ភ្នំពេញ៖ នៅឆ្នាំ២០២៤ វិស័យសំណង់ និងអចលនទ្រព្យក្នុងប្រទេសកម្ពុជា មានសញ្ញាវិជ្ជមានឡើងវិញ ក្នុងនោះ ការផ្ដល់ឥណទានក្នុងវិស័យសំណង់ និងអចលនទ្រព្យ បានកើនទំហំទឹកប្រាក់ ១៣,៥១ពាន់លានដុល្លារ។ តាមរបាយការណ៍របស់ធនាគារជាតិនៃកម្ពុជា។
ឥណទានក្នុងវិស័យសំណង់មានទំហំទឹកប្រាក់ប្រមាណ ២៩ ១៩៩ពាន់លានរៀល ឬស្មើនឹងប្រមាណ ៧,៣ពាន់លានដុល្លារ បើប្រៀបធៀបនឹងឆ្នាំ២០២៣ មានការកើនឡើងប្រមាណ ៣៣,៣%។ បើតាមរបាយការណ៍ដែលគិតត្រឹមខែតុលា ឆ្នាំ២០២៤។
របាយការណ៍នេះ បានបន្តថា ចំណែកការផ្ដល់ឥណទានទៅក្នុងវិស័យអចលនទ្រព្យមានទំហំទឹកប្រាក់ប្រមាណ ២៤ ៨៦៣ពាន់លានរៀល ឬស្មើនឹងប្រមាណ ៦,២១ពាន់លានដុល្លារ បើប្រៀបធៀបនឹងឆ្នាំ២០២៣ កើនឡើងប្រមាណ១៧,៨%។
ការផ្ដល់ឥណទានពីគ្រឹះស្ថានធនាគារ និងហិរញ្ញវត្ថុទៅក្នុងវិស័យសេដ្ឋកិច្ច គិតត្រឹមខែតុលា ឆ្នាំ២០២៤ មានទំហំទឹកប្រាក់សរុបប្រមាណ ២៤៧ ៦៣១ពាន់លានរៀល ឬស្មើនឹងប្រមាណ ៦០,៩ពាន់លានដុល្លារកើនប្រមាណ ២,២% ធៀបនឹងឆ្នាំ២០២៣។ បើតាមរបាយការណ៍ដដែល បានបន្ថែមថា ការកើនឡើងនេះ រួមចំណែកចម្បងដោយកំណើនឥណទានទៅកាន់វិស័យជួញដូរដុំ និងរាយ សំណង់ អចលនទ្រព្យ និងកម្មន្តសាល។
ក្នុងឆ្នាំ២០២៤ គម្រោងសំណង់ទូទាំងប្រទេសមានចំនួន ២ ៦២២គម្រោង មានផ្ទៃក្រឡាកម្រាលសំណង់សរុប ចំនួនជាង១០លានម៉ែត្រក្រឡា និងមានតម្លៃប៉ាន់ស្មានទុនវិនិយោគសរុបប្រមាណ ៤ ៣៣៤លានដុល្លារ។ បើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់។
បើតាមរបាយការណ៍ក្រសួងរៀបចំដែនដី គម្រោងសាងសង់អគារខ្ពស់ចាប់ពី ៥ជាន់ឡើងទៅ ក្នុងឆ្នាំ២០២៤ មានចំនួន១៦៥គម្រោង ស្មើនឹង ១៨៤អគារ បុរីលំនៅឋានមានចំនួន ២៩គម្រោង ស្មើនឹង ៨ ០៨៥ខ្នង អគារផ្ទះល្វែង មានចំនួន១០ ៣៦៨ល្វែង អគារស្នាក់នៅរួមមានចំនួន៩៣គម្រោង សំណង់អគារសណ្ឋាគារចំនួន ១២គម្រោង សំណង់អគារពាណិជ្ជកម្មមាន ១៥១គម្រោង សំណង់អគាររោងចក្រមានចំនួន ១១៨គម្រោង និងអគារពហុមុខងារមានចំនួន ១៨គម្រោង៕
ដោយ៖ មឿន ឌីណា (Moeun Dyna)
