កណ្ដាល៖ ប្រជាពលរដ្ឋ នៅភូមិព្រែកតាប្រាំង និងភូមិព្រែកក្រូច ឃុំភូមិធំ ស្រុកល្វាឯម បានទទួលវិញ្ញាបនបត្រសម្គាល់ម្ចាស់អចលនវត្ថុចំនួន ២០៣៧បណ្ណ ពីលោក គួច ចំរើន អភិបាលខេត្តកណ្តាល នាព្រឹកថ្ងៃទី១ ខែមេសា ឆ្នាំ២០២៥។

គិតមកដល់ពេលនេះបានចុះបញ្ជី ៦០ឃុំ/សង្កាត់ លើ ១២៧ ឃុំ/សង្កាត់ នឹង ៥៣៣ភូមិ លើ១០១០ភូមិ គឺស្មើនឹង ៥៣% នៃចំនួនភូមិសរុប។ បើតាមការលើកឡើង លោក សុក កាន់ណារិទ្ធ ប្រធានមន្ទីររៀបចំដែនដី នគរូបនីយកម្មសំណង់ និងសូរិយោដីខេត្តកណ្ដាល។

របាយការណ៍លោកប្រធាន បានឱ្យដឹងថា ក្នុងនោះ បានចេញវិញ្ញាបនបត្រសម្គាល់ម្ចាស់អចលនវត្ថុ បានចំនួន ៣៨៦,៧៥៨បណ្ណ និងចែកបណ្ណជូនដល់ដៃប្រជាពលរដ្ឋសរុបចំនួន ២៣២លើក ស្មើនឹង ៣១៥,៩៣៤បណ្ណ។

ថ្ងៃនេះ គឺជាលើកទី២៣៣ នៃការចែកវិញ្ញាបនបត្រសម្គាល់ម្ចាស់អចលវត្ថុ ដែលនឹងត្រូវផ្តល់ជូនប្រជាពលរដ្ឋមកពីភូមិព្រែកប្រាំង ចំនួន ៦៨៤បណ្ណ និងភូមិព្រែកក្រូចចំនួន ១,៣៥៣បណ្ណ ឃុំភូមិធំ ស្រុកល្វាឯម សរុបចំនួន ២,០៣៧បណ្ណ។ ជាការបន្ថែម លោក សុក កាន់ណារិទ្ធ។

ពិធីចែកវិញ្ញាបនបត្រសម្គាល់ម្ចាស់អចលនវត្ថុ លោក គួច ចំរើន បានថ្លែងថា ស្រុកល្វាឯម គឺជាស្រុកមួយ ក្នុងចំណោមក្រុង-ស្រុកដទៃទៀត ដែលទំនាស់ដីធ្លីនៅសល់តិចតួច ដូច្នេះរដ្ឋបាលស្រុកល្វាឯម ត្រូវខិតខំយកចិត្តទុកដាក់ សម្របសម្រួល និងដោះស្រាយទំនាស់ដីធ្លីដែលនៅមានសេសសល់ឱ្យបានចប់ ដើម្បីធ្វើគំរូដល់ក្រុង-ស្រុកដ៏ទៃក្នុងការបញ្ចប់ទំនាស់ដីធ្លី។

នាឱកាសនោះ លោក ក៏បានអំពាវនាវដល់បប្រជាពលរដ្ឋទាំងអស់ សូមមានការសម្របសម្រួល និងស្រុះស្រួលគ្នាក្នុងករណីមានទំនាស់ដីធ្លីបន្តិចបន្តួច ព្រមទាំងសហការជាមួយមន្ត្រីចុះបញ្ជីដីធ្លី នៃមន្ទីររៀបចំដែនដី នគររូបយីកម្ម សំណង់ និងសុរិយោដីខេត្តកណ្ដាល និងអាជ្ញាធរមូលដ្ឋាន ដើម្បីចុះបញ្ជីដីធ្លីជូនឱ្យបានរួចរាល់ ដើម្បីឈានដល់ការចេញវិញ្ញាបនបត្រសម្គាល់ម្ចាស់អចលនវត្ថុជូននាពេលខាងមុខ។

ការចុះបញ្ជីមានលក្ខណៈជាប្រព័ន្ធ គឺមិនមានការបង់ប្រាក់នោះទេ ដូច្នេះសូមបងប្អូនប្រជាពលរដ្ឋ ដែលមានទំនាស់ដីធ្លី សូមធ្វើការសម្របសម្រួល និងស្រុះស្រួលគ្នា ដើម្បីឱ្យក្រុមការងារបានធ្វើការចុះបញ្ជីជូន ហើយក្នុងករណីដែលធ្លីមានទំនាស់ នោះក្រុមការងារមិននៅរង់ចាំនោះទេ ហើយនៅពេលដែលបងប្អូនស្នើរសុំចុះបញ្ជីបំពេញបន្ថែម នោះបងប្អូននឹងត្រូវចំណាយនូវថវិកាផងដែរ។ ជាការគូសបញ្ជាក់ អភិបាលខេត្តកណ្ដាល។

លោកអភិបាលខេត្ត បានបន្តទៀតថា ដីធ្លីបានចុះបញ្ជីមានបណ្ណកម្មសិទ្ធ គឺមានសុវត្ថិភាពនិងជាមូលធនរបស់កម្មសិទ្ធិករ។ ក្នុងន័យនេះ ដីធ្លីបានចុះបញ្ជីមានបណ្ណកម្មសិទ្ធ មានភាពងាយស្រួលក្នុងការយកទៅប្រើប្រាស់តាមសេចក្តីត្រូវការរបស់បងប្អូន ដូចជាយកទៅលក់, ជួល, បញ្ចាំ. ធ្វើអំណោយ ។ល។ ដើម្បីជាទុនក្នុងការប្រកបរបរចិញ្ចឹមជីវិតប្រចាំថ្ងៃ។

 លោក បានបន្ថែមថា ការចែកបណ្ណកម្មសិទ្ធជូនប្រជាពលរដ្ឋនៅពេលនេះ ជាការឆ្លុះបញ្ចាំងឱ្យឃើញអំពីការយកចិត្តទុកដាក់ខ្ពស់ របស់រាជរដ្ឋាភិបាល ក្នុងការធានាកម្មសិទ្ធិដីធ្លីស្របច្បាប់ជូនប្រជាពលរដ្ឋ សំដៅលើកកម្ពស់ជីវភាព សុខុមាលភាព និងការកាត់បន្ថយភាពក្រីក្រ ព្រមទាំងរួមចំណែកដល់ការពង្រឹង យុត្តិធម៌ និងស្ថេរភាពសង្គម៕

ដោយ៖ មឿន ឌីណា (Moeun Dyna)