ភ្នំពេញ៖ ក្រុមអ្នកជំនាញអចលនទ្រព្យបានលើកឡើងថា តំបន់ភ្នំប្រសិទ្ឋនឹងមានការរីកចម្រើនលឿននាពេលអនាគតឆាប់ៗខាងមុខនេះ ដោយសារតំបន់មាននេះមានលក្ខអំណោយផលជាច្រើន។

អគ្គនាយកក្រុមហ៊ុន Century21 Mekong លោកច្រឹក សុខនីមបានមានប្រសាសន៍​ឲ្យដឹងនារសៀលថ្ងៃទី៣ សីហាកន្លងមកថា តំបន់ភ្នំប្រសិទ្ឋនឹងមានការរីកចម្រើនលឿននាពេលឆាប់ៗខាងមុខនេះ ដោយសារតំបន់នេះស្ថិតនៅកៀកនឹងរាជធានីភ្នំពេញ ពិសេ​សខ័ណ្ឌព្រែកព្នៅ និងការតភ្ជាប់ហេដ្ឋារចនាសម្ព័ន្ឋទៅកាន់តំបន់នេះកាន់តែច្រើន ហើយផ្លូវមួយកាត់បឹងកប់ស្រូវឬបឹងតាមោឃត្រូវបានតភ្ជាប់ នឹងធ្វើឲ្យមានការសាងសង់បុរីឬលំនៅដ្ឋាន​ផ្សេងៗកាន់តែច្រើននៅតំបន់នេះ។

លោកបន្តថា “តំបន់នេះមានសក្តានុពលខ្ពស់ ដោយស្ថិតនៅក្បែររាជធានីផង និងស្ថិតនៅក្បែរមណីយដ្ឋាន ដែលប្រជាពលរដ្ឋងាយទៅកំសាន្ត ឬលំហែរកាយចុងសប្តាហ៍ផង”។

ជាមួយគ្នានេះលោកលាងគង់ យិនស្ថាបនិកនិងជាអគ្គនាយកគេហទំព័រអចលនទ្រព្យឈានមុខគេនៅកម្ពុជា Propertyarea.asia បានថ្លែងថា ដោយសារភាពអំណោយផលទាំងនេះ រួមទាំងលក្ខខ័ណ្ឌអាកាសធាតុល្អប្រសើរ សណ្ឋានដីខ្ពស់មិនប្រឈមមុខនឹងការលិចទឹក បានធ្វើឲ្យមានការចាប់អារម្មណ៍វិនិយោគពីអ្នកវិនិយោគជាតិ អន្តរជាតិកាន់ តែច្រើនទៅកាន់តំបន់​នេះ។ លោកបន្តថា តម្លៃដីធ្លីពីមុនមានត្រឹម៥ទៅ១០ដុល្លារ បច្ចុប្ប ន្នបានកើនដល់១៥ទៅ៣០ដុល្លារក្នុងមួយម៉ែត្រការ៉េ អាស្រ័យតាមតំបន់និមួយៗ ទំហំដី និងសណ្ឋានផ្លូវនៅតំបន់នេះ។

លោកបន្តថា “ខ្ញុំគិតថារយៈពេលបីទៅ៥ឆ្នាំខាងមុខ ការអភិវឌ្ឍនៅតំបន់នេះនឹងកញ្រ្ជោលខ្លាំង ហើយតម្លៃដីធ្លីនឹងកើនឡើងទ្វេរដង ធៀបនឹងបច្ចុប្បន្ន”។លោកបន្តថា “តាម​ប្រភពព៌តមានខ្ញុំទទួលបានគឺឯកឧត្តមជា សុផារ៉ាទេសរដ្ឋមន្រ្តីរដ្ឋមន្រ្តីក្រសួងរៀបចំដែនដី នគរូបនីយកម្មនិងសំណង់ កំពុងជម្រុញឲ្យមានការវិនិយោគលំនៅដ្ឋានតម្លៃសមរម្យនៅ​តំបន់នេះនាពេលឆាប់ៗ”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកបណ្ឌិតគីម ហ៊ាងបានថ្លែងថា ជាការពិតតំបន់ភ្នំប្រសិទ្ឋពិតជាមានសក្តានុពលនាពេលអនាគត ព្រោះវាជា​តំបន់ដែលមានការអភិវឌ្ឍហេដ្ឋារចនាសម្ព័ន្ឋតភ្ជាប់លឿន ទៅកាន់តំបន់នេះ ដែលធ្វើឲ្យ​ការធ្វើដំណើរចេញពីតំបន់ពាណិជ្ជកម្មក្នុងក្រុង ចេញទៅតំបន់នេះចំណាយពេលប្រមា​ណ១៥ទៅ២០នាទីប៉ុណ្ណោះ។

លោកបន្តថា “ការអភិវឌ្ឍនៅតំបន់នេះនឹងមានកម្រិតលឿន ដោយសារដីនៅទំនេរច្រើន សណ្ឋានដីល្អ ហេដ្ឋារចនាសម្ព័ន្ឋគាំទ្រមានភាពប្រសើរ”។លោកបន្តថា “តម្លៃដីនៅតំបន់នេះមានភាពសមស្របនាពេលបច្ចុប្បន្ន ប៉ុន្តែវានឹងកើនឡើងខ្ពស់ថែមទៀតនាពេល​អនាគត”៕​

ប្រភព : Property area