ភ្នំពេញ៖ តម្រូវការអាគារការិយាល័យសម្រេចបានកំនើនខ្ពស់នៅឆ្នាំនេះ ដោយសារលំហូរវិនិយោគផ្ទាល់ពីបរទេស និងការកើនឡើងនូវក្រុមហ៊ុនក្នុងស្រុក និងការពង្រីកសាខារបស់ក្រុមហ៊ុនថ្មី។
យោងតាមការសិក្សារបស់ក្រុមហ៊ុន CBRE Cambodia បានរកឃើញថា ជាមួយកំនើននៃតម្រូវការប្រើប្រាស់ បានធ្វើឲ្យតម្លៃនៃការជួលអាគារការិយាល័យ បានកើនឡើងនៅឆ្នាំនេះ ក្នុងនោះតម្លៃជួលអាគារការិយាល័យកម្រិតBបានកើន៦ភាគរយ និងការិយាល័យកម្រិតC បានកើនតម្លៃ៣,៤ភាគរយធៀបរយៈពេលដូចគ្នាកាលពីឆ្នាំមុន។ ជាមួយនឹងកំនើននៃតម្រូវការ បានធ្វើឲ្យមានការផ្គត់ផ្គង់អាគារការិយាល័យថ្មីៗ កើនឡើងផងដែរ ដូចជាអាគារ Key Stone, East commercial ជាដើមបានដាក់ចូលទីផ្សារឆ្នាំនេះ។
ជាមួយនេះអាគារការិយាល័យប្រើប្រាស់រួម បានកើនឡើងខ្ពស់នៅឆ្នាំនេះ ដោយទំហំការិយាល័យដាក់ចូលទីផ្សារកើនដល់ ៦០,០០០ម៉ែត្រការ៉េ សម្រាប់អាគារការិយាល័យប្រើប្រាស់រួម ដែលជាការធ្វើតេស្តទីផ្សារថ្មីមួយ។ នេះបើតាមការឲ្យដឹងពីអ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodia។
អ្នកនាងបន្តថា “ទីផ្សារការិយាល័យនៅតែមានសុទិដ្ឋិនិយម ដោយសារកំនើននៃការវិនិយោគផ្ទាល់ពីបរទេស និងការពង្រីកសាខាក្រុមហ៊ុនថ្មីៗរបស់អ្នកវិនិយោគក្នុងស្រុក។អ្នកនាងបន្ថែមថា “ទោះជាមានតម្រូវការកើនឡើង ប៉ុន្តែការផ្គត់ផ្គង់ក៏បានកើនឡើងផងដែរ ធៀបនឹងឆ្នាំមុន។
នៅកម្ពុជាមានអាគារការិយាល័យកម្រិតAតែបីប៉ុណ្ណោះ ដូចជា អាគារវឌ្ឍនៈ អាគារការិយាល័យ Exchange Square, និងអាគារការិយាល័យកាណាឌីយ៉ា។ ក្រៅពីនេះភាគច្រើនជាអាគារការិយាល័យលំដាប់ B ដែលជាប្រភេទការិយាល័យមានតម្លៃសមរម្យ និងមានការពេញនិយមពីក្រុមហ៊ុនក្នុងស្រុក និងក្រុមហ៊ុនអន្តរជាតិនានា៕
ប្រភព : Property area
