កំពត-តាកែវ៖ មន្រ្តីជាន់ខ្ពស់ក្រសួងធនធានទឹក និងឧតុនិយម បានដឹកនាំក្រុមការងាររបស់អង្គភាព សហការជាមួយមន្ត្រីជំនាញនាយកដា្ននធារាសាស្ត្រកសិកម្ម ចុះពិនិត្យគម្រោងការងារថែទាំជាប្រចាំប្រព័ន្ធធារាសាស្ត្រស្ទឹងកែវ ខេត្តកំពត និងប្រព័ន្ធធារាសាស្ត្រប្រឡាយមេហនុមាន ខេត្តតាកែវ។ ប្រព័ន្ធនេះ មានលទ្ធភាពស្រោចស្រពលើផ្ទៃដីបង្កបង្កើនផលកសិកម្មស្រូវវស្សា-វស្សា និងដំណាំរួមផ្សំចំនួន ១៤២០០ហិកតា ជូនប្រជាពលរដ្ឋចំនួន ១២,៦៣៨គ្រួសារ។

បើតាមការចុះពិនិត្យនេះ នៅថ្ងៃទី២ ខែមេសា ឆ្នាំ២០២៥ ដឹកនាំដោយ លោក ប៊ុន ហ៊ាន រដ្ឋលេខាធិការ និងជាប្រធានអង្គភាពត្រួតពិនិត្យគម្រោង។

 លោក ប៊ុន ហ៊ាន បានឱ្យដឹងថា គម្រោងថែទាំជាប្រចាំប្រព័ន្ធធារាសាស្ត្រស្ទឹងកែវ រួមមាន៖ ទំនប់ចំនួន ២ខ្សែប្រវែង ៥២៧ម៉ែត្រ ប្រឡាយមេបេតុង (GMC, GMC1 &GMC2) ចំនួន ៣ខ្សែប្រវែង ២២៨៧៥ម៉ែត្រ ប្រឡាយមេដី(MC1&MC2) ចំនួន ២ខ្សែប្រវែង ២០ ៨០៦ម៉ែត្រ និងប្រឡាយរងដីថ្នាក់ទី១ចំនួន ១១ខ្សែប្រវែង ៣២ ៧៤២ម៉ែត្រ និងជួសជុលថែទាំសំណង់សិល្បការ្យ (តូច-ធំ)សរុបចំនួន ៥១កន្លែង។

ចំណែក គម្រោងថែទាំជាប្រចាំប្រព័ន្ធធារាសាស្ត្រប្រឡាយមេហនុមាន រួមមាន៖  ថែទាំប្រឡាយមេចំនួន ៤ខ្សែ (MC1, MC2, MC3 &MC4) សរុបប្រវែង ២២០៩៨ម៉ែត្រ និងជួសជុលថែទាំសំណង់សិល្បការ្យ (តូច-ធំ) ចំនួន ៧២កន្លែង។ ជាការបន្ត លោកប្រធាន។

លោកប្រធាន បានបន្តថា ប្រព័ន្ធធារាសាស្ត្រស្ទឹងកែវ ទទួលប្រភពទឹកដោយទំនប់បញ្ចាល់ទឹកនៅផ្នែកខាងលើនៃព្រែកស្ទឹងកែវ ផ្ទៃរងទឹកភ្លៀងទំនប់ និងសម្រាប់រំដោះទឹកជំនន់ចេញពីតំបន់ដែលមានការលិចលង់ដោយជំនន់ទឹកភ្លៀងក្នុងរដូវវស្សា។

ប្រព័ន្ធនេះ មានលទ្ធភាពស្រោចស្រពលើផ្ទៃដីបង្កបង្កើនផលកសិកម្មស្រូវវស្សាចំនួន ១១២០០ហិកតា ស្រូវប្រាំងចំនួន ១០០០ហិកតា និងដំណាំរួមផ្សំប្រប្រមាណ ២០០០ហិកតា ជូនប្រជាពលរដ្ឋចំនួន ៩ ៧៨៨គ្រួសារ ក្នុងស្រុកឈូក និងស្រុកទឹកឈូ ខេត្តកំពត។ ជាការបញ្ជាក់ ប្រធានអង្គភាពត្រួតពិនិត្យគម្រោង។

ប្រធានអង្គភាពត្រួតពិនិត្យគម្រោង បានបន្តទៀតថា ដោយឡែក ប្រព័ន្ធធារាសាស្រ្តហនុមាន ទទួលប្រភពទឹកពីស្ទឹងព្រែកត្នោតហូរចុះមកបំពេញបឹងទន្លេបាទី និងមួយភាគទៀតពីផ្ទៃរងទឹកភ្លៀងក្នុងតំបន់ សម្រាប់ស្រោចស្រពដំណាំស្រូវប្រមាណ ២៨៥០គ្រួសារ ក្នុងស្រុកបាទី។

នាឱកាសនោះ រដ្ឋលេខាធិការ បានផ្តាំផ្ញើដល់ក្រុមការងារអនុវត្តគម្រោងរបស់នាយកដ្ឋានធារាសាស្ត្រកសិកម្ម ត្រូវយកចិត្តទុកដាក់លើការងារជួសជុលថែទាំទំនប់ ប្រព័ន្ធប្រឡាយបេតុង ប្រឡាយដី និងសំណង់បេតុង និងប្រព័ន្ធមេកានិករវៃបិទ-បើកទ្វារទឹក ឱ្យមានសុវត្ថិភាព គុណភាព សោភ័ណភាព ត្រឹមត្រូវតាមលក្ខណៈបច្ចេកទេស។

ជាមួយគ្នានេះ លោក បានណែនាំដល់មន្ទីរធនធានទឹក និងឧតុនិយមបន្តគ្រប់គ្រងសមិទ្ធផលទាំងនេះឱ្យបានត្រឹមត្រូវ ជាពិសេស ជំរុញសហគមន៍កសិករប្រើប្រាស់ទឹក និងអាជ្ញាធរដែនដី ចុះផ្សព្វផ្សាយការប្រើប្រាស់ប្រព័ន្ធធារាសាស្ត្រនេះឱ្យមាននិរន្តរភាពសម្រាប់ការងារស្រោចស្រព និងការប្រើប្រាស់ប្រចាំថ្ងៃជូនប្រជាពលរដ្ឋបានយូរអង្វែង៕

ដោយ៖ មឿន ឌីណា (Moeun Dyna)