បាត់ដំបង៖ លោក ផាង វី ប្រធាននាយកដ្ឋានធារាសាស្រ្តកសិកម្ម បន្តដឹកនាំក្រុមវិស្វករបច្ចេកទេសក្រសួង ចុះពិនិត្យស្ថានភាពសំណង់អាងទឹក និងប្រព័ន្ធធារាសាស្ត្រធំៗក្នុងខេត្តបាត់ដំបង ក្រោយកើតមានបាតុភូតរញ្ជួយដីនៅក្នុងប្រទេសមីយ៉ាន់ម៉ា។ លោក បានញ្ជាក់ថា តាមការចុះពិនិត្យជាក់ស្តែង ស្ថានភាពទំនប់អាងទឹកទាំងពីរទីតាំងនេះមិនទទួលរងការប៉ះពាល់ពីបាតុភូតរញ្ជួយដីនោះទេ។
ការចុះពិនិត្យនៅខេត្តបាត់ដំបង នៅថ្ងៃទី២ ខែមេសានេះ បន្តាប់ពីចុះពិនិត្យស្ថានភាពសំណង់អាងទឹក និងប្រព័ន្ធធារាសាស្ត្រធំៗ ក្នុងខេត្តព្រះវិហារ និងខេត្តឧត្តរមានជ័យ នៅថ្ងៃទី១ ខែមេសា ឆ្នាំ២០២៥។
បើតាម លោក ផាង វី និងក្រុមការងារបច្ចេកទេស បានចុះពិនិត្យស្ថានភាពសំណង់អាងទឹកពហុបំណងបាត់ដំបង (សេកសក) ស្ថិតក្នុងឃុំផ្លូវមាស ស្រុករតនមណ្ឌល និងសំណង់កាត់ស្ទឹងនៃប្រព័ន្ធធារាសាស្រ្តកង្ហត ស្ថិតក្នុងឃុំចែងមានជ័យ ស្រុកបាណន់។
ប្រធាននាយកដ្ឋានធារាសាស្ត្រកសិកម្ម បានបញ្ជាក់ឱ្យដឹងថា តាមការចុះពិនិត្យជាក់ស្តែង ស្ថានភាពទំនប់អាងទឹកទាំងពីរទីតាំងនេះមិនទទួលរងការប៉ះពាល់ពីបាតុភូតរញ្ជួយដីនោះទេ។
អាងទឹកពហុបំណងបាត់ដំបង (សេកសក) បានសាងសង់ឡើងក្នុងឆ្នាំ២០១៤ ក្រោមហិរញ្ញប្បទានរបស់រដ្ឋាភិបាលចិន។ ទំនប់អាងទឹកនេះមានផ្ទៃអាងប្រមាណ ៣០៧០ហិកតា និងប្រភពទឹកពីស្ទឹងក្រញូង ស្ទឹងបឡាង និងផ្ទៃរងទឹកភ្លៀង ដែលមានលទ្ធភាពរក្សាទឹកទុកក្នុងរដូវវស្សាប្រមាណ ១៩៣លានម៉ែត្រគូប។ បើតាមការឱ្យដឹងពី លោកប្រធាន។
លោក បានបន្តថា ចំណែក សំណង់កាត់ស្ទឹងនៃប្រព័ន្ធធារាសាស្រ្តកង្ហត សាងសង់ក្នុងឆ្នាំ២០១០ ក្រោមហិរញ្ញប្បទានរបស់រដ្ឋាភិបាលចិន មានប្រភពទឹកពីអាងទឹកពហុបំណងបាត់ដំបង (សេកសក) និងផ្ទៃរងទឹកភ្លៀងដែលមានសក្តានុពលអាចស្តុកទឹកបានចំនួន ១៧លានម៉ែត្រគូប។
បើតាម ក្រសួងធនធានទឹក និងឧតុនិយម កាលពីវេលាម៉ោង ១៣និង២០នាទី ថ្ងៃទី២៨ ខែមីនា ឆ្នាំ២០២៥នេះ មានបាតុភូតរញ្ជួយដីកើតឡើងស្ថិតនៅចម្ងាយ ១៦គីឡូម៉ែត្រភាគពាយ័ព្យនៃទីក្រុងសាហ្គាំង(Sagaing) ក្នុងប្រទេសមីយ៉ាន់ម៉ា។
ការរញ្ជួយនេះ បានកើតឡើងនៅក្នុងស្រទាប់ស្នូលផែនដីជម្រៅប្រមាណ ១០គីឡូម៉ែត្រ និងមានឥទ្ធិពលមកស្រទាប់ខាងលើនៃផែនដីក្នុងកម្រិតរញ្ជួយ ៧,៧រ៉ិចទ័រ បានបង្កឱ្យមានផលប៉ះពាល់ដល់ប្រទេសមួយចំនួនរួមមាន៖ មីយ៉ាន់ម៉ា បង់ក្លាដែស ឥណ្ឌា ឡាវ ថៃ វៀតណាម និងប្រទេសចិន។ ដោយឡែក កម្ពុជាក៏ទទួលរងនូវឥទ្ធិពលនេះផងដែរ តែក្នុងកម្រិតតិចតួចប៉ុណ្ណោះ៕
ដោយ៖ មឿន ឌីណា (Moeun Dyna)
