ភ្នំពេញ៖ គម្រោងវិនិយោគក្នុងវិស័យសំណង់ទូទាំងប្រទេសមានចំនួន ២ ៦៣៣គម្រោង ត្រូវបានអនុម័តដែលមានផ្ទៃក្រឡាកម្រាលសរុបជាង១០លានម៉ែត្រក្រឡា តម្លៃប៉ាន់ស្មានទុនប្រមាណ ៤,៣៣ពាន់លានដុល្លារ អគារកម្ពស់ចាប់ពី ៥ជាន់។ បើតាមរបាយការណ៍ ក្រសួងរៀបចំដែនដី នគរូបនីយកម្ម និងសំណង់។
គម្រោងវិនិយោគចំនួន ២ ៦២២គម្រោង មានការថយចុះប្រមាណ ១៥,១៧% ធៀបនឹងឆ្នាំ២០២៣ មានចំនួន ២ ៩២៤គម្រោង មានផ្ទៃក្រឡាសំណង់ចំនួនជាង ១២លានម៉ែត្រក្រឡា ទុនវិនិយោគប្រមាណ ៥,១ពាន់លានដុល្លារ។ បើតាមរបាយការណ៍ខាងលើ។
បើតាមរបាយការណ៍ដដែល គម្រោងវិនិយោគទាំង ២ ៦២២គម្រោង ក្នុងនោះ ដែនសមត្ថកិច្ចរបស់ក្រសួងរៀបចំដែនដី នគរូបនីយកម្ម និងសំណង់មានចំនួន ២៩៣គម្រោង មានផ្ទៃក្រឡាសំណង់ជាង ៩,២លានម៉ែត្រក្រឡា និងមានតម្លៃប៉ាន់ស្មានប្រមាណ ៨៨០លានដុល្លារ ធៀបនឹងឆ្នាំ២០២៣ បានថយចុះប្រមាណ ១៧,២៦%។
ចំណែក គម្រោងវិនិយោគដែលស្ថិតក្នុងដែនសមត្ថកិច្ចរដ្ឋបាលរាជធានី/ខេត្ត មានចំនួន ២ ៣២៩គម្រោង មានផ្ទៃក្រឡាកម្រាលសំណង់ចំនួន ១,១៦លានម៉ែត្រក្រឡា និងទុនវិនិយោគប្រមាណ ៤៥៣លានដុល្លារ ធៀបនឹងឆ្នាំ២០២៣មានការកើនឡើង ៨,៣១%។ បើតាមប្រភពលើ។
បើតាមរបាយការណ៍ដដែលនេះ បានបង្ហាញនៅសន្និបាតបូកសរុបលទ្ធផលការងារឆ្នាំ២០២៤ និងទិសដៅការងារបន្តសម្រាប់ឆ្នាំ២០២៥ របស់ក្រសួងរៀបចំដែនដី នគរូបនីយកម្ម និងសំណង់ នាថ្ងៃ២៦ ខែវិច្ឆិកា ឆ្នាំ២០២៤ គិតចាប់ពីឆ្នាំ ២០០០ ដល់ឆ្នាំ២០២៤ ក្រសួងរៀបចំដែនដី បានចេញលិខិតអនុញ្ញាតសាងសង់នៅទូទាំងប្រទេសចំនួន ៦៧ ៦៩៦គម្រោង មានផ្ទៃក្រឡាកម្រាលសំណង់សរុបចំនួនជាង ១៩៧លានម៉ែត្រក្រឡា និងមានតម្លៃប៉ាន់ស្មានទុនវិនិយោគសរុបប្រមាណ ៧៨ ៩៦៩លានដុល្លារ។
គិតចាប់ពីឆ្នាំ២០០០-២០២៤ គម្រោងអគារខ្ពស់ៗ ចាប់ពី៥ជាន់ឡើង នៅទូទាំងប្រទេសមានចំនួន ២ ៩០៣អគារ ដោយនៅរាជធានីភ្នំពេញមានចំនួន ១ ៨២៤អគារ ខេត្តព្រះសីហនុមានចំនួន ៧៣៨អគារ ខេត្តបន្ទាយមានជ័យមានចំនួន ២៧២អគារ និងបណ្ដាខេត្តនិងតំបន់ផ្សេងទៀតមានចំនួន ៦៩អគារ៕
ដោយ៖ មឿន ឌីណា (Moeun Dyna)
