ភ្នំពេញ៖ រយៈពេល១២ខែ ឆ្នាំ២០២៣ ការដោះដូរពាណិជ្ជកម្មរបស់កម្ពុជា ជាមួយអន្តរជាតិ សម្រេចបានទឹកប្រាក់ប្រមាណ ៤៦,៨២៨,០៣២,០០០ដុល្លារ ធ្លាក់ចុះ ១,៩% បើធៀបឆ្នាំ២០២២។ បើតាមតាមរបាយការណ៍ របស់អគ្គនាយកដ្ឋានគយនិងរដ្ឋាករកម្ពុជា បានបន្តថា កម្ពុជានាំចេញទំនិញទៅទីផ្សារអន្តរជាតិ មានទឹកប្រាក់ចំនួន ២២,៦៤៤,៩៨៩,០០០ដុល្លារ កើន ១.៨%។
កម្ពុជានាំចូលទំនិញក្នុងបរិមាណចំនួន ២៤,១៨៣,០៤៣,០០០ដុល្លារ ធ្លាក់ចុះ ៥% បើធៀបនឹងឆ្នាំ២០២២ ចំនួន ២៥,៤៦០,៤៣៤,០០០ដុល្លារ។ បើតាមរបាយការណ៍ដដែល។
របាយការណ៍ដដែល បានបន្តទៀតថា ចំនួនទឹកប្រាក់នាំចេញ-នាំចូលទំនិញនេះ បានធ្វើឱ្យជញ្ជីងពាណិជ្ជកម្មកម្ពុជាក្នុងឆ្នាំ២០២៣ មានឱនភាពប្រមាណ ១,៥៤ពាន់លានដុល្លារ ប៉ុន្តែ វាមានភាពល្អប្រសើរជាងឆ្នាំ២០២២ ដែលឱនភាពមានរហូតដល់ ៣,២១ពាន់លានដុល្លារ។
បើតាមរបាយការណ៍បានបញ្ជាក់ថា ប្រទេសដែលជាទីផ្សារសំខាន់ៗ របស់កម្ពុជារួមមាន៖ ទេសចិន មានទឹកប្រាក់ជាង ១២ពាន់លានដុល្លារ កើន ៥%, អាមេរិក មានទឹកប្រាក់ជាង ៩ពាន់លានដុល្លារ ថយ ១.៤%, វៀតណាមជាង ៦ពាន់លានដុល្លារ កើន ៧.៣%, ប្រទេសជប៉ុនជាង ១ពាន់លានដុល្លារ ធ្លាក់ ៧.២% និងបណ្តាទីផ្សារសំខាន់ៗមួយចំនួនទៀត។
សម្រាប់ពាណិជ្ជកម្មអន្តរជាតិក្នុងខែធ្នូ ឆ្នាំ២០២៣ គឺមានទឹកប្រាក់សរុប ៤,៣៣ពាន់លានដុល្លារ កើន ២,៩៨%។ ទំនិញកម្ពុជា នាំទៅទីផ្សារអន្តរជាតិមានចំនួន ២,១៥ពាន់លានដុល្លារ កើន ៧,១% និងនាំចូល ២,១៧៣ពាន់លានដុល្លារ ធ្លាក់ ០,៨%។ បើតាមប្រភពដដែល៕
ដោយ៖ មឿន ឌីណា (Moeun Dyna)
