ភ្នំពេញ៖ ស្របពេលតម្លៃដីធ្លីនៅក្រុងភ្នំពេញ និងជុំវិញក្រុងភ្នំពេញកើនឡើងខ្ពស់ និងបន្តកើនឡើងជាបន្តបន្ទាប់ បានធ្វើឲ្យមានការលើកជាសំណួរថា តើអ្វីនៅពីក្រោយរលកនៃតម្លៃដីធ្លីនេះ។
អ្នកជំនាញបានពន្យល់ពីការឡើងថ្លៃដីនៅក្រុងភ្នំពេញ ដោយសារកត្តាសំខាន់ៗជាច្រើន។
អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodia បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៣ សីហានេះថា ជាមធ្យមតម្លៃដីនៅក្រុងភ្នំពេញកើនឡើង៦,៦ភាគរយប្រចាំឆ្នាំ តួលេខនេះជាការគិតជាទូទៅ ប៉ុន្តែតំបន់ខ្លះកើនខ្ពស់ជាងនេះច្រើន និងខ្លះតិចជាងនេះ។ មូលហេតុដែលធ្វើឲ្យដីធ្លីនៅកម្ពុជា ពិសេសក្រុងភ្នំពេញឡើងថ្លៃខ្ពស់ ដោយសារកត្តាសំខាន់ៗមួយចំនួនដូចជា ទី១ លំហូរនៃទុនវិនិយោគផ្ទាល់ពីបរទេសកើនឡើង (FDI) ទី២ ដីនៅកម្ពុជាអាចទិញជាលក្ខណៈកម្មសិទ្ឋបាន ដោយសារកម្ពុជាមានច្បាប់វិនិយោគពិសេស ដែលអនុញ្ញាត្តឲ្យជនបរទេសកាន់កាប់ក្រុមហ៊ុន១០០ភាគរយដោយខ្លួនឯងបាន។
ទី៣ កំនើនសេដ្ឋកិច្ចរ៉ឹងមាំរបស់កម្ពុជា ដែលធ្វើឲ្យប្រាក់ចំណូលប្រជាជនកើនឡើង ទី៤ ការវិនិយោគលើវិស័យអចលនទ្រព្យកើនឡើងខ្ពស់ ពិសេសលំនៅដ្ឋាន អាគារការិយាល័យ និងលំនៅដ្ឋានបែបសហកម្មសិទ្ឋ(ខុនដូ) ទី៥ ការពង្រីកហេដ្ឋារចនាសម្ព័ន្ឋរបស់រដ្ឋាភិបាលកាន់តែមានភាពប្រសើរឡើង និងទី៦ តម្រូវការប្រើប្រាស់ដីកើនឡើងដោយសារកំនើនប្រជាសាស្ត្រ នៅក្នុងទីក្រុងភ្នំពេញបានកើនឡើងជាប់ជាប្រចាំ។
យោងតាមការសិក្សារបស់ក្រសួងរៀបចំដែនដី នគរូបនីយកម្មនិងសំណង់បានរកឃើញថា គិតពីឆ្នាំ២០១៥ ដល់ឆ្នាំ២០៣០ខាងមុខ ប្រទេសកម្ពុជាត្រូវការលំនៅដ្ឋានជាង៨០ម៉ឺនខ្នងបន្ថែមទៀត នៅក្នុងទីក្រុង ហើយចំនួនប្រជាជនចូលមករស់នៅតាមទីក្រុងនិងទីប្រជុំជននានាកើនដល់៨លាននាក់៕
ប្រភព : Property area
