កំពង់ធំ៖ ក្រសួងអភិវឌ្ឍន៍ជនបទ គ្រោងសាងសង់ផ្លូវជនបទ ២ខ្សែទ្បើងវិញ ប្រវែងសរុប ២៦,៩គីឡូម៉ែត្រ ជាផ្លូវក្រាលកៅស៊ូពីរជាន់ (DBST) ឬបេតុង ទៅតាមស្ថានភាពជាក់ស្ដែងដែលរងផលប៉ះពាល់។ បើតាមកិច្ចប្រជុំដំណើរការអនុវត្តគម្រោងនេះ។
លោក ផូ ផារិទ្ធ រដ្ឋលេខាធិការ និងជានាយកគម្រោង តំណាងរដ្ឋមន្ត្រីក្រសួងអភិវឌ្ឍន៍ជនបទ លោក លឹម អ៊ីវ អនុរដ្ឋលេខាធិការ និងជាប្រធានគ្រប់គ្រងគម្រោង ព្រមទាំងមានតំណាងក្រុមការងារ នៃធនាគារវិនិយោគហេដ្ឋារចនាសម្ព័ន្ធអាស៊ី(AIIB) បានដឹកនាំកិច្ចប្រជុំស្តីពីកិច្ចដំណើរការអនុវត្តគម្រោង និងបទបង្ហាញអាទិភាពខ្សែផ្លូវ សម្រាប់ដាក់បញ្ចូលក្នុងគម្រោងសាងសង់ទ្បើងវិញបន្ទាន់ផ្លូវជនបទ(ERRRP/AIIB)។
បើតាមកិច្ចប្រជុំនេះ មានការចូលរួមពី លោក តាន់ វាសនា ប្រធានមន្ទីរស្តីទី និងលោក គួង គា មន្រ្តីបច្ចេកទេសគម្រោង នៅថ្ងៃទី ២៧ ខែសីហា ឆ្នាំ២០២៤ នៅសាលប្រជុំមន្ទីរអភិវឌ្ឍន៍ជនបទខេត្តកំពង់ធំ។
បន្ទាប់ពីបញ្ចប់កិច្ចប្រជុំ រដ្ឋលេខាធិការ បានបន្តដឹកនាំក្រុមការងារចុះពិនិត្យខ្សែផ្លូវជាអាទិភាពផ្ទាល់ទាំង ២ខ្សែ។
គួរបញ្ចាក់ផងដែរថា ការស្តារទ្បើងវិញចំពោះខ្សែផ្លូវទាំង ២ខ្សែ គម្រោងគ្រោងនឹងស្ថាបនាទៅជាផ្លូវក្រាលកៅស៊ូពីរជាន់ (DBST) ឬបេតុង ទៅតាមស្ថានភាពជាក់ស្ដែងដែលរងផលប៉ះពាល់។
ផ្លូវទាំង ២ខ្សែ មានប្រវែងសរុប ២៦,៩គីឡូម៉ែត្រ រួមមាន៖
-ខ្សែទី១ ផ្លូវព្រែកស្បូវ-កោះគ្របបាយ ប្រវែង ១១,៧គីឡូម៉ែត្រ ស្ថិតក្នុងសង្កាត់អូរកន្ធរក្រុងស្ទឹងសែន និងឃុំក្តីដូង ឃុំកំពង់គោ ស្រុកកំពង់ស្វាយ ខេត្តកំពង់ធំ។
-ខ្សែទី២ ផ្លូវបាក់ស្រី-ទំនប់ ប្រវែង ១៥,២គីឡូម៉ែត្រ ស្ថិតក្នុងឃុំគោល និងឃុំស្រើង ស្រុកប្រាសាទសំបូរ ខេត្តកំពង់ធំ៕
ដោយ៖ មឿន ឌីណា (Moeun Dyna)
