ព្រះសីហនុ៖ គម្រោងវិនិយោគ និងធុរកិច្ចចំនួន ២៥ទៀត ទុនវិនិយោគសរុប ៩១៧លានដុល្លារ ក្នុងខេត្តព្រះសីហនុ ទទួលបានការលើកទឹកចិត្តពិសេស។

លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ បានដឹកនាំកិច្ចប្រជុំលើកទី១១ ដើម្បីពិនិត្យគម្រោងវិនិយោគ និងធុរកិច្ច ដែលបានស្នើការលើកទឹកចិត្តការអនុគ្រោះ និងការសម្រួលនីតិវិធីក្នុងក្របខ័ណ្ឌ «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» ដោយបានសម្រេចជាគោលការណ៍ផ្តល់ការលើកទឹកចិត្តពិសេសដល់គម្រោងចំនួន២៥ មានទុនវិនិយោគសរុប ៩១៧លានដុល្លារ។

បើតាមកិច្ចប្រជុំ កាលព្រឹកថ្ងៃទី២៤ ខែ តុលា ឆ្នាំ ២០២៤ លោក ឡុង ឌីម៉ង់ អភិបាលរងខេត្តព្រះសីហនុ បានតំណាងរដ្ឋបាលខេត្តចូលរួម ក្នុងឱកាសនេះ លោក បានលើកឡើងថា ចាប់ពីដើមឆមាសទី២ ឆ្នាំ២០២៤ យើងឃើញមានកំណើនភ្ញៀវទេសចរបរទេសពីសហភាពអឺរ៉ុប និងប្រទេសនានា ដែលជាសញ្ញាវិជ្ជមានសម្រាប់ការធ្វើពិពិធកម្មវិនិយោគ និងទេសចរ។

លោក អភិបាលរងខេត្ត បានបន្តថា ជាមួយគ្នានេះ វិស័យឯកជនកាន់តែយល់ដឹង និងបានសម្រេចចិត្តវិនិយោគក្នុងខេត្ត  ពិសេសចាប់តាំងពី​ពាក់កណ្តាលឆ្នាំ២០២៤ រួមទាំងការវិនិយោគដែលតម្រង់ទិស ឬផ្តោតការវិនិយោគលើវិស័យនានាក្រៅពីកាស៊ីណូ។

ជាលទ្ធផល អង្គប្រជុំបានសម្រេចជាគោលការណ៍ផ្តល់ការលើកទឹកចិត្តពិសេស ដល់គម្រោងចំនួន ២៥គម្រោង ក្នុងនោះ គម្រោងពាក់ព័ន្ធនឹងអគារជាប់គាំង ចំនួន១២, គម្រោងថ្មីចំនួន១២, និងការពង្រីកគម្រោង ចំនួន១ មានទុនវិនិយោគសរុប ៩១៧លានដុល្លារ។ គម្រោងទាំងនេះមានដូចជា៖ រោងចក្រផលិតសម្ភារបរិក្ខារតុបតែងលំអគេហដ្ឋាន, រោងចក្រផលិតកាបូប, រោងចក្រផលិតសម្ភារពីក្រដាស, អគារពហុមុខងារ, អគារស្នាក់នៅរួម, សណ្ឋាគារ, ភោជនីយដ្ឋាន និង រមណីយដ្ឋាន។

គូសបញ្ជាក់ថា ក្នុងចំណោមគម្រោងដែលទទួលបានការលើកទឹកចិត្តខាងលើ ក៏មាន​គម្រោងរមណីយដ្ឋានទេសចរណ៍នៅលើកោះរ៉ុង ដែលវិនិយោគ​ដោយជនជាតិប៉ូឡូញ ដើម្បីទាក់ទាញភ្ញៀវទេសចរពីអឺរ៉ុប និងប្រទេស​នានា។

សូមរម្លឹកផងដែរថា បន្ទាប់ពីការប្រកាសដាក់ឱ្យអនុវត្តជាផ្លូវការដោយ សម្តេចធិបតី នាយករដ្ឋមន្ត្រីកម្ពុជា កាលថ្ងៃទី៣១ ខែមករា ឆ្នាំ២០២៤ ក្រុមការងារបានសម្រេច​ជាគោលការណ៍ផ្តល់ការលើកទឹកចិត្តពិសេសចំនួន ១៤០គម្រោង រួច​មក​។

​គិតត្រឹមខែកញ្ញាកន្លងទៅ បើរាប់បញ្ចូលទាំងគម្រោង​ដែល​ទទួលបានការឯកភាពជាគោលការណ៍ គិត​ត្រឹម​ខែតុលានេះ គម្រោងដែលទទួលបានគោលការណ៍លើកទឹកចិត្តពិសេសសរុបចំនួន ១៦៥គម្រោង រួមមានគម្រោងខ្នាតមីក្រូ តូច មធ្យម និងធំរបស់ម្ចាស់​គម្រោង និងក្រុមហ៊ុនក្នុងស្រុក និងបរទេស មានវិសាលភាព​នៅគ្រប់ក្រុងស្រុកនៃ​ខេត្ត​ព្រះ​សីហនុ ក្នុងនោះ គម្រោងមាន​ទុនវិនិយោគលើសពី ១០០លានដុល្លារមានចំនួន ២៣គម្រោង។

ក្នុងចំណោម គម្រោងទាំង១៦៥ គម្រោងពាក់ព័ន្ធនឹងអគារ​ជាប់​គាំងមានចំនួន៨៥, គម្រោងថ្មីមានចំនួន៦១, ការពង្រីកគម្រោងមានចំនួន១៥ និងគម្រោងមានស្រាប់មានចំនួន៤។ គម្រោងទាំង​នេះ ក៏រាប់បញ្ចូលគម្រោងដែលមានសក្តានុពលសំខាន់ៗ ដូចជា គម្រោងផលិតផ្ទាំងសូឡានិងគ្រឿងបង្គុំ, គម្រោងមជ្ឈមណ្ឌលពាណិជ្ជ​កម្ម, និងគម្រោងសួនកសិ-ឧស្សាហកម្ម ជាដើម៕

ដោយ៖ មឿន ឌីណា (Moeun Dyna)