទៅ១០ដង ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ ពោលគឺ​កើនឡើង​ពី១០០ដុល្លារ ទៅ៤០០ ឬ៥០០ ដុល្លារ​ក្នុង​មួយ​ម៉ែត្រការ៉េ ក្នុង​តំបន់​ទីប្រជុំជន និង​តម្លៃ២០ទៅ២៥ដុល្លារ​ក្នុង​ម៉ែត្រការ៉េ ក្នុង​តំបន់​មាត់​ព្រែក និង​ជាយក្រុង។

លោក​បន្តថា “រមណីយដ្ឋាន​ទាំង​ខ្នាតតូច និង​ខ្នាត​ទាំង​ធំ បាន​កើនឡើង​ប្រហែលជា៥០កន្លែង និង​ការសាងសង់​សណ្ឋាគារ ផ្ទះសំណាក់ និង​កន្លែង​ស្នាក់នៅផ្សេងៗទៀត ក៏​កើនឡើង​ដូចគ្នា ដើម្បី​ឆ្លើយតប​ទៅនឹង​កំនើន​ទេសចរណ៍ និង​ប្រជាជន។ លោក​បញ្ជាក់ទៀតថា “ការកើនឡើង​នេះ ដោយសារតែ​អ្នក​ទេសចរណ៍​ក្នុង ស្រុក​ជាច្រើន​បាន​បង្វែរ​ទិស​មកលេង​កម្សាន្ត​ក្នុង​ខេត្ត មាត់សមុទ្រ​មួយ​នេះ ខណៈ​កំណើន​ទេសចរណ៍​ទៅលេង​កម្សាន្ត នៅក្នុង​ខេត្ត​ព្រះសីហនុ​បាន​ថយចុះ និង​ជួប​វិបត្តិ​មួយចំនួន។

លោក ជាវ តា​យ អភិបាល​ខណៈ​អភិបាល​ខេត្តកំពត​អោយដឹងថា ការអភិវឌ្ឍន៍​លើ​វិស័យ​ទេសចរណ៍ គឺជា​ការងារ​ចាំបាច់​បំផុត​សម្រាប់​ប្រទេស ក៏ដូចជា ខេត្តកំពត ព្រោះ​ឧស្សាហកម្ម​មួយ​នេះ បាន​ផលប្រយោជន៍​ច្រើន​ដល់ ប្រជាពលរដ្ឋ​ក្នុង​មូលដ្ឋាន និង​បាន​ឆ្លើង​តប​ទៅនឹង​កំណើន សេដ្ឋកិច្ច​តាមរយៈ​ការកៀងគរ ឲ្យ​មាន​កំណើន​ភ្ញៀវ​ទេ​ចរណ៍​មកលេង​ក្នុង​ខេត្តកំពត កាន់​ច្រើន​សំដៅ​កាត់បន្ថយ​ភាពក្រីក្រ​របស់​ប្រជាពលរដ្ឋ។

លោក​បន្តថា ខេត្តកំពត គឺជា​ខេត្ត​មួយ​មាន​សក្តានុពល ក្នុង​វិស័យ​ទេសចរណ៍​ជាច្រើន ទាំង​ទេសចរណ៍ធម្មជាតិ វប្បធម៌​ប្រវត្តិសាស្ត្រ និង​សហគមន៍​ទេសចរណ៍ ដែល​ទាំងនេះ គឺជា​គោលដៅ​ទាក់ទាញ​កំរិត​ខ្ពស់។ ហើយ​តំបន់​គោលដៅ​ទេសចរណ៍​ទាំងអស់នោះ អាជ្ញាធរខេត្ត រួម​នឹង​វិស័យ​ឯកជន ក៏​កំពុង​បាន​ជំរុញ​យកចិត្តទុកដាក់​អភិរក្ស និង​អភិវឌ្ឍ​បន្ថែម សំដៅ​ធ្វើអោយ​ភ្ញៀវ​ទេសចរណ៍​ជាតិ និង​បរទេស​មក​ទស្សនា​កម្សាន្ត នៅក្នុង​ទឹកដី​ខេត្តកំពត មានការ​កើនឡើង​ជាប​ន្ត​បន្ទាប់ ដែលជា​ការរួមចំណែក​ដល់​កំណើនសេដ្ឋកិច្ច និង​ជីវភាព​របស់​ប្រជាពលរដ្ឋ បាន​កាន់តែ​ល្អប្រសើរ​ពិតប្រាកដ។

យោងតាម​របាយការណ៍​របស់​មន្ទីរ​ទេសចរ​ណ៍​ខេត្ត​បាន​បង្ហាញថា ក្នុង​រយៈពេល១០ខែ​ដើមឆ្នាំ២០១៨នេះ មាន​ភ្ញៀវទេសចរ​សរុប​ចំនួន​ជាង១,៣លាន​នាក់ ក្នុងនោះ​ភ្ញៀវ​ជាតិ មាន​ចំនួន​ជិត​មួយ​លាន​ពីរ​សែន​នាក់ និង​ភ្ញៀវ​អន្តរជាតិ​ជាង​ដប់​បួន​ម៉ឺន​នាក់ ពោលគឺ​មានការ​កើនឡើង​ខ្ពស់​បើ​ធៀប​ឆ្នាំ២០១៧កន្លងទៅ៕

ប្រភព : Property area