ភ្នំពេញ៖ ទំនាក់ទំនងពាណិជ្ជកម្មកម្ពុជានិងដៃគូអន្តរជាតិ មានទឹកប្រាក់ជាង ៤ពាន់លានដុល្លារ កើន១៦.៩% ដើមឆ្នាំ២០២៤ ក្នុងនោះ កម្ពុជានាំចេញទឹកប្រាក់ ១ ៩៦៧លានដុល្លារ កើន២៧% ចំណែក ការនាំចូលវិញមានទឹកប្រាក់ ២ ០៩០លានដុល្លារ កើន៨.៧%។ តាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា។
បើផ្អែកតាមតួលេខខាងលើ គឺពាណិជ្ជកម្មអន្តរជាតិកម្ពុជា ក្នុងខែមករា ឆ្នាំ២០២៤ មានទឹកប្រាក់សរុប ៤,០៦ពាន់លានដុល្លារ កើន១៦,៩% ពី ៣,៤៧ពាន់លានដុល្លារ ក្នុងខែមករា ឆ្នាំ២០២៣។ បើតាមបញ្ជាក់នៅក្នុងរបាយការណ៍ សម្រាប់តុល្យភាពជញ្ជីងពាណិជ្ជកម្មខែមករា ឆ្នាំ២០២៤ កម្ពុជាមានឱនភាព ១២៣,០៩លានដុល្លារ ខណៈ ក្នុងខែមករា ឆ្នាំ២០២៣ មានចំនួន ៣៧៣,៨៩លានដុល្លារ។
ដៃគូពាណិជ្ជកម្មសំខាន់ៗរបស់កម្ពុជា គឺចិន ដែលសម្រេចបានទំហំពាណិជ្ជកម្មជាង ១.១ពាន់លានដុល្លារ កើន១៨.៧% ដោយកម្ពុជានាំចេញទៅចិន ក្នុងតម្លៃ ១២១លានដុល្លារ កើន៥០.១% ខណៈ ចិននាំចូលវិញក្នុងតម្លៃជាង ១ពាន់លានដុល្លារ កើនឡើង១៥.១%។
ទំហំពាណិជ្ជកម្មរវាងកម្ពុជា និងវៀតណាម មានតំហំជាង ៦៧៧លានដុល្លារ កើន ៤១.៥% កម្ពុជានាំចេញទៅវៀតណាម ក្នុងតម្លៃ ៣៧៣លានដុល្លារ កើន ១១៦.៦% ខណៈ វៀតណាមនាំចូលវិញក្នុងតម្លៃជាង ៣០៤លានដុល្លារ ថយចុះ០.៦%។
រីឯ ការនាំចេញនាំចូលរវាងកម្ពុជា និងសហរដ្ឋអាមេរិកវិញ មានទំហំជាង ៦៤៤លានដុល្លារ កើន១០.៨% កម្ពុជានាំចេញទៅសហរដ្ឋអាមេរិក ក្នុងតម្លៃ ៦២៦លានដុល្លារ កើន១១.៤% ខណៈ សហរដ្ឋអាមេរិកនាំចូលវិញក្នុងតម្លៃជាង ១៧លានដុល្លារ ថយចុះ៨%។
ជាមួយគ្នានេះ ប្រទេសជាដៃគូរពាណិជ្ជកម្មសំខាន់ៗដទៃទៀតមានដូចជាថៃ ជប៉ុន ឥណ្ឌូនេស៊ី កាណាដា សិង្ហបុរី អេស្ប៉ាញ ជាដើម។
ការងើបឡើងវិញជាបណ្តើរៗកំណើនសេដ្ឋកិច្ចសកល ស្របពេលសមត្ថភាពផលិតកម្មនៅកម្ពុជាកំពុងកើនឡើង បានធ្វើឱ្យទឹកប្រាក់ការផ្លាស់ប្តូរទំនិញជាមួយប្រទេសដៃគូនានា ពិសេសទឹកប្រាក់នាំចេញរបស់កម្ពុជាបានកើនឡើងគួរឱ្យកត់សម្គាល់នាខែទី១ ឆ្នាំ ២០២៤។ បើតាមការលើកឡើង លោក លឹម ហេង អនុប្រធានសភាពាណិជ្ជកម្មកម្ពុជា។
បើតាម លោក លឹម ហេង ដែលភ្នំពេញប៉ុស្តិ៍ បានស្រង់សំដី បានបន្តថា សម្រាប់កំណើនទឹកប្រាក់នាំចេញរបស់កម្ពុជា គឺដោយសារកត្តាចម្បងចំនួន២ ទី១-ការកើនឡើងនៃសមត្ថភាពផលិតកម្មក្នុងស្រុកដែលបានពីកំណើនរោងចក្រ/សហគ្រាស និងកំណើនទិន្នផលក្នុងវិស័យកសិកម្ម និងទី២-កម្ពុជាមានទីផ្សារនាំចេញធំៗដែលទទួលបានពីការផ្តល់ប្រព័ន្ធអនុគ្រោះពន្ធគយនាំទំនិញទៅប្រទេសមួយចំនួន ព្រមទាំងការចូលជាធរមាននៃកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី ដែលកម្ពុជាបានចុះហត្ថលេខា។
សេដ្ឋកិច្ចប្រទេសកម្ពុជាក្នុងឆ្នាំ២០២៤ ត្រូវបានព្យាករនឹងសម្រេចបានកំណើនក្នុងរង្វង់ ៦,៦% នឹងធ្វើឱ្យផលិតផលក្នុងស្រុកសរុប ថ្លៃបច្ចុប្បន្នស្ថិតក្នុងរង្វង់ ១៤ ២៩៥៧ពាន់លានរៀល (សមមូលនឹង ៣៥ ១៦៨លានដុល្លារ)។ បើតាមឯកសារថវិកាសង្ខេប ឆ្នាំ២០២៤ (Budget in Brief Fiscal year 2024) នៃក្រសួងសេដ្ឋកិច្ច និងហិរញ្ញវត្ថុ ក្នុងនោះទុនបម្រុងអន្តរជាតិរបស់កម្ពុជា ឆ្នាំ២០២៤ ត្រូវបានព្យាករ នឹងមានចំនួន ២១,២៨ពាន់លានដុល្លារ ពីចំនួនប៉ាន់ស្មាន ១៩,៤៤ពាន់លានដុល្លារ នៅក្នុងឆ្នាំ២០២៣ និងចំនួន ១៧,៨ពាន់លានដុល្លារ ក្នុងឆ្នាំ២០២២៕
ដោយ៖ មឿន ឌីណា (Moeun Dyna)
