ភ្នំពេញ៖ កម្ពុជា រកចំណូលបានប្រមាណ ៣៩០០លានដុល្លារ ពីការនាំចេញកសិផលទៅក្រៅប្រទេស ពោលគឺចាប់ ពីខែមករា ដល់ខែវិច្ឆិកា ឆ្នាំ២០២៣ ក្នុងបរិមាណសរុបជាង ៧លានតោន ក្នុងនោះមាន ស្រូវចំនួន ២លានតោន អង្ករចំនួន ៥៩ម៉ឺនតោន និងកសិផលក្រៅ ពីស្រូវ-អង្ករជាង ៤លានតោនផងដែរ។ របាយការណ៍នៃអគ្គនាយកដ្ឋានកសិកម្ម បានបញ្ជាក់ថា នាំទៅទិសដៅ ៧៥ប្រទេស ធ្លាក់ចុះចំនួន ៤,៦% បើធៀបនឹងគ្រាដូចគ្នាក្នុងឆ្នាំ២០២២។
ថ្វីដ្បិត ការនាំចេញកសិផលក្នុងរយៈពេល ១១ខែ ឆ្នាំ២០២៣ នៅតែមានបរិមាណតិចជាងរយៈពេល ១១ខែ ឆ្នាំ២០២២ ប៉ុន្តែការនាំចេញមាននិន្នាការកើនឡើងគួរឱ្យកត់សម្គាល់។ ជាក់ស្តែង ការនាំចេញក្នុងខែវិច្ឆិកា ឆ្នាំ២០២៣ មានបរិមាណ ១ ០៣៧ ៥៥២,៣៨តោន កើនឡើង ៣៤៦ ២៤១,០៣តោន បើធៀបនឹងខែតុលា ឆ្នាំ២០២៣ ដែលមានបរិមាណ ៦៩១ ៣១១,៣៥តោន។ នេះបើតាមការបន្តនៅក្នុងរបាយការណ៍ខាងលើ។
ទោះជាយ៉ាងណា ជុំវិញនឹងការធ្លាក់ចុះនូវការនាំចេញនេះ ក្រសួងកសិកម្ម បានអះអាងថា បណ្តាលមកពីជម្លោះរវាង អ៊ីស្រាអែល និងក្រុមហាម៉ាស មានឥទ្ធិពលយ៉ាងធំធេងលើលំហូរពាណិជ្ជកម្មសកល ដែលបានចុះខ្សោយរួចទៅហើយ នោះ រួមទាំងអត្រាការប្រាក់ខ្ពស់ ទីផ្សារអចលនទ្រព្យចិនដែលតានតឹង និងសង្គ្រាមរុស្ស៊ីនៅអ៊ុយក្រែន បានជះឥទ្ធិពល យ៉ាងខ្លាំងដល់កំណើនសេដ្ឋកិច្ចពិភពលោក។ ជាពិសេស បណ្តាប្រទេសដែលពឹងផ្អែកជាចម្បងលើការនាំចេញដូចជា ប្រទេសកម្ពុជាជាដើម។
ក្រសួងកសិកម្ម បានបន្តទៀតថា ក្នុងនោះ ទីផ្សារស្រូវក្នុងប្រទេសកម្ពុជា នៅតែមានតម្លៃខ្ពស់ ជាហេតុនាំឱ្យរោងម៉ាស៊ីន កិនស្រូវមួយចំនួនធំ ប្រមូលទិញស្រូវបានបរិមាណតិច ដោយសារតម្លៃថ្លៃមិនហ៊ានប្រថុយក្នុងការទិញស្រូវស្តុកទុក សម្រាប់កិនអង្ករនាំចេញ។ ប៉ុន្តែ យើងសង្កេតឃើញថា ការនាំចេញស្រូវដោយមិនមានវិញ្ញាបនបត្រភូតគាមអនាម័យទៅ ប្រទេសវៀតណាម នៅតែមានជាហូរហែ។
លោក សុខ យ៉ន អនុប្រធានសមាគមសុវត្ថិភាព បន្លែ ត្រី សាច់ ដែលភ្នំពេញប៉ុស្តិ៍ បានស្រង់សំដីលើកឡើងថា ដើម្បីលើកកម្ពស់សមត្ថភាពនាំចេញកសិផល គឺកម្ពុជាចាំបាច់ត្រូវតែធ្វើយ៉ាងណាលើកកម្ពស់ការគាំទ្រផលិតផលក្នុងស្រុកឱ្យបានខ្លាំង ខណៈ បច្ចុប្បន្នដោយសារផលិតផលកសិកម្ម(បន្លែ)កម្ពុជាមានតម្លៃខ្ពស់ បានបណ្តាលឱ្យមានការនាំចូលពីប្រទេសជិតខាងជាហូរហែ។
ការគាំទ្រផលិតផលក្នុងស្រុក នឹងជួយឱ្យការបង្កបង្កើនផលកាន់តែច្រើន ហើយការនាំចេញក៏នឹងកើនឡើងទៅតាមនោះដែ។ ជាការនញ្ជាក់ លោក សុខ យ៉ន បន្ថែមថា ការត្រួតពិនិត្យគុណភាពផលិតផលនាំចូលឱ្យបានច្បាស់ និងការលើកទឹកចិត្តប្រជាកសិករ នឹងជួយធ្វើឱ្យការដាំដុះផលិតផលកសិកម្មនៅកម្ពុជាមានកាន់តែច្រើន ហើយនៅពេលនេះសមត្ថភាពនាំចេញក៏នឹងកើនឡើងដែរ៕
ដោយ៖ មឿន ឌីណា (Moeun Dyna)
