ភ្នំពេញ៖ ទំហំពាណិជ្ជកម្មកម្ពុជា-អន្តរជាតិ ពី​ខែមករា-​ខែកញ្ញា ឆ្នាំ​២០២៤ មានទឹកប្រាក់សរុប ៤០,៩៤ពាន់លានដុល្លារ កើន១៦,៤% បើធៀបនឹងឆ្នាំ២០២៣ មានចំនួន ៣៥,១៦ពាន់លានដុល្លារ។ បើតាម ស្ថិតិ​របស់​អគ្គ​នាយក​ដ្ឋាន​គយ និង​រដ្ឋាករ​កម្ពុជា​(GDCE)។

ការនាំចេញទំនិញរបស់កម្ពុជាមានចំនួន ១៩,៨៣ពាន់លានដុល្លារ កើន១៧% ពីចំនួន ១៦,៩៤ពាន់លានដុល្លារ និងទំនិញនាំចូលពីក្រៅប្រទេសមានចំនួន ២១,១ពាន់លានដុល្លារ កើន១៥,៩% ពីចំនួន ១៨,២១ពាន់លានដុល្លារ។ បើតាម ស្ថិតិ GDCE ដដែល។

បើតាម ស្ថិតិ GDCE ដដែល សម្រាប់ពាណិជ្ជកម្មអន្តរជាតិក្នុងខែកញ្ញា ឆ្នាំ២០២៤ គឺមានទឹកប្រាក់សរុប ៤,៤៦ពាន់លានដុល្លារ កើន ១៦,១៨% បើធៀបខែកញ្ញា ឆ្នាំ២០២៣។ ទំនិញកម្ពុជានាំចេញចំនួន ២,២៥ពាន់លានដុល្លារ កើន ១៩,៨% និងនាំចូល ២,២ពាន់លានដុល្លារ កើន១២,៧%។

គួររម្លឹកផងដែរថា ​ឆ្នាំ​២០២៣ ទឹកប្រាក់​ពាណិជ្ជកម្ម​អន្តរជាតិ​របស់​កម្ពុជា មាន​សរុប​ជាង ៤៦,៨៣​ពាន់​លាន​ដុល្លារ ធ្លាក់​ចុះ ១,៩% ​ធៀប​នឹង​ឆ្នាំ​២០២២ ក្នុងនោះ​ កម្ពុជា​នាំចេញ​ជាង ២២,៦៤​ពាន់​លាន​ដុល្លារ កើន១,៨% និង​នាំចូល​មកវិញ​ជិត ២៤,១៨​ពាន់​លាន​ដុល្លារ ធ្លាក់​ចុះ ៥%​។

ទោះ​បី​ស្ថាន​ភាព​នយោបាយ​ពិភពលោក​​ក្នុង​ពេល​នេះ​មិន​ទាន់​ល្អ​ ប៉ុន្តែ​កម្ពុជា​មាន​សក្តានុពល​គ្រប់​គ្រាន់​ក្នុង​ការ​ពង្រីក​ការ​ធ្វើ​ពាណិជ្ជកម្ម​អន្តរ​ជាតិ​របស់​ខ្លួន​កាន់​តែ​ប្រសើរ​។ បើតាមភ្នំពេញ​ប៉ុស្តិ៍ស្រង់សំដី លោក ឡោ វិចិត្រ អនុ​ប្រធាន​សមាគម​ពាណិជ្ជកម្ម​កម្ពុជា-ចិន។

 ​លោក ឡោ វិចិត្រ បានបញ្ជាក់ថា ​មូល​ហេតុ​​ធំៗ​​ដែល​ជួយ​ឱ្យ​កម្ពុជា​អាច​រក្សា​បាន​កំណើន​ពាណិជ្ជកម្ម​អន្តរជាតិ ព្រម​ទាំង​អាច​ទាក់​ទាញ​បាន​ការ​វិនិយោគ​ថ្មីៗ និង​គម្រោង​ពង្រីក​អាជីវកម្ម​ជាបន្ត​បន្ទាប់​ គឺ​ដោយសារ​ កម្ពុជា​មាន​ស្ថិរភាព​នយោបាយ​ល្អ ​តម្លៃ​ប្រាក់​ឈ្នួល​ពលកម្ម​សមរម្យ ច្បាប់​វិនិយោគ ព្រម​ទាំង​ច្បាប់​ពន្ធដារ និង​គយ មាន​លក្ខណៈ​អនុគ្រោះ​​៕

ដោយ៖ មឿន ឌីណា (Moeun Dyna)