ភ្នំពេញ៖ ដើម្បីចៀសវាងការភាន់ច្រឡំ មន្រ្តីអគ្គនាយដ្ឋានពន្ធដារ បានពន្យល់ពីប្រាក់បំណាច់ បុព្វលាភ និងលាភការ ក្នុងគោលដៅពន្ធលើប្រាក់បៀវត្ស។

កម្មវិធី “ពន្ធដារកម្ពុជា” បានផ្សាយផ្ទាល់នៅលើទំព័រហ្វេសប៊ុកអគ្គនាយកដ្ឋានពន្ធដារ បានលើកយកប្រធានបទ “ពន្ធលើប្រាក់បៀវត្ស (ប្រាក់បំណាច់ បុព្វលាភ និងលាភការ) មកធ្វើបទបង្ហាញ និងពិភាក្សា ដោយមានការចូលរួមពីវាគ្មិន លោក ឆាយ ជាហេង អនុប្រធាននាយកដ្ឋានគ្រប់គ្រងអ្នកជាប់ពន្ធធំ និងលោក ទូច ជាកាដូ ប្រធានការិយាល័យនៃនាយកដ្ឋានគ្រប់គ្រងអ្នកជាប់ពន្ធតូចនិងមធ្យម។

កម្មវិធីនេះ កាលពីថ្ងៃទី២៧ ខែមីនា ឆ្នាំ២០២៥ វាគ្មិន បានលើកឡើងថា ពន្ធលើប្រាក់បៀវត្ស មានវិសាលភាពអនុវត្ត ចំពោះរូបវន្តបុគ្គលនិវាសនជននៅក្នុងព្រះរាជាណាចក្រកម្ពុជា ចំពោះប្រាក់បៀវត្សប្រភពកម្ពុជានិងប្រាក់បៀវត្សប្រភពបរទេស និងរូបវន្ត បុគ្គលអនិវាសនជនចំពោះប្រាក់បៀវត្សប្រភពកម្ពុជា។

ប្រាក់បៀវត្ស សំដៅដល់ ប្រាក់សរុបដែលបានទូទាត់ឱ្យដល់និយោជិត ឬដែលបានទូទាត់ដើម្បីជាផលប្រយោជន៍ផ្ទាល់ ឬប្រយោលដល់និយោជិត ចំពោះការបំពេញសកម្មភាពបម្រើការងាររបស់និយោជិត។ ជាការគូសបញ្ជាក់ វាគ្មិន បានបន្តថា ប្រាក់បៀវត្ស រួមមាន៖ បៀវត្ស ប្រាក់ឈ្នួល លាភការ ប្រាក់បំណាច់ បុព្វលាភ ប្រាក់ម៉ោងបន្ថែម ប្រាក់ប៉ះប៉ូវនានា និងអត្ថប្រយោជន៍បន្ថែម។

ដើម្បីចៀសវាងការភាន់ច្រឡំ វាគ្មិនទាំងពីរ បានលើកយកចំណុចសំខាន់ចំនួន៣ ក្នុងចំណោមប្រភេទប្រាក់បៀវត្ស ផ្សេងទៀត មកពន្យល់និងលើកឧទាហរណ៍បញ្ជាក់ ដូចខាងក្រោម៖

១-ប្រាក់បំណាច់ សំដៅដល់ ប្រាក់បំណាច់មុខងារ ប្រាក់បំណាច់បញ្ចប់កិច្ចសន្យាចំពោះកិច្ចសន្យាការងារដែលមានកំណត់ថិរវេលា ឬ ប្រាក់បំណាច់អតីតភាពការងារចំពោះកិច្ចសន្យាការងារមានថិរវេលាមិនកំណត់ ឬប្រាក់បំណាច់បញ្ឈប់លែងឱ្យធ្វើការ និងប្រាក់បំណាច់ ផ្សេងៗទៀត។

២-បុព្វលាភ សំដៅដល់ ប្រាក់លើកទឹកចិត្ត រួមមាន ប្រាក់រង្វាន់ ប្រាក់លើសផែនការ ប្រាក់បៀវត្សបន្ថែមលើប្រាក់បៀវត្សប្រចាំខែ និង ប្រាក់លើកទឹកចិត្តប្រហាក់ប្រហែល ចំពោះការបំពេញការងាររបស់និយោជិត ដែលជាប្រយោជន៍អាជីវកម្មរបស់និយោជក។ ឧទាហរណ៍៖ ក្រុមហ៊ុន ក ជាក្រុមហ៊ុនអចលនទ្រព្យដែលទទួលបានប្រាក់ចំណូលលើសផែនការប្រចាំឆ្នាំ ហើយក្រុមហ៊ុនបានបើកប្រាក់រង្វាន់លើកទឹកចិត្ត ដល់និយោជិតម្នាក់ៗ ចំនួន ៣ ខែ នៃប្រាក់បៀវត្សប្រចាំខែ។ ដូចនេះ ប្រាក់រង្វាន់លើកទឹកចិត្តដែលនិយោជិតទទួលបាន ត្រូវចាត់ទុកជា បុព្វលាភ។

៣-លាភការ សំដៅដល់ តម្លៃតបស្នងនៃការអនុវត្តការងារ ដែលបន្ថែមលើបៀវត្ស ឬប្រាក់ឈ្នួល ក្នុងន័យជាសគុណ នៃការបំពេញកិច្ចការអ្វីមួយដល់និយោជក។ ឧទាហរណ៍៖ កញ្ញា ខ ជាគណនេយ្យករ នៅក្នុងក្រុមហ៊ុន ក ដែលមាន សកម្មភាពអាជីវកម្មជាគោលដើម ជាអ្នកផ្គត់ផ្គង់ផលិតផលកសិកម្ម។ កញ្ញា ខ ត្រូវបានក្រុមហ៊ុនអញ្ជើញឱ្យជួយថតផ្សាយពាណិជ្ជកម្ម ដែលក្រុមហ៊ុននឹងផ្តល់កម្រៃពីការថតផ្សាយពាណិជ្ជកម្ម។ ដូចនេះ ប្រាក់កម្រៃពីការថតផ្សាយពាណិជ្ជកម្មរបស់កញ្ញា ខ ត្រូវបានចាត់ ទុកជាលាភការ៕

ដោយ៖ មឿន ឌីណា (Moeun Dyna)