ភ្នំពេញ៖ រយៈពេល១១ខែ ឆ្នាំ២០២៣ កម្ពុជាទទួលបានចំណូលពីការនាំចេញផ្លែមៀនស្រស់ចំនួន ១៨.៥៤លានដុល្លារ កើន ៩៥៦.៥៦%។ បើតាមរបាយការណ៍ របស់ក្រសួងពាណិជ្ជកម្ម។
លោក ឈិន កេន នាយកគ្រប់គ្រង Advance Digital World Trade (ADWT) បានមានប្រសាសន៍ថា បន្ទាប់ពីមានការអនុញ្ញាតឱ្យនាំចូលមៀនស្រស់ ដោយត្រង់ពីប្រទេសកម្ពុជាទៅប្រទេសចិនរួចមកកត់សម្គាល់ឃើញថា ការនាំចេញផ្លែមមៀនស្រស់កម្ពុជាមានការកើនឡើង ពិសេស អំឡុងពេលចូលឆ្នាំចិនទីផ្សារផ្លែមៀននៅប្រទេសចិន មានតម្រូវការខ្ពស់។
បើតាម នាយកគ្រប់គ្រង បានបន្តថា បច្ចុប្បន្ន ទីផ្សារធំរបស់កម្ពុជា ក្នុងការនាំចេញផ្លែមៀនស្រស់រួមមាន ថៃ និង ចិន ការនាំចេញផ្លែមៀនស្រស់មានបរិមាណពី ១៥,០០០ទៅ ២០,០០០តោន ក្នុងមួយឆ្នាំ ជាមួយគ្នានេះសង្ឃឹមថា កំណើននេះនឹងបន្ដកើនឡើងនៅឆ្នាំបន្តបន្ទាប់ទៀតផងដែរ។
ការកើនឡើងយ៉ាងលឿននេះ ដោយសារតែកម្ពុជា-ចិន បានចុះ MoU ដើម្បីបញ្ជាទិញមៀនខ្មែរពីសំណាក់ក្រុមហ៊ុនដ៏ធំរបស់ចិន ដែលនាំផ្លែឈើយកទៅលក់ក្នុងប្រទេសចិន និងដោយមានការសហការដៃគូ ជាមួយក្រុមហ៊ុនយក្ស Alibaba ជាដើម។ ជាការបន្ថែម លោក ឈិន កេន។
គូសបញ្ជាក់ថា ចាប់ពីខែមករា ដល់ថ្ងៃទី២៧ ខែតុលា ឆ្នាំ២០២៣ កម្ពុជាបាននាំចេញផ្លែមៀនស្រស់ ទៅចិនមានចំនួន ១១,៤០៣.២៣តោន។ មិនមែនត្រឹមតែនាំទៅចិន សហគ្រាសកម្ពុជាកំពុងកែច្នៃផ្លែមៀន ទៅជាដំណាប់មៀន ផ្លែមៀនកំប៉ុង ទឹកមៀនកៀប និងស្រាមៀន ដាក់លក់នៅតាមផ្សារទំនើបនានានៅក្នុងប្រទេសផងដែរ៕
ដោយ៖ មឿន ឌីណា (Moeun Dyna)
