កំពត៖ លោក ម៉ៅ ធនិន អភិបាលខេត្តកំពត បានអញ្ជើញជាអធិបតីក្នុងពិធីចែកបណ្ណកម្មសិទ្ធិ (វិញ្ញាបនបត្រសម្គាល់ម្ចាស់អចលនវត្ថុ) ជូនពលរដ្ឋចំនួន ៣ភូមិ ស្ថិតក្នុងឃុំចំនួន២ ក្នុងស្រុកឈូក ដែលមានក្បាលដីសរុបចំនួន ៣ ១៦០ បណ្ណ ស្មើនឹង ១ ៦៥៩គ្រួសារ។

លោក ព្រាប សុផាត ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពតបានឱ្យដឹងថា ពិធីចែកវិញ្ញាបនបត្រសម្គាល់ម្ចាស់អចលនវត្ថុនាពេលនេះ មានចំនួន៣ភូមិ ដែលមានក្បាលដីសរុបចំនួន ៣ ១៦០ បណ្ណ ស្មើនឹង ១ ៦៥៩គ្រួសារ។

ពិធីចែកបណ្ណកម្មសិទ្ធិ នៅព្រឹកថ្ងៃទី១៤ ខែមីនា ឆ្នាំ២០២៥ លោក ព្រាប សុផាត បានលើកឡើងពីរបាយការណ៍ថា ភូមិត្រពាំងស្តៅ ឃុំត្រពាំងភ្លាំង មានក្បាលដីសរុបចំនួន ២៨ក្បាលដី ស្មើនឹង ៣គ្រួសារ, ភូមិស្រែជ្រៅ ឃុំល្បើក មានក្បាលដី សរុបចំនួន ១ ៦៨៤ក្បាលដី ស្មើនឹង ៧៨៩គ្រួសារ, ភូមិត្រពាំងគគីរ ឃុំល្បើក មានក្បាលដី សរុបចំនួន ១ ៤៤៨ក្បាលដី ស្មើនឹង ៨៦៧គ្រួសារ។

ក្រោមការដឹកនាំគាំទ្រ និងចង្អុលបង្ហាញដោយផ្ទាល់របស់ ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងអភិបាលខេត្តកំពត លើសម្ភារឧបករណ៍បច្ចេកទេសក្នុងការជំរុញការងារចុះបញ្ជីដីធ្លី មន្ទីរនិងខិតខំពន្លឿនការងារចេញបណ្ណកម្មសិទ្ធិក្នុងខេត្តឱ្យបានចប់រួចរាល់ទាំងអស់ក្នុងឆ្នាំ២០២៥នេះ។ ជាការលើឡើងបន្ត លោកប្រធានមន្ទីរ។

បច្ចុប្បន្ននេះក្រោមការដឹកនាំរបស់ប្រមុខរាជរដ្ឋាភិបាល គឺសម្តេចធិបតី បានគិតគូជានិច្ចនូវកិច្ចការងារពាក់ព័ន្ធនឹងការចុះបញ្ជីដីធ្លីមានលក្ខណៈជាប្រព័ន្ធ ដោយបានដាក់ចុះនៅយន្តការ ក៏ដូចជាការចង្អុលបង្ហាញដោយផ្ទាល់មកកាន់អាជ្ញាធររាជធានី-ខេត្ត និងមន្ទីរជំនាញត្រូវពន្លឿនក្នុងការចុះវាស់វែង និងចេញបណ្ណកម្មសិទ្ធិជូនពលរដ្ឋក្នុងមូលដ្ឋានរបស់ខ្លួនឱ្យបានឆាប់រហ័យបំផុត។​ ជាការថ្លែង លោក ម៉ៅ ធនិន អភិបាលខេត្តកំពត។

អភិបាលខេត្ត បានថ្លែងបន្តថា ការពន្លឿននៃការចេញបណ្ណកម្មសិទ្ធិដីធ្លី ឱ្យបានឆាប់រហ័សនេះ គឺសំដៅឱ្យប្រជាពលរដ្ឋ ដែលមានដីធ្លីច្បាស់លាស់ទាំងអស់ទទួលបាននូវការគ្រប់គ្រងដីធ្លីដោយស្របច្បាប់ ហើយក៏បានជួយកាត់បន្ថយនូវវិវាទដីធ្លី ដែលកើតឡើងដោយការកាន់កាប់ដីធ្លីមិនច្បាស់លាស់។

នាឱកាសនោះ លោក ក៏បានផ្តាំផ្ញើដល់ប្រជាពលរដ្ឋ ដែលទទួលបានបណ្ណកម្មសិទ្ធិនាពេលនេះ សូមរក្សាទុកនូវបណ្ណនេះឱ្យបានត្រឹមត្រូវ ហើយប្រសិនបើយកទៅប្រើប្រាស់ ក៏ត្រូវយកទៅប្រើប្រាស់ឱ្យបានត្រឹមត្រូវដែរ ព្រោះបណ្ណនេះគឺជាទ្រព្យសម្បត្តិមួយ ដែលអាចឱ្យយើងយកទៅពង្រីកមុខរបរបន្ថែមផងដែរ។

ជាមួយគ្នានេះដែរ លោក ក៏បានគូសបញ្ជាក់ថា សកម្មភាពការងាររបស់មន្ត្រីជំនាញដែលបានខិតខំបំពេញការងារក្នុងការចុះបញ្ជីដីធ្លីមានលក្ខណៈជាប្រព័ន្ធគឺជាការគិតគូរនិងយកចិត្តទុកដាក់ខ្ពស់ពី សម្តេចតេជោ បន្តមកដល់សម្តេចធិបតី ជានាយករដ្ឋមន្ត្រី ដោយបានដាក់ចេញនូវគោលនយោបាយពន្ធសូន្យ (ការផ្ទេរកម្មសិទ្ធិពីម្តាយទៅកូន) ជាដើម៕

ដោយ៖ មឿន ឌិណា (Moeun Dyna)