ភ្នំពេញ៖ តារាងស្ថិតិជញ្ជីងពាណិជ្ជកម្មទំនិញ តាមអគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា ចាប់ខែមករា ដល់ខែវិច្ឆិកា ឆ្នាំ២០២៣ ការនាំទំនិញពីកម្ពុជាទៅប្រទេសចិនមានទឹកប្រាក់ ១,៣១ពាន់លានដុល្លារ កើនឡើង ១៨,៥ % បើធៀបនឹងគ្រាដូចគ្នាឆ្នាំ២០២២ មានចំនួន ១,១១ពាន់លានដុល្លារ។ ខណៈ ទំនិញប្រទេសចិននាំមកកម្ពុជា មានចំនួន ៩,៧៦ពាន់លានដុល្លារ កើនឡើង ៣,១% ពីចំនួន ៩,៤៧ពាន់លានដុល្លារ។
សម្រាប់ ទឹកប្រាក់នៃពាណិជ្ជកម្មទ្វេភាគី គឺមានចំនួន ១១,០៨ពាន់លានដុល្លារ កើន ៤,៧% ពីចំនួន ១០,៥៨ពាន់លានដុល្លារ។ បើតាមការបន្តស្ថិតិខាងលើ បានបញ្ជាក់ថា ប្រទេសចិន គឺជាដៃគូពាណិជ្ជកម្មធំជាងគេរបស់កម្ពុជា។
ទំហំពាណិជ្ជកម្មរវាងប្រទេសទាំង២ បានគ្របដណ្តប់ ២៦,០៦% នៃទំហំពាណិជ្ជកម្មអន្តរជាតិរបស់កម្ពុជា រយៈពេល ១១ខែ ឆ្នាំ២០២៣ ដែលមានចំនួន ៤២,៥ពាន់លានដុល្លារ។ បើតាមការបន្ថែមនៅក្នុងស្ថិតិដដែល។
បើតាមស្ថិតដដែល បានឱ្យដឹងទៀតថា សម្រាប់ខែវិច្ឆិកា ឆ្នាំ២០២៣ ការផ្លាស់ប្តូរទំនិញរវាងប្រទេសទាំង២ មានទឹកប្រាក់សរុប ១,០១ពាន់លានដុល្លារ កើន ៥,៩៤% បើធៀបនឹងខែវិច្ឆិកា ឆ្នាំ២០២២ មានចំនួន ៩៥៤,៩៧លានដុល្លារ ក្នុងនោះ ទំនិញកម្ពុជានាំទៅចិន ១៣៦,០៧លានដុល្លារ កើន ១១,៩% និងទំនិញនាំពីចិនមកកម្ពុជា ៨៧៥,៦២លានដុល្លារ កើន ៥,១%។
គួរម្លឹកថា ក្នុងឆ្នាំ២០២២ ការធ្វើពាណិជ្ជកម្មកម្ពុជា-ចិន មានទឹកប្រាក់សរុប ១១,៦៩ពាន់លានដុល្លារ កើនឡើង ៤,៤%ធៀបនឹងឆ្នាំ២០២១ ក្នុងនោះ កម្ពុជានាំទំនិញទៅទីផ្សារប្រទេសចិន ១,២៤ពាន់លានដុល្លារ ថយចុះ ១៧,៩% និងទំនិញចិននាំមកកម្ពុជាចំនួន ១០,៤៥ពាន់លានដុល្លារ កើន ៧,៩%៕
ដោយ៖ មឿន ឌីណា (Moeun Dyna)
