ភ្នំពេញ : អ្នកជំនាញនៃក្រុមហ៊ុនលំដាប់អន្តរជាតិបានអះអាងថា តម្លៃដីធ្លីនៅកម្ពុជាបានកើនឡើង ២២៥ ភាគរយ ក្នុងរយៈពេលមួយ១០ឆ្នាំកន្លងមកនេះ និងបន្តកើនឡើង៧ភាគរយជាមធ្យមក្នុងមួយឆ្នាំបន្ថែមទៀត សម្រាប់រយៈពេលមួយទសវត្សរ៍ខាងមុខ។
នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានមានប្រសាសន៍ក្នុងកិច្ចសម្ភាសន៍នាព្រឹកថ្ងៃទី១៨ តុលានេះថា តម្លៃដីធ្លីនៅកម្ពុជានឹងបន្តកើនឡើងបន្ថែមទៀត ដែលយើងអាចព្យាករណ៍ថា កំនើនតម្លៃដីធ្លីនឹងកើន៧ភាគរយក្នុងមួយឆ្នាំសម្រាប់មួយទសវត្សរ៍ខាងមុខ ប៉ុន្តមិនមែនមានន័យថាតម្លៃដីធ្លីនឹងកើនឡើងថេរ៧ភាគរយនោះទេ គឺឆ្នាំខ្លះអាចតិចជាងនេះ និងឆ្នាំខ្លះអាចច្រើនជាងនេះ ប៉ុន្តែតួលេខ៧ភាគរយ ជាតួលេខដែលគិតជាមធ្យម។ អ្នកនាបន្តថា “ការព្យាករណ៍បែបនេះ ដោយយើងឈរលើមូលដ្ឋានសំខាន់ៗដូចជាតម្រូវការទិញលក់ក្នុងទីផ្សារ ការសិក្សាប្រៀបធៀបជាមួយប្រទេសថៃ និងវៀតណាមជាដើម ព្រោះប្រទេសទាំងនេះមានស្ថានភាពស្រដៀងគ្នានឹងកម្ពុជា”។
អ្នកនាង អាន សុធីតា បានបន្តឲ្យដឹងផងដែរថា បើគិតរយៈពេល១០ឆ្នាំកន្លងមកនេះ តម្លៃដីធ្លីបានកើនឡើងយ៉ាងខ្លាំង ដោយកាលពីឆ្នាំ២០០៨តម្លៃដីធ្លី ដែលខ្ពស់ជាងគេគឺមានតម្លៃជាមធ្យម២០០០ដុល្លារក្នុងមួយម៉ែត្រការ៉េ និងឆ្នាំ២០១៨នេះតម្លៃដីធ្លីអាចលក់បានរហូតដល់៦៥០០ដុល្លារក្នុងមួយម៉ែត្រការ៉េ។
តាមការវិភាគរបស់អ្នកជំនាញមួយចំនួនបានអះអាងឲ្យដឹងថា តម្លៃដីធ្លីនៅកម្ពុជាកើនឡើដោយសារកត្តាសំខាន់ៗជាច្រើន ដូចជា កត្តាសន្តិភាព ស្ថិរភាពនយោបាយ កំនើនសេដ្ឋកិច្ច ការអភិវឌ្ឍហេដ្ឋារចនាសម្ព័ន្ឋរបស់រដ្ឋាភិបាល និងកត្តាប្រជាសាស្រ្ត៕
ប្រភព : Property area
